Panangmatmat iti Lubong
◼ Iti maysa a surbey idiay Estados Unidos, “duapulo ket siam a porsiento dagiti lallaki ti nangibaga a nakidennada iti 15 wenno ad-adu pay a babbai iti unos ti panagbiagda, idinto ta 9% kadagiti babbai ti nangibaga a nakidennada iti 15 wenno ad-adu pay a lallaki iti unos ti panagbiagda.”—CENTERS FOR DISEASE CONTROL AND PREVENTION, E.U.A.
◼ Idiay Grecia, “62 a porsiento dagiti ubbing nga agtawen iti 16 wenno nababbaba ti nangaklon a nangikabilda iti pornograpiko a ladawan kadagiti cell phone-da.”—ELEFTHEROTYPIA, GRECIA.
◼ Idiay Britania, 82 a porsiento kadagiti tattao ti mangibilang iti “relihion kas puon ti panagsisina ken riribuk.”—THE GUARDIAN, BRITANIA.
Nagsakit ti Ulona iti 64 a Tawen
Kalpasan ti nasurok nga 60 a tawen a “kanayon a panagsakit ti ulona,” naammuan met laengen ti maysa a Tsino a babai ti makagapu kalpasan nga inikkat dagiti doktor ti tallo a sentimetro a bala iti ulona. Idi isu ket agtawen iti 13, napaltogan ti ulona bayat ti iraraut dagiti Hapones iti purok ti Xinyi County idi Setiembre 1943. Awan ti nakapanunot a dayta ti makagapu nga agsaksakit ti ulona. Idi simmansan ti panagsakit ti ulona, nagpa-X-ray ket nadiskobreda ti bala, sigun iti Xinhua News Agency. “Naimbagen” ti babai, nga agtawen itan iti 77.
Balyena a Napaut ti Biagna
Idi napapatay dagiti katutubo a mangngalap idiay Alaska ti maysa a bowhead a balyena idi 2007, nakitada ti patadem ken paspaset ti kadaanan a sabat a nakaduyok iti bagina. Dagitoy ket nailasin kas “dagiti paset ti maysa a bumtak a gayang a naaramid idiay New Bedford [Massachusetts, E.U.A.] idi arinunos ti 1800,” kuna ti The Boston Globe. Idi agangay, saanen a nausar ti kasta a kita ti gayang, isu a kinuna dagiti historiador iti New Bedford Whaling Museum a ti pannakaduyok ti balyena ket napasamak iti “nagbaetan ti agarup 1885 ken 1895.” Gapuna, ti balyena ket agtawen iti di kumurang a 115 idi napapatay. Kinuna ti Globe a ti nasarakan a paspaset ti kadaanan a gayang ket “ad-adda a mangpaneknek iti nabayagen a kapanunotan a ti bowhead a balyena ti maysa kadagiti kapautan ti biagna a mamalia ditoy daga, a makapagbiag agingga iti 150 a tawen.”
Napuskol a Bakir a Nagbalin a Fossil
Nadiskobre dagiti geologo ti maysa a naglawaan a bakir a nagabburan, ngem saan a narunot dagiti naraber a nagduduma ken naisangsangayan a mulmula iti dayta. Dadduma kadagita a mulmula, nga awan itan, ket agtayag iti nasurok nga 40 a metro. Daytoy naidumduma a bakir ket masarakan iti dalan ti pagminasan iti karbon idiay Illinois, E.U.A. Patien dagiti sientista a dayta a bakir ket limned iti daga gapu iti napigsa a ginggined. “Nakapimpintas unay dayta a bakir,” kuna ni Bill DiMichele, ti nangidaulo iti grupo dagiti managsirarak a nangadal iti dayta a bakir ken nangipadamag iti maipapan iti dayta. “Mabalintay nga iladawan iti panunottayo ti itsura dayta a bakir, a kasla magmagnatayo iti dayta.”
Panagkali iti Baak ken De Kalidad nga Arak
Umad-adu ti agbiahe tapno sumarungkarda idiay Macedonia, a dati a republika ti Yugoslavia, “tapno agkalida iti baak ken de kalidad nga arak a nabati . . . dagiti aliado a buyot bayat ti Gubat Sangalubongan I,” sigun iti pagiwarnak a Kathimerini—English Edition. Dagiti sumarsarungkar a kaaduanna ket naggapu idiay Francia, sinapulda dagiti nabaybay-an a pagipempenan ti militar babaen kadagiti awitda a mapa, sada kinali dagitoy. Aniaman nga arak a masarakanda ita sadiay ket agtawenen iti di kumurang a 90, ket sigun iti pagiwarnak, “ti arak iti maysa a di nadadael a botelia ket mabalin a mailako . . . iti agingga 2,000 a euro (agarup ₱117,700.00).” Kinuna dagiti lumugar a nakakali iti arak ken cognac a “dagita pay laeng ti kaimasan a naramananda nga arak.”