No Kasano a Masarakan ti Pudno a Relihion

‘No adda kinapudno manipud iti Dios, apay a masapul a birokek dayta?’ kuna ti dadduma. ‘No adda napateg a mensahe ti Dios agpaay iti sangatauan, saan kadi a silalawag nga ibagana tapno dagus a maammuan dagiti tattao ket din masapul nga agsukimatda?’

PUDNO, kabaelan ti Dios nga aramiden dayta. Ngem kasta kadi ti kayatna a pamay-an a pannakaipakaammo iti kinapudno?

No Kasano nga Impakaammo ti Dios ti Kinapudno

Kayat ti Dios nga agsukimat dagiti napasnek nga agsapsapul iti kinapudno tapno maammuanda ti mensahena. (Salmo 14:2) Usigem ti mensahe ti Dios nga impakaammo ni propeta Jeremias adun a siglo ti napalabas. Maipapan dayta iti umay a panangdadael dagiti taga-Babilonia iti Jerusalem ken agpaay iti nasukir nga ili ti Dios.​—Jeremias 25:8-11; 52:12-14.

Nupay kasta, dadduma idi a mammadto ti agkuna a mensahe ti Dios ti ipakpakaammoda. Ni Hananias impadtona nga adda talna iti Jerusalem. Naiduma unay dayta iti mensahe ni Jeremias. Asino ngarud ti patien idi ti maysa a tao​—ni Jeremias wenno dagiti sumupsupiat kenkuana?​—Jeremias 23:16, 17; 28:1, 2, 10-17.

Tapno maammuan dagiti napasnek a Judio no asino ti patienda, masapul a maam-ammoda ni Jehova kas maysa a persona. Masapul a maawatanda dagiti linteg ken prinsipiona, agraman ti panangmatmatna iti kinadakes. No kasta ti aramidenda, nalabit umanamongda kadagiti sasao ti Dios nga imbaga ni Jeremias nga “awan maysa a tao a nagbabawi iti kinadakesna.” (Jeremias 8:5-7) Maysa pay, maawatanda a daytoy nakalkaldaang a kasasaad ket awan maipaayna a pagimbagan iti Jerusalem ken kadagiti umilina.​—Deuteronomio 28:15-68; Jeremias 52:4-14.

Pimmayso dagiti padto ni Jeremias maipapan iti Jerusalem. Dinadael dagiti taga-Babilonia ti Jerusalem idi 607 K.K.P.

Nupay nabayagen a naipadto ti pagbanaganda no agsukirda, masapul nga ikagumaanda idi nga ilasin a dimtengen ti tiempo a panagtignay ti Dios.

Ti Ngay Mensahe ni Kristo?

Komusta met ti kinapudno nga impakaammo ni Jesu-Kristo? Nailasin ngata ti amin a tao a ti mensahena ket naggapu iti Dios? Saan. Uray pay no mangisursuro ken agar-aramid ni Jesus kadagiti milagro iti tengnga ti Israel, saan a nailasin ti kaaduan kadagiti dumdumngeg kenkuana nga isu ti naipadto a Mesias​—ti Kristo, wenno Napulotan.

Imbaga ni Jesus kadagiti Fariseo a nagdamag no kaano nga umay ti Pagarian ti Dios: “Ti pagarian ti Dios saan nga umay a buyogen ti nakadkadlaw a pannakapaliiw.” Innayonna pay: “Ti pagarian ti Dios adda iti tengngayo.” (Lucas 17:20, 21) Adda iti tengngada ti agturay a dinutokan ti Dios, ni Jesus! Ngem dagiti Fariseo dida kayat a bigbigen ti ebidensia a tungtungpalenna dagiti padto maipapan iti Mesias ken dida patien nga isu “ti Kristo, ti Anak ti sibibiag a Dios.”​—Mateo 16:16.

Kasta met laeng ti reaksion dagiti tattao maipapan iti kinapudno nga impakaammo dagiti adalan ni Kristo idi umuna a siglo. Nupay nakatulong dagiti milagro a mangipakita a tultulongan ti Dios dagiti adalan, ti kinapudno ket saan pay laeng a mailasin ti kaaduan. (Aramid 8:1-8; 9:32-41) Imbaon ni Jesus dagiti pasurotna a ‘mangaramid iti ad-adalan kadagiti tattao’ babaen ti panangisuroda kadakuada. Babaen ti panagimdeng ken panangadal kadagiti Nainkasuratan a kinapudno, nagbalin a manamati dagiti napasnek nga agsapsapul iti kinapudno.​—Mateo 28:19; Aramid 5:42; 17:2-4, 32-34.

Kasta met laeng ita. Ti ‘naimbag a damag ti pagarian maikaskasaba iti intero a mapagnaedan a daga maipaay a pangsaksi kadagiti amin a nasion.’ (Mateo 24:14) Saan a masapul a maaramid daytoy “buyogen ti nakadkadlaw a pannakapaliiw”​—a nalawag a mailasin dayta ti tunggal tao kas mensahe a naggapu iti Dios. Nupay kasta, posible a magun-odan ti kinapudno a naggapu iti Dios ken mailasin dayta dagiti nasingpet nga indibidual a mayat nga agdayaw iti Dios iti pamay-an nga anamonganna.​—Juan 10:4, 27.

Ti panagbasam iti magasin a naibatay iti Biblia ipakitana a sipapasnek a birbirokem ti kinapudno. Kasano a maammuam no ania a relihion ti mangisursuro iti kinapudno?

Ti Epektibo a Pamay-an

Pinadayawan ni apostol Pablo ti dadduma a taga-Berea idi umuna a siglo gapu iti wagas ti panagtignayda iti insurona kadakuada. Saanda a dagus nga inawat ti imbaga ni Pablo a kinapudno; ngem siraraem a nagimdengda. Makaadaltayo kadagiti taga-Berea kalpasan a nangngegda ti mensahe.

Kastoy ti kuna ti Biblia: “Ita dagiti [taga-Berea] nataktakneng ti panagpampanunotda ngem kadagiti adda idiay Tesalonica, ta inawatda ti sao buyogen ti napalalo unay a kinagagar ti panunot, a siaannad a suksukimatenda ti Kasuratan iti inaldaw no agpayso dagitoy a banag. Gapuna, adu kadakuada ti nagbalin a manamati.” (Aramid 17:10-12) No kasta, saan a parparawpaw ti panagsukimatda. Saanda a namati a dagus iti maysa wenno dua laeng nga apagbiit a pannakisaritada kenni Pablo.

Makitatayo met nga “inawatda ti sao buyogen ti napalalo unay a kinagagar ti panunot.” Ipakita daytoy no ania ti panangmatmatda iti panangadalda iti Kasuratan. Saanda a nalaka a mamatpati, ngem saanda met a managduadua. Saanda a binabalaw ti inlawlawag ni Pablo, maysa a tao a pannakabagi ti Dios.

Usigentayo met: Damo a mangngeg dagiti taga-Berea ti maipapan iti Kristianidad. Nasayaat, ngem kasla di nakappapati. Ngem imbes nga inlaksidda, siaannad a sinukimatda ti Kasuratan tapno kitaenda ‘no agpayso dagiti ibagbaga ni Pablo.’ Makitatayo met a nagbalin a manamati dagiti taga-Berea ken taga-Tesalonica a sipapasnek a nagsukimat. (Aramid 17:4, 12) Saanda a naupay ken dida pinanunot a saan a masarakan ti kinapudno. Nailasinda ti pudno a relihion.

No Ania ti Epekto ti Kinapudno Kadagiti Tattao

No maammuan ti maysa a tao ti kinapudno, kas kadagiti taga-Berea, siraragsak nga iranudna dayta. Dadduma dida kayat nga iranud ti kinapudno ta pagarupenda a mabalin nga umiso met ti dadduma a relihion. Nupay kasta, no ti maysa a tao naammuanna ti kinapudno iti Biblia, patienna dayta. Ammona a magun-odan ti kinapudno ken ammona a saan nga amin a relihion ket agturong iti pannakaisalakan. Ngem tapno maammuan ti kinapudno, masapul ti napasnek a panagsukimat ken kinapakumbaba.

Nagsukimat dagiti Saksi ni Jehova isu a naammuanda ti pudno a relihion. Dayta ti makagapu nga awisendaka a mangsukimat iti Kasuratan tapno mailasinmo no asino ti mangal-alagad iti pudno a relihion ita. Nupay adda pay dadduma a masapul nga aramiden, mabalin a makatulong kenka ti pamay-an dagiti Kristiano idi umuna a siglo a masarakan iti naipakuyog a kahon iti daytoy a panid.

Babaen ti awanan bayad a pannakipagadal iti Biblia kadagiti Saksi ni Jehova, makaaramidka iti nauneg a panangsukimat no ania a talaga ti isursuro ti Biblia. No maammuam ti isursuro ti Biblia mabalin a mailasinmo ti pudno a relihion.

[Kahon iti panid 9]

Dagiti Pakailasinan ti Pudno a Relihion

Usigem dagiti aramid ken pannursuro dagiti Kristiano idi umuna a siglo:

◼ Nagpaiwanwanda iti Sao ti Dios.​—2 Timoteo 3:16; 2 Pedro 1:21.

◼ Insuroda a ni Jesus ti Anak ti Dios, a naiduma ken nababbaba ngem iti Dios.​—1 Corinto 11:3; 1 Pedro 1:3.

◼ Insuroda nga agungar ti natay.​—Aramid 24: 15.

◼ Nagdindinamag ti ayatda iti maysa ken maysa.​—Juan 13:34, 35.

◼ Saanda a nagdayaw a bukbukodda no di ket naorganisarda kadagiti kongregasion ken sangsangkamaysa nga indauluan ida dagiti manangaywan ken maysa a bagi dagiti panglakayen nga agpapaituray ken Jesus kas Ulo.​—Aramid 14:21-23; 15:1-31; Efeso 1:22; 1 Timoteo 3:1-13.

◼ Sireregta nga inkasabada ti Pagarian ti Dios kas ti kakaisuna a namnama ti sangatauan.​—Mateo 24:14; 28:19, 20; Aramid 1:8.

[Ladawan iti panid 7]

Kasano a maammuan dagiti tattao a ni Jeremias ti pudno a propeta, idinto ta busbusoren ti dadduma?

[Dagiti Ladawan iti panid 8, 9]

Dagiti taga-Berea idi umuna a siglo nagimdengda ken Pablo ngem kalpasanna, sinukimatda ti Kasuratan tapno masiguradoda no agpayso ti imbagana

[Ladawan iti panid 8, 9]

Ti naanep a panagadal iti Biblia ti makatulong kenka a mangilasin kadagiti kinapudno a rumbeng nga isuro ti pudno a relihion