SAUSE

[Heb., tsaph·tsa·phahʹ].

Iti Hebreo, ti nagan daytoy a kayo ket katupag ti Arabiko a safsaf, a tumukoy iti kayo a sause. Adda dua a kita ti sause nga agtubtubo idiay Israel; ti maysa ket naawagan iti botaniko a termino a Salix alba, ngem ti kadawyan unay isu ti Salix acmophylla.

Daytoy Hebreo a sao ket agparang laeng iti Ezequiel 17:5, a sadiay ti simboliko a “bin-i ti daga” a nabatad a tumukoy ken Zedekias ket piguratibo nga immula ti ari ti Babilonia kas “sause iti igid ti nakalawlawa a dandanum.” Masarakan dagiti kayo a sause iti ig-igid dagiti karayan ken ababaw a waig ken iti dadduma pay a nabasa a disso, a nalaka a pagsaringitan dagiti nasigpat wenno naguped a sanga ket napardas ti idadakkelda. Ti katayagda ken saan a kas kadagiti kayo nga alamo no di ket agtuboda kas nababa wenno babassit a kaykayo. Masansan a buklenda dagiti kasamekan iti igid ti pagay-ayusan ti danum. Ti pintasda ket adda iti akikid nga atiddog a bulbulongda, a singangayed nga agbitbitin kadagiti nakuttong a sanga.