Panangpetpet iti Kannawan nga Ima ti Dios
◼ Ni Jezreel a taga-Mexico ket nayanak nga addaan iti karkarna a sakit iti kudil a maawagan iti congenital lamellar ichthyosis. Agtuklap ken agkalio ti kaaduan a paset ti bagina. “Maariek dagiti tattao no makitadak,” kuna ni Jezreel, “ngem saan a makaakar ti sakitko.”
Sipud pay idi ubing ni Jezreel, naipapaagasen iti nagduduma nga ospital. Idi agtawen iti dua, naipan iti naiputong a kuarto ti ospital tapno saan a maimpeksion. Ngem saan a simmayaat ti kasasaadna. Naipaagas pay iti maysa a psychiatrist tapno saanna nga ay-ayen ti bagina.
Isu ket masansan a liklikan dagidiay mangipagarup a makaakar ti sakitna. Nangnangruna a narigat dayta kenkuana idi ubing pay. Kayatna idi ti makiay-ayam kadagiti padana nga ubbing ngem kas kunana, “Pagkakatawaandak ken awagandak kadagiti mangumsi a nagan a kas iti Al-alia ken ET.”
Iti sabali a bangir, ti panagsagaba iti daytoy a nakadidillaw a sakit ti nangted ken Jezreel iti oportunidad a mangiranud iti naibatay iti Biblia a namnamana. Masansan nga asitgan dagiti tattao ket isaludsodda no napuoran ti kudilna. No ibagana a saan, damagenda no apay a kasta ti langana. Ilawlawagna ti makagapu ken ibagana nga awan pay ti natakuatan nga agas ti sakitna.
Sa inayonna, “Addaanak iti kasayaatan a namnama iti lubong gapu ta inkari ni Jehova a Dios kadagidiay natulnog kenkuana nga agbiagdanto iti baro a lubong nga awanan iti sakit ken ut-ot.” (Apocalipsis 21:3, 4) Ti kastoy a panangilawlawag ni Jezreel iti kasasaadna ti timmulong kenkuana a makairugi kadagiti panagadal iti Biblia ken naaddan iti rag-o a makakita kadagiti sumagmamano kadakuada nga agbalin a padana nga agdaydayaw iti Dios.
“Agyamanak ta dimmakkelak iti Kristiano a pamilia,” kuna ni Jezreel, “ken kas maysa a Saksi ni Jehova, naaddaanak kadagiti nasinged a gagayyem. Awan kadakuada ti nanglais iti langak. Nabautisaranak idi agtawenak iti 17, ket iti simmaruno a 14 a tawen, nakapagserbiak iti Namarsua kadatayo iti nadumaduma a pamay-an.”
Sipapanunot ni Jezreel kadagiti makapabileg a sasao ni Jehova a masarakan iti Isaias 41:10, 13: “Dika agbuteng, ta addaak kenka. . . . Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg. Ta siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’”
Ti panangpetpet iti kannawan nga ima ni Jehova ti nakatulong ken Jezreel a mangsaranget iti bainna ken mangdaer kadagiti parikut nga itden dayta a sakit. Kas kadagiti minilion a tattao, ur-urayenna ti pannakatungpal dagiti naindaklan a kari ti Dios.