Ti Tower Bridge—Pagserkan iti London — Watchtower ONLINE A LIBRARIA

Ti Tower Bridge—Pagserkan iti London

BABAEN ITI MANNURAT TI AGRIINGKAYO! IDIAY BRITANIA

AMMO dayta dagiti ganggannaet a di pay pulos nakapan ditoy England. Iti kada tawen, rinibu a turista ti mangpasiar iti dayta. Inaldaw a ballasiwen dayta dagiti umili ti London, a nalabit awan pamalatpatanda wenno dida pay pinanunot no kasano a naibangon dayta. Ti Tower Bridge ket maysa kadagiti kalatakan a pagilasinan iti London.

Sabali ti London Bridge iti Tower Bridge. Ngamin, ti Tower Bridge ket nainaig iti kabangibangna a Tower of London. Idi 1872, ti Parlamento ti England inusigna ti singasing a bilin a mamalubos iti pannakaibangon ti rangtay iti Thames. Nupay saan idi nga umanamong ti gobernador ti Tower, inkeddeng ti Parlamento a maaramid dayta a sabali pay a rangtay, no la ketdi ta ti diseniona ket umasping iti estilo ti Tower of London. Nangrugi ti agdama a Tower Bridge babaen dayta nga opisial a singasing.

Bayat ti maika-18 ken maika-19 a siglo, adu a rangtay ti namagsilpo kadagiti agsumbangir a takdang ti Thames, a ti kalatakan ket ti Old London Bridge. Idi 1750, nakapuyen dagiti pundasion dayta a rangtay ken natrapik unayen gapu iti kaadu dagiti lugan a lumasat iti dayta. Iti sirokna, agdudupudop ti nagadu a bapor nga agsapul iti pagsangladanda iti naileten a puerto. Kadagidi a tiempo, nagadu a bapor ti sumanglad sadiay isu nga ibagada a ti maysa mabalin a kinilkilometro ti pagnaenna no lumasat kadagiti nakasanglad ken agaabay a bapor.

Maitunos iti kiddaw ti Korporasion ti London, ti arkitekto ti siudad a ni Horace Jones insingasingna ti pannakaaramid ti rangtay nga estilo Gothic iti surong ti London Bridge a mabalin nga ipangato ti agsumbangir a pasetna tapno makalasat dagiti sumanglad a bapor nga agpalaud iti Thames. Karaman iti diseniona ti matmatan idi ti adu kas kabbaro a parupana.

Nagpaiduma a Disenio

Adun ti napasiar ni Jones. Kadagiti banawang idiay Netherlands, dagiti babassit a rangtay a mabalin nga ipangato ti nakapanunotanna a mangdisenio iti rangtay a sinan batuabatuag. Aglukat ti tengngana sa agpangato ti agsumbangir a pasetna tapno makalasat iti sirokna dagiti dadakkel a barangay ken bapor. Daytat’ nadisenio kadagiti naestilo a pamay-an ti panagibangon a nakausaran ti semento ken asero. Gapuna, ti nalatak itan a langa ti Tower Bridge ket naaramid sigun iti disenio dagiti inheniero ken arkitekto a kagrupo ni Horace.

Ti Tower Bridge ket addaan iti dua a kangrunaan a torre. Napagsilpo ti nangato a tukadna babaen iti dua nga agbatog a pagnaan. Tallopulo ket uppat a metro ti kangato dagitoy manipud iti rangtay ken agarup 42 a metro ti kangatoda manipud iti kaadalman a patar ti karayan. Aglukat ti makintengnga a paset ti rangtay sa agpangato ti agsumbangir a pasetna. Agarup 1,200 a tonelada ti timbang ti tunggal maysa kadagitoy dadakkel a paset ti rangtay ken maipangato iti anggulo a 86 a degree. Iti sirokna, sitatalged a makalabas dagiti bapor a kargado iti 10,000 a tonelada.

Ti Mangipangato iti Rangtay

Puersa ti danum ti nausar a nangipangato iti agsumbangir a paset ti rangtay, nangpaandar kadagiti elebeytor manipud iti tukad ti kalsada agingga kadagiti pagnaan iti ngato, ken nangpaguni iti alarma tapno sumardeng dagiti lugan. Wen, danum ti nausar iti pannakapaandar daytoy a rangtay! Ket nangipaay dayta iti aglaplapusanan a koriente—mamindua nga ad-adu ngem iti kasapulan.

Iti baba ti makin-abagatan a pungto ti rangtay, naikabil ti uppat nga aparato a paandaren ti karbon. Dayta ti nagpataud iti puersa ti sengngaw, wenno steam, a 5 agingga iti 6 a kilo kada sentimetro kuadrado. Dayta ti nangpaandar iti dua a nagdadakkel a bomba ti danum nga agpataud iti puersa nga 60 a kilo iti kada sentimetro kuadrado. Tapno mataginayon ti enerhia a kasapulan iti panaglukat ti tengnga ti rangtay ken pannakaingato ti agsumbangir a pasetna, nausar ti innem a dadakkel nga aparato (a pagurnongan iti agburburek a danum). Dayta ti nangpataud iti enerhia agpaay iti walo a makina a mangpaandar kadagiti paset ti rangtay. Apaman nga agandaren, ngumato dagiti agsumbangir a paset ti rangtay babaen dagiti pannakatangbawda a 50 a sentimetro a diametroda. Iti maysa la minuto, interamenten a maipangato dayta.

Panangpasiar iti Agdama a Tower Bridge

Koriente itan ti maus-usar imbes a puersa ti danum. Ngem kas idi un-unana, no aglukat ti Tower Bridge, sumardeng dagiti lugan iti kalsada. Dagiti magmagna, turista, ken dadduma pay nga agpaspasiar masmasdaawda iti mekanismo ti rangtay.

Bayat nga aguni ti alarma, mabangenan ti kalsada, naan-anay a makaballasiw ti kaudian a lugan a limmasat iti dayta, isu nga awanen ti aniaman a lugan iti rangtay. Siuulimek nga aglukat ti uppat nga agkokonekta a balunet isu nga aglukat nga agpangato ti agsumbangir a pasetna. Kalpasanna, ti karayan ti mingminganen ti amin tapno mabuyada ti ilalabas dagiti bapor, pangkargamento man, pangpasiar, pangkarera wenno pangpasahero. Sumagmamano a minuto kalpasanna, agunin ti alarma. Agsinnilpo manen ti agsumbangir a paset ti rangtay, sa maikkat dagiti bangen iti kalsada. Agawaan dagiti siklista ti mapan iti sango dagiti lugan tapno makaunada a bumallasiw. Sa la maluktan manen ti rangtay no adda lumasat a bapor.

Ti agpaspasiar nga interesado a mangammo iti mekanismo ti rangtay saanna la a buyaen ti maulit-ulit a panagsasaganad dagiti pasamak. Sumurot la ketdi iti dadduma a mapan aglugan iti elebeytor iti makin-amianan a torre tapno maammuanna ti pakasaritaan daytoy a rangtay a maipabuya babaen ti eksibit a “Tower Bridge Experience.” Karaman iti dayta nga eksibit ti maysa a sinan tao a mangilawlawag iti pannakaibangon dayta a rangtay. Nakalamina dagiti naisangsangayan a gapuanan ti inhenieria ken ti naangay idi a nalabor nga inagurasionna. Kanayonanna, adda dagiti ladawan ken maris kayumanggi a retrato a pakakitaan iti nagsayaat a pannakaaramid ti Tower Bridge.

Babaen kadagiti nangato a pagnaan, matagiragsak dagiti agpaspasiar ti makaay-ayo a buya ti nagtugmokan ti langit ken daga iti London. Iti laud, makitana ti St. Paul’s Cathedral ken dagiti pasdek ti bangko iti distrito ti komersio, agraman ti torre ti Post Office iti adayo. Iti daya, pagarupen ti agpaspasiar a makitana dagiti pagsangladan, ngem nayakaren dagitoy iti adayo manipud iti moderno ken kadakkelan a siudad. Ti ad-adda a makaatrakar ket ti Docklands, maysa a napabaro a lugar nga addaan kadagiti pasdek a moderno ti pannakadisenioda. Naisangsangayan, makaay-ayo, makapainteres—wen, amin dagitoy ket maitutop a pangdeskribir iti buya a makita manipud iti daytoy nalatak a pagilasinan iti London.

Inton agpasiarka ditoy London, sukimatem a naimbag daytoy historikal a pasdek. Iti kasta, agbalinto a nakalallagip kenka dayta a naisangsangayan a gapuanan ti inhenieria.

[Ladawan iti panid 16]

Maysa kadagiti bomba ti danum a paandaren ti sengngaw a nangipaay idi iti kasapulan a koriente dagiti makina

[Credit Line]

[Ladawan iti panid 16, 17]

Interamente a maipangato ti dua a paset ti rangtay iti awan pay maysa a minuto

[Credit Line]

[Picture Credit Line iti panid 15]