Nadisenio Kadi?

Ti Sippit ti Toucan

◼ Gapu ta saan unay a makatayab, ti toucan iti Sentral ken Abagatan nga America ket umakar kangrunaanna babaen ti panaglagto. Ti uni ti dadduma a kita ti toucan ket umarngi iti uni ti tukak, ngem napigpigsa dagitoy. Kinapudnona, mangngeg ti unina agingga iti kaadayo a maysa a kilometro iti kabakiran. Ngem ti nalabit a pagsidsiddaawan unay dagiti sientista maipapan iti toucan ket ti sippitna.

Usigem: Ti kaatiddog ti sippit ti dadduma a toucan ket nasurok a kakatlo ti kaatiddog dayta a tumatayab. Kasla nadagsen, ngem saan. “Ti kalupkopna ket naaramid iti keratin, ti isu met laeng a substansia a pakabuklan dagiti kuko ken buoktayo,” inlawlawag ti sientista a ni Marc André Meyers. “Buklen dayta ti adu a nagrurutap a naingpis a material nga innem ti sulina.”

Kasla natangken nga espongha ti sippit ti toucan. Nalungog ti dadduma a pasetna idinto ta ti dadduma ket buklen dagiti partikulo ken kulapot. Dayta ti makagapu a nalag-an ti sippitna ngem nakatibtibker. “Agparang nga adu ti ammo ti toucan mainaig iti mekanikal nga inhenieria,” kuna ni Meyers.

Gapu iti pakabuklan ti sippit ti toucan, natibker daytoy uray maidungpar iti natangken a banag. Patien dagiti sientista a ti sippit ti toucan ket mabalin a pagtuladan dagiti inheniero iti tay-ak ti panagpatayab ken industria ti lugan. “Dagiti material nga umarngi iti pakabuklan ti sippit ti toucan ket mabalin a nalaglagda a mangsalaknib kadagiti motorista no adda aksidente,” kuna ni Meyers.

Ania ti makunam? Naiparna laeng kadi ti nalag-an ngem nalagda a sippit ti toucan? Wenno nadisenio dayta?

[Diagram/Ladawan iti panid 17]

(Para iti aktual a pannakaurnosna, kitaem ti publikasion)

Nalungog a paset

Kasla espongha a pakabuklan