Kayatmo Kadi a Ramanan Dagiti Sabong ti Karabasa?
BABAEN ITI MANNURAT TI AGRIINGKAYO! IDIAY MEXICO
NO AGSABONG dagiti karabasa, kasla hardin ti kanatengan. Saan a nabanglo ti ayamuom ti napintas ti sukogna a duyaw a sabong—a nangayed ken simple ti diseniona—ngem sigurado a makapasaraaw. Kayattayo kadi a sawen a talaga nga agsidsida ti tattao kadagiti sabong? Wen. Kinapudnona, sigun iti pagiwarnak a Cuadernos de Nutrición, makuna a ti Mexico ti pagilian a kaaduan iti putahe a pakausaran dagiti sabong.
No maipapan iti sabong ti karabasa, sinigsiglon a masidsida dayta. Iti adu a kita ti karabasa, nalabit ti sabongna ti kaaduan a pagtaraon. Ngem masapul nga usarentayo laeng ti sabong a kalalaki no kayattayo a tagiragsaken met ti bungana. Matmatantayo laeng ti ungkay ta no adda bassit a karabasa iti dayta, kababai dayta a sabong ket nasaysayaat no ditay alaen.
Ti naimas a raman ti sabong ti karabasa ket nagsayaat a laok ti nadumaduma a putahe. Masansan a maigisa iti bawang ken sibuyas ken nalabit kadagiti nasagangasang a sili. No natimplan amin daytoy ken naluton ti bawang, inayon ti naugasan ken naimaritanen a nagergerret a sabong. Kalpasanna, kaluban sa paburekentayo dayta iti sumagmamano a minuto. Mabalin met a laokan ti sabong iti bunga iti karabasa a nagergerret iti kuadrado, kappuros a mais, sangkabassit a mantekilia, ken dagiti nabanglo a bulbulong. Iparabawtayo dagitoy iti di naluto a tortilia sa kupinen. Kalpasanna ilutotayo dayta iti griddle tapno agbalin a naimas a quesadilla a naaramid iti sabong ti karabasa.
Saan laeng a naimas ti raman ti quesadilla-tayo no di ket nasustansia pay. Ngamin ti sabong ti karabasa ket addaan iti sangkabassit a protina, calcium, iron, thiamine, niacin, ascorbic acid, ken retinol.
Maaramid met ti naimas a sopas iti daytoy a sabong. Surotentayo laeng ti pamay-an a naibaga nga immuna, nayonan iti digo, sa idasar a napudot. Mabalin a laokantayo iti keso ken nagergerret a naprito a tortilia.
Adu pay a putahe ti mabalin a lutuen babaen iti daytoy a sabong nga adu ti pakausaranna. Isu nga apay a dikay agluto iti putahe a sabong ti karabasa ti ramenna? Sigurado a magustuanyonto dayta!