Dagiti Willow—Pamilia ti Kayo nga Adu ti Pakausaranna
BABAEN ITI MANNURAT TI AGRIINGKAYO! IDIAY CZECH REPUBLIC
TI MAYSA a kita ket narapis ken nakarangranga ti kinatayagna, idinto ta nakarukob ti sabali. Ngem nupay agsupadi ti langada, kinaagpaysuanna, asideg nga agkabagianda. Ania ngamin aya dagitoy? Dagiti kayo—ti alamo (poplar) ken ti weeping willow. Agpadada a kameng ti pamilia ti willow (sause wenno karawawe).
Dagiti kayo a willow ket masansan a makita iti igid dagiti karayan ken ababaw a waig. Ditoy Czech Republic, adda dagitoy kadagiti sarebseb, a nagbiit a dumakkelanda nupay babassitda la idi a buyboy. Dagiti willow ket tumayag agingga iti nasurok a 30 a metro. Mabalin nga arintiddog dagiti bulongda ken makaay-ayo ti panaguyaoyda manipud kadagiti atiddog ken nararapis a sangada. Wenno mabalin nga akaba dagiti bulongda a kas kadagiti bulong ti shining willow ken pussy willow.
Nupay nasurok a 350 ti kita ti willow ken alamo, adda maysa a makapainteres unay—ti weeping willow. Agdinamag ti sabali pay a kita, a maawagan iti goat willow, gapu iti burboran a nagririmmuok a sabongna, wenno catkin, nga agbusel sakbay nga agsaringit dagiti bulongna. No agsaringit dagitoy nagbabassit a rimmuok, asideg kanon ti primavera.
Dakkel a Pamilia
Gagangay nga adu ti puon ti alamo iti Bohemia, ti rehion nga ayan ti Prague, ti kabesera ti Czech. Adda di kumurang a 35 a kita ti alamo, nga amin dagitoy ket kameng ti pamilia ti willow. Nalabit ti gagangay a kita ti alamo ket ti maawagan iti black poplar, a masansan a masarakan iti igid dagiti waig ken kadagiti nadam-eg a kakaykayuan ti Bohemia. Ti maysa a kita ti black poplar, a pagaammo kas ti Lombardy, wenno Italian poplar, ket addaan iti narapis a puon ken tumudo iti ngato a sangsanga nga agtubo iti kadakkelan a paset ti puon daytoy a kayo. Daytoy nagpintas a kayo ket mabalin a makadanon iti kangato a 35 a metro, ti katupag ti 11 ti kadsaaranna a pasdek! Kadagiti igid ti kalsada, masarakan met dagiti Italian poplar a mangpappapintas iti buya iti away nangruna no otonio, inton nakaduyduyawen dagiti bulongda.
Dagiti aspen ket maysa met a kita ti alamo. Nababada ken saan a naraber dagiti aringgawisda. Adda sabali a naiduma a kalidad dagiti aspen—agkuyegyeg dagiti bulongda uray mapul-oyan laeng.
Dagiti Ngay Willow iti Biblia?
Mabalin a diyo ipagarup a ti puon ti alamo ket agtubo met uray iti deppaar ti abagatan a kas iti Makintengnga a Daya. Nupay kasta, inladawan ti Biblia dagiti Israelita a mangibitbitin kadagiti arpada kadagiti puon ti alamo idi naidestieroda idiay Babilonia. (Salmo 137:2) Apay a kasta ti inaramidda? Nupay ti arpa ket maysa nga instrumento nga us-usarenda nga agdayaw iti Dios, awanen ti gaganaygayan dagiti Israelita a mangtokar kadagita gapu iti kinalidayda idi tiempo ti rigatda. (Isaias 24:8, 9) Ti Sao ti Dios deskribirenna met ti alamo kas maysa kadagiti kayo a dagiti sangana ket naanamongan a mausar iti panagaramid kadagiti abong-abong bayat ti Piesta ti Panagurnong. (Levitico 23:40) Ti Job a libro ti Biblia inladawanna met ti natured a hipopotamo nga agnanaed kadagiti waig ken kinunana a “dagiti alamo ti naapres a ginget palikmutanda dayta.”—Job 40:22.
Ita, agpadpada a maus-usar dagiti alamo ken willow iti nadumaduma a pangnegosio a produkto. Dagiti alamo ket gagangay a maus-usar a pagaramid iti naingpis a kayo, plywood, crate, kahon, ken nadumaduma a produkto a papel. Maipatpateg met ti puon ti willow gapu iti adu a pakausaranna. Dagiti nalap-it a sangana ket maaramid kas nalaga a basket ken muebles. Talaga a ti willow ket pamilia dagiti kayo nga adu ti pakausaranna!
[Ladawan iti panid 10]
Bulbulong ti aspen
[Ladawan iti panid 10]
Weeping willow
[Ladawan iti panid 10]
Lombardy poplar
[Ladawan iti panid 10]
Goat willow
[Ladawan iti panid 10]
Black poplar