Manipud Kadagiti Agbasbasa

Pammati ti Maysa nga Ubing (Agosto 2006) Segseggaak ti pannakakitakto kenni Dustin, ken ti minilion a dadduma pay a natayen, a sisasalibukag nga agtartaray ken aglaglagto idiay baro a lubong nga asidegen.

A. A., Sri Lanka

Kasta unay ti pannakatukayko iti pammati ken di maisin a kinatured ni Dustin. Tinignaynak ti kapadasanna a mangtingiting iti kinapateg ti kinapudno iti biagko ken mangipasdek kadagiti umiso a prioridad. Maamirisko itan a rumbeng nga ipangpangrunak ti panangtaginayonko iti nasayaat a relasion ken Jehova ken ti panangyun-unak kadagiti interes ti Pagarian.

M.C.V., Brazil

Nagutugot ti pusok iti kinaregta ken kinapasnek ni Dustin agpaay iti kinapudno. Impakita dagiti tignayna a kayatna a paragsaken ni Jehova ken pagserbian ti sabsabali. Kas ken Dustin, kayatko met ti ‘agtaray agingga iti pagpatinggaan ken alagaden ti pammatik’!

M. N., Japan

Pito ti tawenko. Pagyamanan iti panangipablaakyo iti dayta a kapadasan. Apresiarek ni Dustin, ta nupay din maagasan ti sakitna, nabileg ti pammatina ken Jehova. Gapu iti ulidanna, naparegtaak tapno ad-adda nga agserbiak iti Dios.

T. D., Italia

Dagiti Makapainteres a Disenio ti Mulmula (Setiembre 2006) Maysa ket kagudua nga oras nga inanagko dayta nga artikulo! Makaisuro unay! Nagdrowingak met tapno ad-adda a maawatak dayta. Nupay kasta, usigenyo koma ta ti fraction a 13/21 saanna nga eksakto nga irepresentar ti perpekto a proporsion ti sirkulo no di ket ti nabatbati a proporsion a 222.5 a degree.

L. C., Estados Unidos

Sungbat ti “Agriingkayo!”: Inlawlawag ti sumagmamano nga agbasbasa a ti perpekto a proporsion ti maysa a rikus ket agarup 222.5 a degree. Apay a kinuna ti artikulomi a ti perpekto nga anggulo ket 137.5 a degree​—ti isu met la nga anggulo a marukod a pakannigid? Kuna ti Website a MathWorld: “Ti perpekto nga anggulo ket isu ti anggulo a manggudua iti intero nga anggulo [360°] iti perpekto a ratio (ngem marukod iti kasungani a direksion tapno kurang a 180° ti rukodna).” Iti panangilawlawagna no apay a dagiti matematiko ken sientista ket kasta ti panangirepresentarda iti perpekto nga anggulo, kinuna ti Briton a matematiko a ni Dr. Ron Knott: “Gagangay a ti basbassit nga anggulo ti nakaipamaysaan ti atensionmi.” Gapuna, nupay ti perpekto a proporsion ket agarup a 13/21 (nasurok a kagudua), gagangay a mairepresentar ti perpekto nga anggulo kas 137.5 a degree (kurang a kagudua).

“Naibaludda Gapu iti Pammatida” (Abril 2006) Saanak a Saksi ni Jehova. Nupay kasta, raraemek unay dagiti karelihionanyo. Adda dagiti Saksi a naam-ammok idi naibaludak iti kampo konsentrasion idiay Gross-Rosen ken Buchenwald. Mapagwadan unay ti kababalinda ken nagpaiduma ti narelihiosuan a kombiksionda isu a nagun-odda ti panagraem ken pammadayaw dagiti amin a padami a balud agraman dagiti SS. Kanayon a silulukat ti ridawko kadagiti Saksi ni Jehova.

P. V., Estados Unidos