Ti Panangmatmat ti Biblia

Naikeddeng Kadi a Nasaksakbay ti Biagmo?

Iti maysa nga agsapa, agturturong iti trabahoda ti dua a lallaki idi napanunotda ti manglinteg iti lugar a sigud a pagnanaedan ti maysa kadakuada. Iti dalanda, nakitada ti gumilgil-ayab nga apuy iti tawa ti maysa a balay. Insardengda ti trakda ket inusarda ti agdan nga tugotda tapno isalakan ti maysa nga ina ken ti lima nga annakna. “Nalabit gasat dayta,” kinuna ti diario a nangipadamag iti insidente.

ADU a tattao ti mamati nga aniaman ti mapasamak kadakuada, naimbag man wenno dakes, inkeddengen dayta ti maysa a puersa a nabilbileg ngem kadakuada. Kas pagarigan, nagsurat ti maika-16 a siglo a Repormador a ni John Calvin: “Dayta ti nasaksakbay a panangikeddeng ti Dios iti kayatna a pagtungpalan ti tunggal tao. Dina pinarsua nga agpapada ti kasasaad ti amin a tattao, no di ket nasaksakbay nga inkeddengna nga agbiag nga agnanayon ti dadduma ket ti dadduma madusada iti agnanayon.”

Talaga kadi nga inkeddeng ti Dios a nasaksakbay no anianto ti pagtungpalantayo? Ania ti isursuro ti Biblia?

No “Nainkalintegan” ti Nasaksakbay a Pannakaikeddeng

Kastoy ti panagrason ti dadduma a mamati a nasaksakbay nga inkeddeng ti Dios ti pagbanagan ti tao: Ti Dios ammona ti amin a banag, uray ti mapasamak iti masanguanan. Ammona no ania ti aramiden ti tunggal tao iti biagna, ken ammona met ti eksakto a kanito ken pamay-an ti ipapatay ti tunggal tao. Isu nga iti panangmatmatda, nasaksakbay nga ammo ken inkeddeng ti Dios ti aniaman a desision nga aramiden ti maysa. Ta no saan, kasano koma a makuna nga ammo ti Dios ti amin? Iti panagkunam, nainkalintegan kadi daytoy a panagrasrason? Usigem no ania a talaga ti pagbanagan daytoy a kita ti panagrasrason.

No adda puersa a nangikeddeng iti masanguanam, awan mamaay ti panagannadmo. Agsigarilioka man wenno saan, awan epekto dayta iti salun-atmo wenno iti salun-at dagiti annakmo. Awan ti kinatalged nga ipaay ti panangusar iti seat belt no agluganka. Ngem saan nga umiso dayta a panagrasrason. Ipakita dagiti rekord nga ad-adayo iti didigra dagiti tattao nga agan-annad. Ti saan a panagannad agbanag iti ipapatay.

Usigem ti sabali pay a panagrasrason. No pinili ti Dios nga ammuen a nasaksakbay ti isuamin, ammona ngarud nga agsukir da Adan ken Eva sakbay pay a pinarsuana ida. Ngem idi imbaga ti Dios ken Adan a saan a rumbeng a mangan “iti kayo ti pannakaammo iti naimbag ken dakes” ta di bumurong a matay, ammo kadin ti Dios a mangan ni Adan iti dayta? (Genesis 2:16, 17) Idi imbaga ti Dios iti umuna nga agassawa: “Agbungakayo ken agadukayo ket punnuenyo ti daga ken parukmaenyo, ket pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga,” ammona kadi a ti nagsayaat a namnamada nga agbiag iti paraiso ket naikeddengen a mapaay? Siempre saan.—Genesis 1:28.

No usigentayo ti kaipapanan ti kapanunotan nga ammo ti Dios a nasaksakbay ti amin a desision, isu ngarud ti mapabasol kadagiti amin a mapasamak—agraman dagiti gubat, panangilupitlupit, ken ti panagsagaba. Ngem umiso kadi dayta? Nalawag ti sungbat no amirisentayo ti ibaga ti Dios a mismo maipapan kenkuana.

‘Masapul nga Agpilika’

Ibaga ti Kasuratan a “ti Dios ket ayat” ken isu “managayat iti kinahustisia.” Kankanayon a pinaregtana ti ilina: “Guraenyo ti kinadakes, ket ayatenyo ti naimbag.” (1 Juan 4:8; Salmo 37:28; Amos 5:15) Iti adu a gundaway, indagadagna kadagiti nasungdo kenkuana a pilienda ti nalinteg a wagas ti biag. Kas pagarigan, idi nakitulag ni Jehova iti nagkauna a nasion ti Israel, kinunana kadakuada babaen ken Moises: “Aramatek ti langlangit ken ti daga kas saksi maibusor kadakayo ita nga aldaw, nga inkabilko ti biag ken patay iti sangom, ti bendision ken ti lunod; ket masapul a piliem ti biag tapno makapagtalinaedka a sibibiag, sika ken ti putotmo.” (Deuteronomio 30:19) Nasaksakbay kadin nga inkeddeng ti Dios no ania ti pilien dagiti indibidual? Nalawag a saan.

Ni Josue, a pangulo ti ili ti Dios idi un-unana, pinaregtana dagiti kailianna: “Agpilikayo ita nga aldaw maipaay iti bagbagiyo no siasino ti pagserbianyonto . . . Ngem no maipapan kaniak ken iti sangakabbalayak, agserbikamto ken Jehova.” (Josue 24:15) Kasta met, kinuna ni Jeremias a propeta ti Dios: “Agtulnogka, pangngaasim, iti timek ni Jehova iti banag a sasawek kenka, ket aglak-amkanto iti naimbag, ket ti kararuam agtultuloyto nga agbiag.” (Jeremias 38:20) Ti kadi nalinteg ken naayat a Dios paregtaenna dagiti tattao nga agaramid iti naimbag ken manginanama a magunggonaanda no ammona a naikeddengen a mapaayda? Saan. Kinamanaginsisingpet ti kasta a pammaregta.

Isu a no adda mapasamak a naimbag wenno dakes iti biagyo, saan a gapu ta naikeddeng dagitoy a nasaksakbay. Masansan a dagiti “di mapakpakadaan a pasamak” ket resulta laeng ti pangngeddeng ti dadduma a tattao—nainsiriban man dagitoy wenno saan. (Eclesiastes 9:11) Wen, saan a naikeddeng a nasaksakbay ti masanguanam, ket sika a mismo ti mangikeddeng no anianto ti agnanayon a masakbayam.

ANIA TI MAKUNAM?

◼ Nasaksakbay kadi nga inkeddeng ti Dios ti panagbasol da Adan ken Eva?—Genesis 1:28; 2:16, 17.

◼ Ania dagiti galad ti Dios a mangipakita a saanna nga inkeddeng a nasaksakbay ti mapasamak iti maysa a tao?—Salmo 37:28; 1 Juan 4:8.

◼ Ania ti rebbengem a mismo?—Josue 24:15.

[Blurb iti panid 13]

Ipakita dagiti rekord nga ad-adayo iti didigra dagiti tattao nga agan-annad