Ti Chukar—Ganggannaet iti Paraiso
SEGSEGGAANMI nga aggagayyem ti panagpasiarmi idiay Maui nga isla ti Hawaii. Kangrunaan a kayatmi a makita ti isisingising ti init manipud iti tuktok ti bulkan a Haleakala, a 3,055 a metro ti kangatona. Naammuanmi a maysa dayta a naidumduma a kapadasan. Ngem tapno mapadasanmi dayta, masapul nga agriingkami iti alas dos ti parbangon ket agbiahekami iti isla manipud Kapalua a pagdagdagusanmi. Kalpasanna, aglugankami a sumang-at iti nangato a bantay. Impagarupmi no makapaliday ti nakasapsapa a panagbiahe. Ngem saan a pulos! Karamankami iti grupo dagiti lugan a siiinayad a nagbiahe iti agsiksikko a kalsada nga agturong iti tapaw ti bantay. Idi nakadanonkami, medio nalam-ek. Ngem adda dagiti intugotmi a naimeng nga ules.
Ginasut a tattao ti siaanus a nangur-uray iti isisingising ti init iti alas sais. Magagaran unayen ti amin ken nakapueston dagiti kamera tapno maretrato dayta makapaamanga a buya. Pagammuan ta idi orasen ti isisingising ti init, nadismayakami a makakita iti napuskol nga ulep nga agturturong iti wangawangan ti bulkan, isu a napaaykami a mangretrato iti nagpintas a buya! Ngem talaga met ketdi a naulep iti kabambantayan nga asideg iti Taaw Pacifico. Isu nga awan maaramidanmi no di akseptaren dayta ket urayenmi laengen a mapukaw dagiti ulep babaen ti bara ti sumingsingising nga init. Ngem adda manen napasamak a dimi ninamnama! Nangrugin a makitami ti nagpintas a buya iti aglawlaw ti wangawangan ti bulkan a pakairamanan ti agsasanga a desdes dagiti agpaspasiar iti dayta. Saan a nasayang ti amin.
Pagammuan ta kellaat a nakangngegkami iti karkarna nga uni—ti agsasaruno a panagkekkek nga agngudo iti uni a “chuKAR, chuKAR.” Kalpasanna, nakitami ti makin-uni iti dayta—ti chukar, maysa a nagpintas a tumatayab ti Eurasia manipud iti pamilia dagiti tukling a ti Latin a naganna ket Alectoris chukar. Kaaduanna nga agtalinaed dayta iti takdang kas pagaponanna bayat ti tiempo ti panagpaaduda. Saan a timmayab no di ket timmaray nga immadayo.
Kasano a nakadanon daytoy a kita ti tumatayab iti paraiso nga isla ti Maui? Nalawag a naipan sadiay dagiti chukar. Iti kontinente ti Amianan nga America, mapapaadu ken matartaraken dagitoy sada maibulos inton agangay tapno anupen ti tattao. Uray kaskasano, nariknami a naaddaankami iti naisangsangayan a gundaway a mamingmingan daytoy medio naatap a tumatayab.—Naipatulod.