Manipud Kadagiti Agbasbasa

Ania ti Napasamaken iti Ayat? (Marso 2006) Saan nga umiso ti panangdeskribir ti lubong iti kaipapanan ti ayat, ket kayat ni Satanas a naan-anay a dadaelen dayta. Ti impormasion a kas iti daytoy ti makatulong kadatayo a mangipakita iti ayat iti naynay ken di agimbubukodan a wagas. Pagyamanan iti panangpaunegyo iti pannakaawatko no kasano ti kayat ni Jehova a panangusartayo iti daytoy nabileg a puersa.

Y. B., Estados Unidos

Naladingitanak idi immakar ti dua a nasinged a gagayyemko tapno agserbida iti kongregasion nga agus-usar iti ganggannaet a lenguahe. Nupay kasta, naawatko daytoy a magasin idi maladladingitanak unay. Pagyamanan iti palagipyo a, “No kayatmo nga ayatendaka, agayatka.” Manipud itan, kayatko a ‘palawaen’ ken ipakita ti naimpusuan nga ayat tapno maaddaanak kadagiti kabbaro a gagayyem.—2 Corinto 6:12, 13.

M. T., Japan

Kinanataengan—Panangsaranget iti Rigat (Pebrero 2006) No dadduma, mariknak a maliplipatantayo dagiti natataengan. Sangapulo ket maysa a tawenen nga ay-aywanak ti baldado a lakayko. Pasaray malidlidayak latta. Namin-adu nga inulitko a binasa dagiti artikulo iti daytoy nga Agriingkayo!, ken namin-adu metten a dimngegak iti bersionna iti audiocassette. Daytoy a magasin ti talaga a kasapulak. Pagyamanan unay.

S. T., Japan

Artipisial a Saka ken Ima (Pebrero 2006) Pagyamanan unay iti artikuloyo maipapan kadagiti artipisial nga ima ken saka. Idi uppat a bulanen ti sikogko, naipakaammo kadakami a maipasngayto ti anakmi nga awanan iti saka ken ima. Nupay kasta, inton agmakatawenen, mabalinen a masulbongan kadagiti artipisial nga ima ken saka. Dimteng dayta nga artikulo iti bulan nga eksakto nga agmakatawenen ni Daryl. Madama itan nga agsursuro a tumakder ken magna. Segseggaanmi ken lakayko ti tiempo inton ni Daryl ket ‘kumalay-at a kas iti panagkalay-at ti kalakian nga ugsa.’—Isaias 35:6.

Y. A., Francia

Makapnek Unay ti Biag (Oktubre 22, 2001) Namin-adun a binasak ti Agriingkayo! nga Oktubre 22, 2001, nangruna no maup-upayak. Ti kasta nga impormasion ket kas man la agas. Ngem ti la nakaidumaanna ket saan a pulos nga agpaso dayta. Ti balakadna ken dagiti solusion nga isurona ket talaga a makatulong kadagiti parikutmi. Parparagsakennak ti Agriingkayo!, isu a mariknak a maseknankayo kadagiti tattao a kas kaniak. Maragsakan ken agyamanak unay agsipud ta addakayo a mangipalagip kaniak a “makapnek ti biag”!

P. T., Madagascar

Dagiti Peregrino ken Puritano—Siasinoda? (Pebrero 2006) Masuronak kadagiti pammadakes daytoy nga artikulo. Adda napateg a makagapu no apay a dagiti Indian iti Amianan nga America saanda a ramrambakan ti piesta a Thanksgiving, ngem kinalubanyo dagiti kinapudno.

Saanna nga insurat ti naganna, Estados Unidos

Sungbat ti “Agriingkayo!”: Pangngaasiyo ta usigenyo a ti panggep daytoy nga artikulo ket saan a tapno detalyado nga ilawlawag ti pakasaritaan ti Thanksgiving Day. Sigun iti nadumaduma a reperensia, agraman iti “Encyclopædia Britannica,” idi otonio ti 1621, rinambakan dayta dagiti Peregrino iti tallo nga aldaw a kaduada dagiti gagayyemda nga Indian. Naisalaysay daytoy iti surat ni Edward Winslow, a napetsaan iti Disiembre 11, 1621. Nupay kasta, kadagiti simmaruno a tawen, dagiti panangrambak a nainaig iti Thanksgiving ket naitultuloy agpaay iti amin a pasamak malaksid iti panagani. Ti kadaksan ti pakasaritaanna a panangrambak iti “thanksgiving” ket impakaammo ni Gobernador John Winthrop iti Massachusetts Bay Colony idi 1637 kalpasan ti pannakamasaker ti ginasut a Pequot Indian. Dayta ti gapuna a maawatanmi no apay a masuron ti dadduma nga agbasbasa maipapan iti Thanksgiving Day.