‘Panangparmek iti Pagannayasan nga Agbalin a Managimbubukodan’
● TI Gibraltar nga adda iti makin-abagatan a pungto ti Iberian Peninsula ket namin-adun a nalakub ken naraut bayat ti nariribuk a pakasaritaanna. Ngem iti maysa a ngudo ti lawas idi Oktubre 2008, napasaranna ti natalna nga “iraraut” ti dandani 1,000 nga Espaniol. Immayda agibangon iti Kingdom Hall a paggigimongan ti dua a kongregasion dagiti Saksi ni Jehova iti Gibraltar.
Ti gobernador imbagana iti Agriingkayo! a pinasangbay ti Gibraltar ti dandani 1,000 nga immay nagtrabaho iti dayta a proyekto. Kinunana a “timmulongda iti pannakapasayaat ti lokal a komunidad.” Nasaona a “dagiti Saksi ni Jehova ti kadakkelan pay la a bunggoy nga immay iti Gibraltar tapno agtrabaho iti maysa a proyekto—ken naisangsangayan ta boluntarioda amin.”
Dagiti lokal nga autoridad sinuportaranda ti proyekto sipud idi nangrugi. Siaasi nga impaayanda dagiti Saksi iti mayanatup a disso a pagipatakderan iti daytoy a Kingdom Hall. Ania ti nangtignay kadagiti autoridad nga agbalin a nakaparparabur?
Inlawlawag ti gobernador: “Panagkunak, ti pammati iti Dios ket nasayaat a galad ti aniaman a kagimongan. Ti amin a relihion iti Gibraltar ket addaan iti wayawaya nga agdaydayaw kas sagudayen ti linteg, isu a pagrebbengan ti gobierno a saan a mangidumduma no maipapan iti relihion. Kanayonanna, ti panangipaay kadagiti Saksi iti mayanatup a disso a pagipatakderan iti Kingdom Hall ket makatulong iti komunidad.”
Kinunana pay: “Nasken a maparmektayo ti pagannayasan ti kaaduan nga agbalin a managimbubukodan. Dagiti karelihionanyo a naganaygay a boluntario a nagtrabaho impakitada a posible a maaramidantayo daytoy.”
Iti laksid ti bagyo a nangitantan iti pannakairugi ti trabaho, nalpas ti Kingdom Hall iti Lunes, a maikatlo nga aldaw ti proyekto. “Adu kadagiti nagboluntario ti nangyalud-od iti panagtalinaedda ditoy Gibraltar agingga a nairingpas ti proyekto,” inlawlawag ni Secundino Nogal, a nangidaulo iti panagbangon. “Nairuamkamin a mangsango kadagiti parikut. Ti pamay-an ti panagbangonmi ket mabalin nga ibagaybagay iti nadumaduma a kasasaad. Ngem kangrunaan iti amin, kasapulan ti panagsakripisio. Dayta ti gapuna a nariknami ti kasta unay a pannakapnek.”a
[Footnote]
a Impadamag ti Gibraltar Chronicle a diario iti dayta a lugar: “Iti maysa a ngudo ti lawas, bayat a mangdaddadael ti bagyo, dagiti Saksi ni Jehova iti Gibraltar . . . nabangonda iti las-ud laeng ti tallo nga aldaw ti temploda [Kingdom Hall] babaen iti nagadu a boluntario.”