Manipud Kadagiti Agbasbasa
Kanser ti Kudil—No Kasano a Masalaknibam ti Bagim (Hunio 8, 2005) Nagsayaat ti impormasion iti daytoy a serye. Siak ti panguluen dagiti doktor iti maysa a klinika a mangtamtaming kadagiti sakit ti kudil. Kayatko ti maaddaan iti sumagmamano a kopia tapno maiwarasko dagitoy.
K. W., Denmark
Gapu iti daytoy nga artikulo, inkeddengko nga ipaeksamen ti nagtubo iti bukotko. Imbaga ti doktor a mabalin nga agtungpal dayta a maysa a kita ti kanser a maawagan iti Bowen’s disease. Dagus nga impaoperak. Daytoy a serye ti nakatulong kaniak tapno agtignayak a dagus.
S. M., Japan
Gapu iti kahon iti panid 7, natignayak a mangipaeksamen iti doktor ti maysa a sidingko. Nadayagnos a malignant melanoma dayta nupay saan pay a nakaro. Kas iti impatuldo ti artikulo, no saan a nasapa a maagasan ti melanoma, makapapatay dayta. Agyamanak iti doktor ken iti daytoy a serye ti Agriingkayo!, a nalabit nangsalbar iti biagko!
L. S., Estados Unidos
Pagsasaritaan ti Pamilia (Mayo 8, 2005) Dagiti laeng artikulo a magustuak ti basbasaek idi, ngem kalpasan a nakitak ti “Pangrepaso nga Agpaay iti Pamilia,” binasak ti intero a magasin tapno masungbatak dagiti saludsod. Di nagbayag, inyugalikon a basaen ti intero a magasin!
Y. Z., Russia
Nagustuak daytoy a panid. Malaksid a makaparagsak, impaamirisna kaniak a rumbeng nga ad-adda nga utobek ti basbasaek!
D. S., Britania
Agimtuod Dagiti Agtutubo . . . Apay a Maallukoyak Kadagiti Tattao nga Addaan iti Dakes nga Impluensia? (Hulio 22, 2005) Kalpasan ti sangapulo a tawen a ‘kankanayon nga aduanak iti aramiden iti trabaho ti Apo,’ kaskasdi a diak ammo no kasano a balbaliwan daytoy a pakapilawak. (1 Corinto 15:58) Naamirisko a saan a nataengan ti emosionko, ngem diak ammo no kasano a tamingen ti parikut. Agyamanak ken Jehova kadagiti artikulo a kas iti daytoy, a makatulong kadakami nga agbiag iti daytoy nga agdama a sistema.
J. F., Estados Unidos
Iti daytoy nga artikulo, nadakamat a ‘saan nga interamente a laksiden dagiti tattao a di makaammo kadagiti kinapudno ti Biblia.’ Mabalin kadi nga ilawlawagyo a naimbag dayta? Kasano ngay no makisinninged ti maysa a Kristiano iti dina kapammatian? Saan aya a rumbeng a pakaseknantayo daytoy?
D. P., Estados Unidos
Sungbat ti “Agriingkayo!”: Saan a parparegtaen ti artikulo dagiti Kristiano a makisinninged kadagiti dida kapammatian. Kinapudnona, iti aniaman a kasasaad, agaplikar daytoy a prinsipio ti Biblia: “Dagiti dakes a pannakitimpuyog dadaelenda dagiti makagunggona nga ugali.” (1 Corinto 15:33) Ngem dina kayat a sawen nga interamente a laksidentayo dagiti ditay kapammatian. Kas impatuldo ti artikulo, parparegtaennatayo ti Biblia a ‘mangaramid iti naimbag iti amin’—saan laeng a kadagiti kapammatiantayo. (Galacia 6:10) Kinapudnona, ti Nakristianuan a ministeriotayo a mismo kalikagumanna a masapul a maaddaantayo iti napasnek nga interes kadagiti tattao, a padayawan ken raementayo ida. Nangipakita ni Jesus iti nasayaat a pagwadan iti daytoy a banag. Saan a pulos a nakisinninged kadagidiay madi a mangaramid iti pagayatan ti Dios. (Juan 15:14) Umasping iti dayta, inasitganna dagiti tattao ken ammona no kasano ti makisarita ken makilangen kadakuada. Nagbanaganna, naaddaan ni Jesus iti gundaway a mangasaba a sieepektibo. (Kitaenyo, kas pagarigan, ti salaysay iti Lucas 7:36-50.) Kas ken Jesus, mabalintay a taginayonen ti mararaem a kababalin kadagiti ditay kapammatian. Ti panggeptayo ket ‘agbalintayo a nainkalintegan, nga ipakitatayo ti isuamin a kinaalumamay iti amin a tattao.’—Tito 3:2.