Pammati ti Maysa nga Ubing

NANGRUGI ni Dustin a makikadua iti sumagmamano a daras a pannakipagadal ni nanangna iti Biblia iti maysa kadagiti Saksi ni Jehova. Nupay agtawen laeng idi iti 11, nauneg ti panagpampanunotna ken adu ti mamagpanunot a saludsodna. Di nagbayag, nagpayadal metten iti Biblia babaen iti maysa a dati a misionero a nangyadal met ken ni nanangna. Rinugianna payen nga inranud ti ad-adalenna kadagiti kaeskuelaanna.

Nangrugin a makigimong ni Dustin iti Kingdom Hall iti lugarda. Agsungsungbat payen no makiddaw kadagiti timmabuno a makipasetda. Idi sinarungkaranda nga agkakabsat ni tatangda, impapilit ni tatangda a makimisada amin. Inlawlawag ni Dustin no apay a kaykayatna ti makigimong idiay Kingdom Hall. Immanamong ni tatangna ken pinalubosanna ni Dustin a mapan sadiay.

Maysa a rabii kalpasan ti pannakigimongda iti Kingdom Hall, ni Dustin ket sapsapulen ni nanangna. Dina ngamin impakada ken ni nanangna a nakisarita gayam iti manangaywan iti Teokratiko nga Eskuelaan ti Panagministro. Dinamagna no mabalinen nga agpasalista iti dayta nga eskuelaan. Immanamong ni nanangna. Nagagaran a nangpadaan iti damo a pasetna. Ngem maigiddato iti dayta, nangrugin ti nakaro a panagut-ot ti padingpadingna isu a naipan iti nadumaduma a doktor tapno maeksamen. Kamaudiananna, dimtengen ti rabii ti damo a panagpaset ni Dustin idiay Kingdom Hall. Nakasaklay iti dayta a kanito. Nupay madlaw a nakaro ti marikriknana nga ut-ot, nagna a di nakasaklay agingga idiay plataporma.

Di nagbayag kalpasanna, ni Dustin ket nadayagnos nga addaan iti Ewing’s sarcoma, maysa a karkarna a kita ti kanser iti tulang. Binusbosna iti ospital dagiti ubbing idiay San Diego, California ti kaaduan nga aldaw iti simmaganad a tawen. Nupay naipasidong iti chemotherapy, radiation, sa naputed ti kannawan a gurongna ken tulang iti patongna idi agangay, saan a pulos a kimmapuy ti pammati ken panagayatna ken Jehova. Idi saan unayen a makabasa gapu iti panagkapuyna, ibasbasaanen ni nanangna a dandani kanayon nga adda iti dennana.

Nupay kimmaro ti kasasaad ni Dustin, saan a pulos a nagreklamo. Kanayon nga okupado. Babaen iti wheelchair, as-asitganna ti dadduma a pasiente ken dagiti nagannakda, agraman ti maysa a padana a Saksi a pasiente. Nakita dagiti agtartrabaho iti ospital a naiduma ni Dustin ken ti padana nga agtutubo a Saksi—ta ti pammatida ti mangpabpabileg kadakuada.

Kayat ni Dustin ti agpabautisaren. Isu a bayat a nakaidda iti sopa, gapu ta din makatugaw, inyadal dagiti Kristiano a panglakayen kenkuana ti salsaludsod agpaay kadagiti agngayangay nga agpabautisar kas Saksi ni Jehova. Idi Oktubre 16, 2004, idi agtawen iti 12, nabautisaran ni Dustin iti maysa nga asamblea sirkito.

Idi asidegen a mangrugi ti palawag ti bautismo, naka-wheelchair ni Dustin a naiturong iti sibay ti dadduma pay nga agngayangay nga agpabautisar. Idi nakiddaw nga agtakderda, nupay maymaysan ti gurongna, timmakder ni Dustin a sikakawes iti kapintasan nga amerikanana, ken nagkapet iti sikigan ti maysa a tugaw tapno saan a matumba. Nakapigpigsa ken nakalawlawag a sinungbatanna dagiti saludsod para kadagiti agbautisar. Dimmar-ay ti amin a pamilia ni Dustin, agraman ti agpayso nga amana ken ti agsiuman kenkuana. Timmabuno met dagiti agtartrabaho iti ospital ken dagiti naggapu iti ospital a nagannak ti dadduma pay nga ubbing nga addaan iti kanser.

Kabigatanna, kalpasan ti panagbautisar ni Dustin, nayospital manen. Nagwarasen ti kanser iti tunggal tulangna. Bayat a kumapkapuy ken mariknana nga asidegen a matay, dinamagna ken ni nanangna no talaga a matayen. “Apay a damdamagem?” inyimtuod ni nanangna, “mabutengka kadi a matay?”

“Saan,” kinunana. “Agkidemakto laeng. No agmulagatak inton mapagungarak, kas man la apagdarikmat laeng a nagkidemak. Awanton ti mariknak nga aniaman nga ut-ot.” Kalpasanna, inlawlawagna, “Madanaganak la ngamin maipapan kadakayo a pamiliak.”

Natay ni Dustin iti simmaganad a bulan. Nakipamumpon dagiti doktor, nars, pamilia dagiti empleado iti ospital, mannursuro, kaarruba, ken siempre ti pamilia ni Dustin—agpadpada dagiti Saksi ni Jehova ken dagiti saan a Saksi. Kiniddaw ni Dustin a makasabaan a naimbag ti amin a makipamumpon kenkuana maipapan kadagiti patpatienna. Iti imatang ti adu a tattao, adda nagsayaat ken makapabileg-pammati a diskurso nga impalawag ti instruktor ti Teokratiko nga Eskuelaan ti Panagministro, a nangted idi ken Dustin iti kakaisuna a pasetna a nabaelanna nga iparang kas maysa nga estudiante. Nakatakder laeng ti kaaduan kadagiti makipamumpon agsipud ta awanen ti umdas a pagtugawanda.

Nayimprenta ti dua kadagiti teksto a paborito ni Dustin para kadagiti nakipamumpon kenkuana—ti Mateo 24:14 ken ti 2 Timoteo 4:7. Ti nabileg a pammati ken kinatarnawna ti nangparegta iti amin a makaam-ammo kenkuana. Segseggaanmi ti panangsabatmi kenkuana inton panagungar.—Kas insalaysay ti Saksi a nangyadal ken Dustin.

[Blurb iti panid 27]

“Nakirupakak iti nasayaat a dangadang, tinarayko ti tarayen agingga iti pagpatinggaan, inalagadko ti pammati.”—2 Timoteo 4:7

[Ladawan iti panid 26]

Ngato: Ni Dustin, idi nasalun-at pay

[Ladawan iti panid 26]

Baba: Ti panagbautisar ni Dustin idi agtawen iti 12