No Apay a Saanko a Ramrambakan ti Halloween

ITAY NAPAN A TAWEN, bayat a makumikom dagiti kaarrubana nga agsagsagana para iti Halloween—nga iti dadduma a pagilian ket maysa a nalatak a tinawen a piesta a nainaig unay iti espiritismo—adda naiduma a kapanunotan ti agtawen iti 14 a ni Michael idiay Canada. Kastoy ti kinuna ni Michael iti salaysay nga insuratna idiay eskuelaan:

‘Bisperas ita ti Halloween. Bayat a tumantan-awak iti tawa, makitak nga amin nga arubayan dagiti kaarrubami ket naarkosan kadagiti lapida ti tanem ken iskeleton sa adda dagiti jack-o’-lantern a naiparabaw iti pasamano dagiti tawada.a Ur-urnosen dagiti nagannak ti kawes ti annakda; ar-arapaapen dagiti ubbing a nagadu a kendi ti maawatda inton bigat.

‘Naiduma ti pamiliak. Saan a naarkosan ti arubayanmi, ken awan dagiti jack-o’-lantern kadagiti pasamanomi. Adda dagiti mangdamdamag no apay a saanko a ramrambakan ti Halloween. Ngamin, dagiti Saksi ni Jehova saanda a ramrambakan dayta gapu kadagiti namunganayanna.b

‘Nalabit masdaawkayo no apay a naragsakak no tiempo ti Halloween. Nalabit kayatyo a maammuan no apay. Ngamin, dayta ti mamagpanunot kaniak no apay nga adda sumagmamano a banag a diak kayat nga aramiden. Tunggal maysa ket manungsungbat no ikabilanganna wenno saan dagiti namunganayan ti maysa a kostumbre. Para kaniak, nasken nga ikabilangantayo no ania dagiti nagtaudan ti maysa a kostumbre. Kas pagarigan, makaunget ti kaaduan a tattao no agkawes dagiti kaarrubada iti uniporme idi dagiti Nazi. Apay? Gapu kadagiti namunganayan ti uniporme dagiti Nazi ken ti isimboloda—dagiti prinsipio a karurod ti kaaduan a tattao. Para kaniak, karurodko dagiti prinsipio nga irepresentar ti diablo, dagiti dakes nga espiritu, ken mangkukulam. Diak kayat ti makipaset kadagita. Nasayaat no panunotentayo dagiti ar-aramidentayo ken no apay nga ar-aramidentayo dagita, ket kalpasanna agdesisiontayo koma a naibasar iti prinsipio imbes a no ania ti nalatak. Dayta ti makagapu no apay a kaay-ayok daytoy a tiempo ti tawen. Pagpannakkelko a naidumaak ken maitakderak ti pammatik.’

[Footnotes]