Nadisenio Kadi?
Ti Sippit ti Pusit
◼ Pagsidsiddaawan dagiti sientista ti sippit ti pusit. Pampanunotenda: Kasano ngata a maikapet ti nakatangtangken a banag iti bagi nga awan tulangna? Saan ngata a magasgasan ken masaktan ti pusit gapu iti dayta?
Usigem: Natangken ti murdong ti sippit ti pusit idinto ta nalukneng ti puonna. Ti mangbukel iti sippit ket protina, danum, ken chitin (natangken a banag nga umasping iti kuko ti tao). Ti kaadu ken kasedsed ti panaglalaok dagita ket in-inut nga agbalbaliw manipud iti nalukneng a puon agingga iti natangken a murdong ti sippit isu a saan a magasgasan wenno masaktan ti pusit no usarenna dayta.
Sigun ken Propesor Frank Zok iti University of California, ti panangadal iti sippit ti pusit “naan-anay a balbaliwanna ti kapanunotan dagiti inheniero maipapan iti panamagkakapet iti nadumaduma a materiales.” Ti maysa a potensial a pangusaran iti maadalda ket iti panagaramid kadagiti artipisial a saka ken ima. Ni Ali Miserez, a managsirarak iti isu met la nga unibersidad, pampanunotenna ti “mangaramid iti kompleto nga artipisial a paspaset ti bagi nga umasping iti pakabuklan ti sippit tapno ti puon dagita a maikapet iti bagi ket kas iti nalukneng a tulang” ken “ti murdongda ket nakasiksikkil ken nalagda.”
Ania ti makunam? Naiparna laeng kadi a timmaud ti sippit ti pusit a ti kaadu ken kasedsed ti panaglalaok dagiti mangbukel iti dayta ket agbalbaliw manipud iti nalukneng a puonna agingga iti natangken a murdongna? Wenno nadisenio dayta?
[Picture Credit Lines iti panid 9]
© Bob Cranston/SeaPics.com
© Richard Herrmann/SeaPics.com