Manipud Kadagiti Agbasbasa

Agimtuod Dagiti Agtutubo . . . Apay a Rumbeng nga Agbasaak? (Mayo 2006) Agtawenak iti 15, ket nakatulong unay kaniak daytoy nga artikulo. Intugotko daytoy a magasin idiay eskuelaan, ket nakita dayta ti maestrak. Bayat ti klasemi, nasaona ti maipapan kadagiti ugali iti panagbasa ket impakitana ti Agriingkayo! kadagiti kaklasek. Imbagana a nagustuanna unay ti artikulo, isu nga isingasingna a basaen koma dayta dagiti amin a kaklasek.

D.A.C., Brazil

Iti napalpalabas, masansan a ti laeng basaek ket dagiti artikulo kadagiti magasin a magustuak. Itan, pagregreggetak a basaen ti tunggal artikulo, uray no iti damo ket kasla saan a makapainteres kaniak. Naammuak a dandani kanayon nga agbalin a paboritok dagita a partikular nga artikulo. Pagyamanan unay.

E. G., Estados Unidos

Naragsakanak a nakaammo nga adda dagiti agtutubo ita a kas idi kaniak. Nabautisaranak idi agtawenak iti 14 ket agtawenak itan iti 40. Sakbay la unay ti panagbautisarko, inyugalik met ti agbasa iti adu a panid Ti Pagwanawanan wenno Agriingkayo! iti tunggal aldaw. Patiek a gapu iti dayta a nakayugaliak, awan pay ti nalibtawak nga artikulo isu a kanayon a mapabpabileg ti espiritualidadko.

S. O., Japan

Ni Michael Servetus—Nagsolsolo a Nagsapul iti Kinapudno (Mayo 2006) Pagyamanan iti daytoy makaisuro nga artikulo. Naparegtaak unay a mangitultuloy a mangikasaba ken mangidepensa iti nagan ni Jehova.

M. R., Brazil

Ammo ti kaaduan a ni Servetus ket prominente a tao iti tay-ak ti medisina. Nupay kasta, impalgak ti artikulo ti dadduma pay a nagsayaat a paset ti personalidad daytoy nga eskolar, kas iti kinapasnekna ken panagbirokna iti kinapudno. Pagyamanan iti panangipablaakyo iti dayta nga artikulo.

M. J., Espania

Nakatulong ti Panangipangag Kadagiti Pakdaar (Hunio 2006) Nagsayaat ti agbalin a paset ti naayat nga organisasion ni Jehova. Kayatko nga iyebkas ti naimpusuan a panagyaman kadagiti amin a kakabsat a timmulong a nangtarimaan iti balayko, a nakaro ti pannakadadaelna gapu iti Bagyo a Katrina. Ita, maysa daytan a pagtaengan a napno iti ayatda.

I. F., Estados Unidos

Seda—“Ti Reyna Dagiti Linabag” (Hunio 2006) Sipud pay idi ubingak, pinampanunotkon no kasano ti pannakaaramid ti seda. Anian a ragsakko idi nakitak daytoy nga artikulo iti Agriingkayo! Talaga a nagustuak dayta ken talaga a pinaunegna ti panangapresiarko kadagiti parsua ni Jehova.

A.C.L., Brazil

Dagiti Kangrunaan a Pakailasinan ti Makapapatay a Melanoma (Hunio 8, 2005) Babaen ti panangusarko kadagiti de kolor a ladawan iti daytoy nga artikulo, nasukimatko ti bagik ket natakuatak nga adda nangisit a limteg iti kudilko nga idi naeksamen ket maysa gayam a makapapatay a melanoma. Naimbag laengen ta naikkat dayta babaen ti operasion bayat a saan pay unay a nakaro. Agyamanak unay ken Jehova gapu iti dayta a praktikal a material.

K. N., Japan