Panangmatmat ti Biblia

Kayat Kadi ti Dios a Bumaknangka?

“Inikkannak ti Dios iti baro a namnama! Dandaniakon agbalin a milionario!”

“Kayatko ti bumaknang—gapu ta ti Dios ken dagiti anghel kayatda a bumaknangak.”

“Inikkannatayo ti Dios iti kapasidad a bumaknang.”

“Bumakbaknangak gapu iti Libro [ti Biblia].”

KASTA ti panangmatmat ti adu a relihion nga agkunkuna a pamendision ti Dios dagiti material a kinabaknang. Kunada a no aramidem ti umiso iti imatang ti Dios, gunggonaannaka iti material a kinabaknang ita ken iti masanguanan. Magustuan ti adu a tattao dayta a teolohia, ken nakaad-adu ti gumatang kadagiti libro a mangitantandudo iti kasta. Ngem maitunos kadi iti Biblia dayta a teolohia?

Kinapudnona, ti Namarsua kadatayo, a tinukoy ti Biblia kas “ti naragsak a Dios,” kayatna nga agbalin a naragsak ken naballigi ti biagtayo. (1 Timoteo 1:11; Salmo 1:1-3) Maysa pay, bendisionanna dagidiay mangaramid iti pagayatanna. (Proverbio 10:22) Ngem iti kaaldawantayo, material laeng kadi a kinabaknang ti pamendision ti Dios? Nalawag ti sungbat no matarusantayo ti paset ti tiempo a pagbibiagantayon sigun iti panggep ti Dios.

Tiempon ti Panagpabaknang?

Iti napalabas, pinabaknang ni Jehova a Dios ti sumagmamano nga adipenna a kas ken patriarka a Job ken ni Ari Solomon. (1 Ar-ari 10:23; Job 42:12) Ngem adu met nga adipenna ti nagpasar iti rigat ti biag, a pakairamanan ni Juan a Mammautisar ken ni Jesu-Kristo. (Marcos 1:6; Lucas 9:58) Ania ti punto? Sigun iti Biblia, makilangen ti Dios kadagiti adipenna maitunos iti panggepna kadakuada iti dayta a tiempo. (Eclesiastes 3:1) Kasano nga agaplikar ita kadatayo dayta a prinsipio?

Ipalgak ti padto ti Biblia nga agbibiagtayon iti “panungpalan ti sistema ti bambanag,” wenno ‘maudi nga al-aldaw’ ti agdama a lubong. Mailasin daytoy a tiempo babaen ti gubat, sakit, bisin, ginggined, ken pannakadadael ti kagimongan—dagiti pasamak a mangparparigat iti sangatauan sipud pay idi tawen 1914. (Mateo 24:3; 2 Timoteo 3:1-5; Lucas 21:10, 11; Apocalipsis 6:3-8) Iti ababa a pannao, nayarig daytoy a lubong iti barko a dandanin lumned! Gapu kadagita a kinapudno, nainkalintegan kadi pay laeng a pabaknangen ti Dios ti tunggal adipenna, wenno adda nasaysayaat nga aramidenna agpaay kadatayo?

Inkompara ni Jesu-Kristo ti panawentayo iti kaaldawan ni Noe. Kinuna ni Jesus: “Kas kadakuada kadagidi nga aldaw kasakbayan ti layus, a mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a simrek ni Noe iti daong; ket saanda a nangikankano agingga nga immay ti layus ket inyanudna amin ida, kastanto ti kaadda ti Anak ti tao.” (Mateo 24:37-39) Inkomparana met dayta iti kaaldawan ni Lot. Dagiti kalugaran ni Lot idiay Sodoma ken Gomorra ket ‘mangmangan, umin-inum, gumatgatang, aglaklako, agmulmula, ken agibangbangon.’ “Ngem iti aldaw a rimmuar ni Lot iti Sodoma nagtudo iti apuy ken asupre manipud langit ket dinadaelna ida amin,” kinuna ni Jesus, sa innayonna: “Kastanto met laeng iti dayta nga aldaw inton maipanayag ti Anak ti tao.”—Lucas 17:28-30.

Kinapudnona, awan dakesna ti mangan, uminum, makiasawa, gumatang, ken aglako. Ti dakesna ket no okupadotayo unay kadagita a bambanag a malipatantayo ti kinaganat ti tiempo. Gapuna, isaludsodmo iti bagim, ‘Mangipaay ngata ti Dios iti material a kinabaknang idinto ta ammona a mabalin a pakaigapuan dayta ti pannakasingatayo?’a Saan la ketdi! Saan nga aramiden dayta ti Dios ti ayat!—1 Timoteo 6:17; 1 Juan 4:8.

Tiempo Tapno Mangispal iti Biag!

Iti daytoy napeggad a tiempo iti pakasaritaan ti tao, adda naganat a trabaho ti ili ti Dios. Kinuna ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Ipappapuso dagiti Saksi ni Jehova dagita a sasao. Gapuna, paregtaenda dagiti kaarrubada a mangadal iti maipapan iti Pagarian ken kadagiti kalikaguman ti Dios agpaay iti agnanayon a biag.—Juan 17:3.

Ngem saan met a kayat ti Dios a paidaman dagiti matalek nga adipenna ti bagida. Imbes ketdi, kayatna nga agbalinda a kontento kadagiti kasapulan iti biag tapno maipamaysada ti agserbi kenkuana. (Mateo 6:33) Iti biang ti Dios, siguraduenna nga ipaay dagiti material a kasapulanda. Kuna ti Hebreo 13:5: “Ti wagas ti panagbiagyo siwayawaya koma iti panagayat iti kuarta, bayat a mapnekkayo iti agdama a bambanag. Ta [ti Dios] kinunana: ‘Saankanto a pulos panawan ket saankanto a pulos baybay-an.’”

Tungpalen ti Dios dayta a karina iti naisangsangayan a pamay-an inton ispalenna ti “maysa a dakkel a bunggoy” dagiti pudno nga agdaydayaw bayat ti panungpalan ti agdama a sistema dagiti bambanag ket iturongna ida iti baro a lubong ti talna ken pudno a kinarang-ay. (Apocalipsis 7:9, 14) Kinuna ni Jesus: “Immayak tapno [dagiti matalek a pasurotna] maaddaanda iti biag ket siwawadwad a maaddaanda iti dayta.” (Juan 10:10) Ti tuktukoyenna a ‘nawadwad a biag’ ket saan a ti kinaruay ti material nga ik-ikutan ita no di ket ti agnanayon a biag iti Paraiso iti sidong ti turay ti Pagarian ti Dios.—Lucas 23:43.

Diyo koma pilien dagiti awan pategna a bambanag babaen ti panagpaallilawyo iti teolohia nga agkuna a kayat ti Dios nga agbalintayo a nabaknang iti material. Kinapudnona, mangsinga laeng dayta a teolohia. Isu nga ipangagyo ti naayat ngem naganat a balakad ni Jesus: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag, ket giddato a dayta nga aldaw kellaat nga umay kadakayo kas maysa a silo.”—Lucas 21:34, 35.

[Footnote]

NAPANUNOTYO KADIN?

◼ Ania koma ti sigaganat nga ar-aramidentayo ita a panawen?—Mateo 24:14.

◼ Inkompara ni Jesus ti panawentayo iti kaaldawan dagiti siasino a karakter ti Biblia? —Mateo 24:37-39; Lucas 17:28-30.

◼ Ania ti liklikantayo no kayattayo a magun-odan ti biag nga agnanayon?—Lucas 21:34.

[Blurb iti panid 13]

Mangallilaw laeng ti teolohia nga agkuna a kayat ti Dios nga agbalintayo a nabaknang iti material