Manipud Kadagiti Agbasbasa

Panagtitinnulong—Napateg iti Biag (Setiembre 8, 2005) Annugotek nga idi damo a nakitak ti akkub daytoy a ruar, impagarupko a diak magustuan dayta a topiko. Ngem binasak ti intero a serye ket nagustuak! Bayat nga agbasbasaak, namin-adu a nagsardengak tapno agyaman ken Jehova gapu iti nakaskasdaaw a panangparsuana kadagiti bambanag. Nakaskasdaaw a makita ti panagtitinnulong dagiti animal.

B. K., Estados Unidos

Agimtuod Dagiti Agtutubo . . . Kasano a Maliklikak ti Makigayyem Kadagiti Addaan iti Dakes nga Impluensia? (Agosto 22, 2005) Inayatko idi iti maysa a babai a “dakes ti impluensiana” ken saan a pulos a natibker ti pannakairamutna iti kinapudno iti Biblia. Ti naammuak ti nakatulong kaniak a mangamiris iti peggad ti pannakikadua iti tao a nakapuy ti espiritualidadna. Makaliwliwa a maammuan a maseknan ni Jehova kadatayo. Pagyamanan iti naintiempuan a tulongyo.

A.B.K., Zambia

Tinulongannak daytoy nga artikulo tapno maamirisko a masapul a baliwak dagiti pakikadkaduaak. Nupay narigat idi, daytoy nga artikulo, nga inkabilko iti asidegko tapno masansan a mabasak, ti kanayon a mangpabpabileg kaniak. Pagyamanan iti panangtulong ken panangparegtayo kadakami nga agtutubo.

L. R., Estados Unidos

Ti Panangmatmat ti Biblia—Rumbeng Aya nga Agkararagka ken Birhen Maria? (Setiembre 8, 2005) Apresiarenkayo a Saksi ni Jehova agsipud ta awan pakapilawan ti kababalinyo ken nagadun ti naitulong kaniak dagiti magasinyo. Nupay kasta, kasano a maibagayo a rumbeng a ditay agpatulong ken Maria? Ibabaetnatayo iti Amatayo, tapno masagraptayo ti talna.

E. R., Espania

Sungbat ti “Agriingkayo!”: Kas iti inlawlawag ti artikulo, awan ti mabasatayo iti Biblia a mangipalpalubos nga agkararagtayo iti asinoman malaksid iti Dios. Sigun iti Katoliko a padi ken mannurat a ni Andrew Greeley, “ti simbolo ni Maria direkta nga inaigna ti Kristianidad kadagiti inna a diosa dagiti relihion idi ugma.” Gapuna, ti panagdayaw ken Maria ket nainaig iti paganismo, saan nga iti Kristianidad. Ammomi a mabalin a kabbaro a kapanunotan daytoy para iti adu nga agbasbasa, isu a parparegtaenmi ida a mangsukimat iti Biblia tapno maammuanda ti talaga nga isursurona. Dati a Katoliko ti adu kadagiti Saksi ni Jehova, ngem, apaman nga inadalda ti Sao ti Dios, naammuanda a saan a kayat ti Dios nga agkararagtayo babaen iti asinoman malaksid ken Jesu-Kristo, ti kakaisuna a manangibabaet kadatayo. (Hebreo 7:25) Tapno ad-adu pay ti maammuanyo, kitaenyo ti libro nga “Ania a Talaga ti Isursuro ti Biblia?”a iti Kapitulo 15 a napauluan iti “Panagdayaw nga Anamongan ti Dios.” Iyunay-unayna ti kinapateg ti panangitunos kadagiti patpatientayo iti Nasantuan a Kasuratan.

Panangibtur iti Sakit Babaen iti Kinamanagpakatawa (Abril 22, 2005) Natay ni baketko gapu iti sakit ti dalemna idi Disiembre 2002. Agarup walo a bulan a nagsagaba. Nupay kasta, bin-ig a makaparegta ti ibagbagana ken iranranudannakami kadagiti makapakatawa a kapadasan. Kanayon a naragsak agingga a nauyos ti biagna. Kalpasan a nabasak daytoy nga artikulo, naawatakon ti makagapu. Masapul gayam a positibo ti kababalinna a kas kadakami. Sigurado a nasayaat ti epekto dayta kenkuana a kas iti aktual a napasaran ni Conchi. Pagyamanan iti panangipaawatyo kaniak no apay a kasta idi ti kababalin ni baketko.

D. H., Estados Unidos

Manipud Kadagiti Agbasbasa Kanayon a segseggaak ti benneg a “Manipud Kadagiti Agbasbasa.” No dadduma, adda mabasak a surat a naggapu iti maysa a tao isu a mapanunotko, ‘Kastaak met!’ Pasaray saludsodak ti bagik, ‘Diak aya naawatan ti inyunay-unay dayta nga artikulo?’ Kalpasanna, basaek manen, ket masansan a maragsakan ken maparegtaak no kasta ti aramidek.

M. T., Japan

[Footnote]