Manipud Kadagiti Agbasbasa
Dagiti Bantay—Napategda iti Biag Ditoy Daga (Marso 22, 2005) Ti panagpasiar iti Grand Tetons ti maysa kadagiti makapaamanga unay a pasamak iti biagko. Ngem nasdaawak idi nabasak ti maipapan iti kinapateg dagiti bantay. Adayo a dakdakkel itan ti panangapresiarko kadagiti bantay ditoy daga ken iti nakaskasdaaw a Namarsua a nangdisenio kadagitoy.
J. G., Estados Unidos
No kitaek ti kinapintas dagiti parsua ni Jehova, diak mailadawan ti riknak. Agpapan pay iti panangdadael ken panangrugit ti tattao iti aglawlaw, mabalin pay laeng nga apresiaren ken tagiragsaken ti maysa a tao dagiti kabambantayan. Maragragsakanak a mangipadamag iti sabsabali ti mapasamak iti asidegen a masanguanan kas naikari iti Salmo 72:16.
R. C., Estados Unidos
Agimtuod Dagiti Agtutubo . . . Apay a Rumbeng nga Agtrabahoak iti Nadagsen? (Marso 22, 2005) Agtartrabahoak iti tartarawidwidan ni tatangko a kompania nga agpimpintura kadagiti balbalay ken pasdek, ngem adda nangibaga kaniak a diak mausar ti utekko iti daytoy a kita ti trabaho. Ngem impaganetget ti artikulo a da Jesus ken Pablo nagtrabahoda babaen kadagiti imada. Ita, ad-adda maparegtaak nga aggaggaget iti trabahok. Kayatko a kabesaduen daytoy a paglaingan tapno mausarko iti panagbangon kadagiti Assembly Hall ken Kingdom Hall.
M. Y., Japan
Talaga a pinaregtanak daytoy nga artikulo! Daytoy impalagipna manen kaniak a ti kangrunaan a panggeptayo iti biag ket agserbi ken Jehova a Dios ken ti trabaho a piliek rumbeng a mayataday iti dayta a panggep. Tinignaynak daytoy nagsayaat nga artikulo nga idauluak ti panangaramid iti kasapulan a mairingpas iti aglawlaw ti pagtaenganmi. Napatpateg pay, ti artikulo tinulongannak a mangammo iti panangmatmat ni Jehova maipapan iti panagtrabaho iti nadagsen.
Y. K., Russia
Biag—Nakaskasdaaw a Ragup Dagiti Kadena (Enero 22, 2005) Agtawenak iti 15. Iti klasek iti biolohia idiay eskuelaan, ad-adalenmi ti maysa a topiko a naawagan iti energy metabolism. Idi intugotko daytoy a magasin iti eskuelaan, inusar ti maestrak iti biolohia daytoy nga artikulo a mangisuro iti klase, sana impakita dagiti drowing iti dayta. Kalpasan ti klase, imbaga ti amin a kayatda ti maaddaan iti daytoy a magasin. Iti daytoy nga artikulo, nalawag a kasta la unay ti kinasirib ni Jehova. Talaga a maikari a maidaydayaw. Segseggaak unay ti tiempo inton amin a sibibiag a parsua dayawendan ni Jehova!
Y. B., Russia
“No Ammo La Koma Dagiti Tattao!” Enero 8, 2005) Agtawenak iti 17, ket sangkapanunotko ti iyaakar iti lugar a dakdakkel ti pakasapulan kadagiti agibumbunannag iti Pagarian. Ti ulidan ni David ti nangpabileg iti determinasionko nga umakar iti kasta a teritoria kalpasan la unay nga agturposak iti panageskuelak. Pangngaasiyo ta itultuloyyo ti agipablaak kadagiti kasta a makaparegta nga ulidan. Dakami nga agtutubo kasapulanmi ti kanayon a pammaregta tapno rumang-aykami iti panangasaba.
K. O., Poland
Agtawenak iti 20, ket nakasangitak idi nabasak daytoy nga artikulo. Napanunotko a ‘No matayak bayat a kabambannuagak, diak kayat nga adda aniaman a pagbabawyak gapu ta intantanko ti agserbi ken Jehova iti amin a kabaelak!’ Kalatko nga agbalinakton nga amin-tiempo nga ebanghelisador. Ikuadrokto daytoy nga artikulo ken ikabitko iti diding tapno diak pulos malipatan ti nariknak idi nabasak dayta. Pagyamanan iti panangipablaakyo kadagiti kasta a nagsayaat a kapadasan.
N. N., Japan