Nadisenio Kadi?

Ti Dutdot ti Kullaaw

◼Dagiti inheniero ti panagpatayab ap-apalanda ti kullaaw. Apay? Gapu iti naulimek a panagtayabna. “Awan ti sabali a billit a kas iti dayta ti kinaulimek ti panagtayabna,” kuna ti Web site ti National Geographic. Ania ti sekreto ti kullaaw?

Usigem: Agwaneswes ti angin a maitupar iti dutdot ti kaaduan a tumatayab. Ngem saan a kasta no iti kullaaw. Ti agparaypay a dutdotna ket addaan kadagiti pirapir a manglapped iti uni a patauden ti angin a maitupar iti rabaw ti payakna no agpayakpak. Dagiti nalamuyot a dutdot iti nadumaduma a paset ti bagina ti makatulong a manglapped iti nabatbati pay nga uni.

Dagiti paradisenio kadagiti eroplano kayatda a tuladen ti dandani di mangngeg a panagtayab ti kullaaw. No addanton dagiti nakapsut ti ungorna nga eroplano, dagiti eropuerto a nainget ti pananglimitarda kadagiti napigsa ti ungorna nga eroplano mabalindanton a palubosan nga agdisso ken agtayab dagita uray no parbangon wenno adalemen ti rabii. Addan dagiti naaramid a plano agpaay iti pannakapasayaat dagiti eroplano. “Rugrugianmi pay la nga adalen no kasano nga ipatungpal dagiti kasta a panangpasayaat,” kinuna ni Geoffrey Lilley, retirado a propesor ti aeronautics iti University of Southampton idiay England. Innayonna nga adu pay a dekada ti kasapulan tapno maaramid ti kasta nga eroplano a nakapsut ti ungorna.

Ania ti makunam? Naiparna laeng kadi a timmaud ti agparaypay a dutdot ti kullaaw a mangpaulimek iti panagtayabna? Wenno nadisenio dayta?

[Ladawan iti panid 23]

Pagdiligem ti dutdot ti kullaaw iti kannigid ken ti dutdot ti kali iti kannawan

[Picture Credit Lines iti panid 23]

Long-eared owl: © Joe McDonald/Visuals Unlimited; panagpayakpak ti barn owl: © Andy Harmer/Photo Researchers, Inc.; napagdilig a dutdot: Iti pammalubos ti Eike Wulfmeyer/Wikimedia/GFDL