“Natibker kas ti Bato iti Gibraltar”

Tumangkayag a nakaparparsed manipud iti nabara, asul a dandanum iti Mediteraneo agingga iti katayag a 426 metros, ti Bato iti Gibraltar pudno nga agparang a kasla solido. Iti nalawag nga aldaw, manipud kadagiti adu a milias iti aglawlaw iti makin-abagatan nga España ken manipud iti Morocco, iti ballasiw ti Mediteraneo, nalaka laeng a makita ti maysa ti natirad a tuktok iti Gibraltar.

Ti historia iti Gibraltar ket agsubli kadagiti naangep a panawen idi a dagiti marinero idi ugma, gaput’ patienda a daplat ti daga, pagarupenda a ti panagrikos iti Baybay iti Gibraltar ket iturongna ida iti pingir iti lubong ken iti mangliwengliweng nga abut ti pannakadadael. Namatmatan met dayta a kas maysa kadagiti Sarikedked ni Hercules, ti sabali isu ti Jebel Musa idiay Ceuta, iti maysa nga igid ti baybay nga Africano iti ballasiw ti taaw. Dagiti sarsarita kunaenda a ti dios a ni Hercules ginuduana dagiti bambantay.

Ti siudad iti Gibraltar utangna ti kaaddana kadagiti Arabe a naggapu iti Norte Africa idi maika-walo a siglo K.P. ket kalpasanna imbangonda ti siudad idi 1160. Ti nagan a Gibraltar nagtaud iti Arabiko a nagan a Djabal-Tarik, wenno Bantay iti Tarik. Ni Ṭāriq ibn Ziyād ket maysa a pangulo nga Arabe a nangabak iti naudi nga ari a Goth idi 711 K.P.

Pinarmek dagiti Español ti Gibraltar idi 1462, ngem napukawna laeng dayta kadagiti Briton idi 1704. Agingga iti daytoy nga aldaw, daytat’ agtalinaed a kas maysa kadagiti maudi a pagbantayan iti dati nga Imperio a Briton. Ngem ti Bato iti Gibraltar agtultuloy kas maysa a simbolo iti maysa a banag a solido ken permanente.

Dua a kongregasion (Ingles ken Español) nga addaan agarup 120 a Saksi ni Jehova idiay Gibraltar ti mangipapaay iti kari ti turay ti Pagarian ti Dios kadagiti taga Gibraltar, maysa a kari a natibtibker pay ngem ti Bato!—Tito 1:1, 2; Hebreo 6:17-19.