Manipud Kadagiti Agbasbasa

Agimtuod Dagiti Agtutubo . . . Adda Kadi Sakitko a Nainaig iti Pannangan? (Oktubre 2006) Naldaangak kalpasan a nabasak daytoy nga artikulo. Nabayagen a makidangdangadangak iti sakitko a nainaig iti pannangan. Babaen daytoy nga artikulo, nariknak a rumbeng a naparmekko koman daytoy idi ubingak pay. Nupay kasta, agingga ita, sagsagabaek pay laeng daytoy a sakit isu a panagriknak, imposiblen a maparmekko daytoy. Kas man la ibagbaga ti artikulo a kabaelan ti maysa a tao parmeken dayta babaen laeng iti napigsa a pammatina.

J. J., Estados Unidos

Sungbat ti “Agriingkayo!”: Nupay dagiti suheto a nailawlawag iti serye ti “Agimtuod Dagiti Agtutubo . . .” ket nairanta nga agpaay kadagiti agtutubo, dagiti prinsipio ti Biblia a linaon dagitoy nga artikulo ket agaplikar kadagiti amin a tattao aniaman ti edadda. Bigbigenmi a dagiti sakit a nainaig iti pannangan ket maysa kadagiti sakit a karirigatan a parmeken. Saan nga imbaga ti artikulo a kurang ti pammati dagidiay addaan iti saksakit a nainaig iti pannangan. Isingsingasingna laeng a dagiti addaan iti dayta ket mabalinda ti agkararag ken ni Jehova tapno umimbagda. Malaksid iti panagpakaasida iti Dios, naiparegta kadagiti biktima nga agpatulongda iti “ama wenno ina wenno dadduma pay a nataengan.” Kanayonanna, nalawag nga inadmitir dayta nga artikulo a “saan a nalaka ti umimbag” ken mabalin nga agsublinto manen dayta a sakitda. Gapu ta adun a tawen a makidangdangadangka iti dayta a sakitmo, kaipapananna a saanka a maaw-awanan iti namnama.

Agimtuod Dagiti Agtutubo . . . Ania ti Rumbeng nga Aramidek iti Biagko? (Hulio 2006) Agturposakton iti panageskuelak, isu a panawenen tapno iplanok ti biagko. Tinulongannak daytoy nga artikulo tapno agbalinak a mas determinado a mangragpat iti kalatko a sumrek iti amin-tiempo a serbisio. Awanen ti sabali a trabaho nga ad-adda a makagunggona ken makaparagsak ngem iti dayta.

H. W., Hong Kong

Agyamanak unay gapu iti dayta nga artikulo a nakatulong kaniak a mangamiris nga iti daytoy materialistiko a lubong, ti kasayaatan nga aramiden dagiti agtutubo ket ti panangipangpangrunada kadagiti naespirituan a kalat.

A. S., Brazil

Iti okupado ken inaldaw a panagbiagko, masansan a malipatak dagiti kalatko. Idi binasak daytoy nga artikulo, napabaro ti determinasionko a mangaramid iti amin a kabaelak nga agserbi ken Jehova. Pagyamanan unay iti pannakaseknanyo kadakami nga agtutubo.

E. M., Japan

No Kasano ti Mangbangon iti Naragsak a Panagasawa (Hulio 2006) Naisangsangayan dagitoy nga artikulo. Awanen ti nasaysayaat pay a pagarigan ngem ti panangusaryo iti maipapan ken Jesus ken iti panangtratona kadagiti apostolna tapno masursuro dagiti agassawa no kasanoda a tratuen ti maysa ken maysa. Itultuloyyo ti nasayaat a trabahoyo. Segseggaanmi dagiti binulan a suplaymi a magasin.

S. C., Estados Unidos

Nagbalin a Naragsak ti Awanan Idi iti Namnama (Hulio 2006) Kas ken ni Kabsat González, nariknak met a kasla saanak a maikari. Pampanunotek a dinak maayat ni Jehova, nangruna ta nakaaramidak idi iti basol. Anian a makaparegta a maammuan a naparabur, manangpakawan, ken managayat unay ni Jehova! Babaen ti nagadu a pammagbaga, naayat a panangandingay ti kongregasion, ken ti nasantuan nga espiritu ni Jehova, natulonganak nga agbiag maitunos kadagiti kinapudno iti Biblia. Pagyamanan iti dayta a naintiempuan a naespirituan a taraon.

T. A., Estados Unidos