4
Ilawlawagyo Dagiti Regulasion ti Pamilia ken Dagus nga Ipaannurotyo
Apay a nasken dayta? Kastoy ti kuna ni Ronald Simons, maysa a sosiologo iti University of Georgia: “Kinapudnona, nasaysayaat ti banagen dagiti ubbing no nalawag kadakuada ti regulasion agraman dagiti kakuyogna a disiplina. No awan dagita, agbalinda a nabangad, managimbubukodan, ken naalidunget ket pagbalinenda met a miserable dagiti sabsabali.” Nabatad ti kuna ti Sao ti Dios: “No ay-ayatem [ti annakmo], disiplinaam.”—Proverbio 13:24, Ti Baro a Naimbag a Damag Biblia.
Ti karit: Kasapulan ti tiempo, panagregget, ken kinapinget tapno maipaawat ken maipaannurotyo kadagiti annakyo dagiti nainkalintegan a pagbeddengan a mangiwanwan iti kababalinda. Maysa pay, adda pagannayasan dagiti annak a mangsubok kadagita a pagbeddengan. Dayta a karit ket siuumiso a dineskribir da Mike ken Sonia, nga addaan iti dua nga annak: “Nupay ubbingda pay, adda bukoddan a panunot ken tarigagay ken naisigud a pagannayasan nga agbasol.” Dungdunguen unay dagitoy a nagannak dagiti annakda. Ngem aklonenda, “No dadduma, nasulpeng ken managimbubukodan dagiti ubbing.”
Ti solusion: Tuladenyo ti panangtrato ni Jehova iti nasion ti Israel. Ti maysa a pamay-an nga impakitana ti panagayatna iti ilina isu ti panangilawlawagna kadagiti linteg a masapul a tungpalenda. (Exodo 20:2-17) Imbalabalana dagiti pagdaksan ti isusukirda kadagita a linteg.—Exodo 22:1-9.
No kasta, apay a diyo ilista dagiti paglintegan iti pamilia, wenno regulasion a rumbeng a pagtulnogan ti annakyo? Isingasing ti dadduma a nagannak a sumagmamano laeng ti ilistayo, nalabit lima laeng. Ti ababa a listaan dagiti praktikal a regulasion iti pagtaengan ket nalaklaka a tandaanan ken ipatungpal. Isuratyo met dagiti katupag a pannusa ti pananglabsing kadagita. Siguraduenyo a nainkalintegan dagita ken talaga a maipatungpalda. Regular a repasuenyo dagiti regulasion tapno dakayo amin, agraman dakayo nga ama ken inada, ammoyo no ania a talaga ti manamnama kadakayo.
No simmukirda, ipatungpalyo a dagus dagiti pannusa a sikakalmado, sititibker, ken di agbaliwbaliw. Laglagipenyo: No makaung-ungetkayo, agkalmakayo pay sakbay a mangdisiplinakayo. (Proverbio 29:22) Nupay kasta, diyo itantan ti disiplina. Dikay makikompromiso. Ta no saan, ipapanto ti anakyo a mabalinna a tagilag-anen dagiti regulasion. Umasping dayta iti kunaen ti Biblia: “Agsipud ta ti sentensia a maibusor iti dakes nga aramid saan a naipakat a sipapardas, dayta ti makagapu a ti puso ti annak ti tattao naan-anay a naitampok kadakuada tapno aramidenda ti dakes.”—Eclesiastes 8:11.
Iti ania pay a pamay-an a maipakatyo ti autoridad a pakagunggonaan ti annakyo?
[Blurb iti panid 6]
“Ti koma latta saoyo a Wen kaipapananna ti Wen, ti saoyo a Saan, Saan.”—Mateo 5:37