Manipud Kadagiti Agbasbasa

Panangtulong Kadagiti Marirriribukan a Tin-edyer (Abril 8, 2005) Makaisuro unay daytoy a serye. No dadduma, narigat ti agbalin a tin-edyer, ngem saan unay a makapasikor dayta gapu iti kaadda dagiti makaparegta nga artikulo a kas iti daytoy. Daytoy ti impormasion nga eksakto a kasapulanmi tapno maparegtakami kabayatan dagitoy “napeggad a tiempo a narigat a pakilangenan.” (2 Timoteo 3:1) Makatulong kadakami dagiti palagip kadagitoy nga artikulo tapno saankami a matnag kadagiti ‘pangallilaw ti Diablo.’ (Efeso 6:11) Pagyamanan iti panangipaayyo iti naespirituan a taraon iti umiso a tiempo.

K. S., Estados Unidos

Nadalus a Pagtaengan—Ti Maaramidantayo Amin (Hunio 8, 2005) Idi ubingak, nagtrabaho nga agpadpada dagiti dadakkelko isu a dakami a tallo nga annakda ti kanayon nga agay-ayam idiay balaymi. Nakawarwara dayta. Agingga ita, kagurgurak ti agdalus. Ngem idi nabasak daytoy nga artikulo, nariknak a kas man la isursuronak ni nanangko nga agdalus. Addaanak met itan kadagiti dumakdakkel nga annak, ket masuronda nga agdalus. Adu ti nasken nga isurok kadakuada. Naparegtaak gapu iti daytoy nga artikulo.

Y. E., Japan

Pangrepaso nga Agpaay iti Pamilia (Mayo 8, 2005) Idi nakitak daytoy nga artikulo, nakasangitak. Impakitak dayta iti anakko. Imbagana a nabasanan daytoy nga artikulo maipapan iti nadunor a billit balay ket nasungbatannan dagiti saludsod iti “Pangrepaso nga Agpaay iti Pamilia.”

L. S., Estados Unidos

Dagiti Libraria a Pangparang-ayan iti Pannakaammo (Mayo 22, 2005) Pangngaasiyo ta palubosandak a mangipakaammo a ti ladawan iti panid 18 ket saan a husto a mangdeskribir ken Ari Ashurbanipal ti Asiria. Kinapudnona, ladawan dayta ti Asiriano a ni Ari Esar-haddon.

A. W., Alemania

Sungbat ti “Agriingkayo!”: Pagyamanan iti panangipakaammoyo iti dayta. Kas iti dinakamat ti “Insight on the Scriptures,” Tomo 1, panid 757, a reperensiami maipapan iti Biblia, ni Esar-haddon ti inaudi nga anak ken kasuno ni Ari Senaquerib ti Asiria.a

Ti Nakaskasdaaw a Kalendario Dagiti Maya (Abril 8, 2005) Daytoy nga artikulo ti nangtignay kaniak nga agsirarak iti Internet. Natakuatak nga agkanaig unay ti kalendario dagiti Maya ken ti astrolohia. Para kaniak, ti pannakaipablaak dagiti artikulo a kas iti dayta ti mangtignay kadagiti agbasbasa nga aginteres iti astrolohia ken kadagiti arte ti mahika.

J. K., Poland

Sungbat ti “Agriingkayo!”: Kas sagudayen ti panid 4 ti magasin nga “Agriingkayo!,” daytoy a magasin ket “agipadamag, iyam-ammona dagiti tattao iti adu a lugar, usigenna ti relihion ken siensia.” Sigurado a di kaipapanan daytoy nga an-anamonganmi ti amin a mapaspasamak kadagitoy a benneg. Iti ababa nga artikulo a dinakamatyo, impadamagmi ti maipapan kadagiti nagkauna a Maya ken no kasano a nakatulong ti kinasigoda nga agkalkular iti tiempo tapno mapataud dagiti nakaskasdaaw ti kinaumisoda a kalendario. Ti impakaammo daytoy nga artikulo a ti kalendario dagiti Maya ti maus-usar idi iti panagbuyon ket saan a nairanta a mangparegta kadagiti agbasbasa tapno adalenda ti astrolohia.

Sagpaminsan, makaawatkami kadagiti umasping a saludsod maipapan iti disenio dagiti ladawan a makita kadagiti publikasionmi. Dagiti nailadawan nga idolo, narelihiosuan a simbolo, wenno espiritistiko a banag ket saan a nairanta a mangtukay iti panagusioso. Imbes ketdi, ikkatenna ti aniaman a misterio a pagarup kadagitoy a banag ken mangpakdaar kadagiti agbasbasa a dida makipaset iti aniaman kadagitoy. Adu kadagiti naawatmi a komento ti mangipasimudaag nga adda kasta a makagunggona nga epekto dagiti usarenmi a ladawan.

[Footnote]