Panangmatmat iti Lubong

◼ “Maipaspasangotayo iti nakaro unay a peggad [krisis iti politika ti Georgia] . . . Adda kadatayo ti Dios ken salsalaknibannatayo ni Birhen Maria, ngem adda pakaseknantay unay—dagiti Ruso nga Orthodox bombombaenda dagiti Georgiano nga Orthodox.”—GEORGIAN CATHOLICOS PATRIARCH ILLIA II

◼ “Iti napalabas nga innem a bulan, nagtriple ti kaadu dagiti nagpakonsulta iti doktor gapu ta agganatda a maresetaan iti morning-after pill—ti kontraseptibo a dagus a mangregreg iti sikog kalpasan ti panagnaig. Manipud 2004, immadu iti 200 a porsiento dagiti nailako a kasta a kontraseptibo. . . . Masansan a magatang dagita iti Lunes, ken agtutubo ti kaaduan kadagiti gumatgatang.”—CLARÍN, ARGENTINA.

◼ Tunggal Americano nga agus-usar iti selpon nga agedad iti 13 agingga iti 17 ket “nag-text wenno nakaawat iti text iti promedio a 1,742 a mensahe iti kada bulan, manipud Abril agingga iti Hunio [2008].”—THE NEW YORK TIMES, U.S.A.

◼ “Adda sakit ti isip ti dandani 12% iti amin a tao iti lubong.”—WORLD FEDERATION FOR MENTAL HEALTH, U.S.A.

◼ “Mapattapatta a maysa iti kada lima nga adulto iti Europa ti nakapadasen a [nagmarihuana].”—EUROPEAN MONITORING CENTRE FOR DRUGS AND DRUG ADDICTION, PORTUGAL.

Nagan a Nadakamat iti Biblia—Nakabakab

Dagiti arkeologo nga agkalkali iti nagkauna a Siudad ni David idiay Jerusalem nakabakabda ti 2,600 a tawenen ti kabayagna a damili a pagselio, wenno bulla, a nasuratan iti nagan a “Gedalias nga anak ni Pasur.” Ni Gedalias ket nadakamat iti Biblia idiay Jeremias 38:1, agraman ni Yehukhal—a naawagan “Jucal [napaababa a porma ti Jehucal (Yehukhal)] nga anak ni Selemias”—a ti naganna ket masarakan iti maysa pay a damili a pagselio a nakabakab iti dayta met la a lugar idi 2005. Dagita a dua a lallaki ket opisial idi iti pagarian ni Ari Zedekias. Impadamag ti The Jerusalem Post: “Ita pay la a napasamak iti arkeolohia ti Israel a ti dua a damili a pagselio nga addaan iti dua a nagan nga agpada a nadakamat iti maymaysa a bersikulo iti Biblia ket nakabakab iti isu met la a lugar.”

Teknolohia Kontra Krimen

Agtelepono ti kaaduan nga umili nga agpaarayat iti New York Police Department. Itay nabiit, gapu iti irarang-ay ti teknolohia, mabalindan nga i-text dagiti polis no agpaarayatda. Impadamag ti The New York Times a “maiparparegtan kadagiti umili nga usarenda dagiti selponda a pang-video kadagiti maar-aramid a krimen sada i-send dagita iti polisia.” Kuna pay dayta a diario a maar-aramiden dagiti pamuspusan “tapno dagiti ladawan ti mapaspasamak a krimen ket dagus a mai-send ti Real Time Crime Center kadagiti amin nga agpatpatrolia a lugan ti polisia iti dayta a lugar.”

Mailasin Dagiti Magpie ti Bagida

“Maipagarup idi a dagiti laeng chimpanzee, dolphin, ken elepante ti kas iti tao a makailasin iti mismo a bagida iti sarming,” sigun iti Reuters. Ngem ita, nairamanen dagiti Eurasian magpie iti dayta a “grupo” nupay maipagarup idi a manmano nga animal ti makaaramid iti kasta. Dagiti managsirarak minarkaanda ti bagi dagiti magpie iti dekolor a tulnek a makitada laeng iti sarming. “Kanayon a tuktoken dagita a billit ti marka iti bagida, a mangpaneknek a mailasinda nga isuda ti adda iti sarming, saan ket a sabali nga animal,” sigun iti damag.