Mapnekkan iti Kolor ti Kudilmo
● Dadduma a tattao iti Africa, Abagatan nga Asia, Caribbean, ken iti Makintengnga a Daya inaigda ti kinapudaw iti kinabaknang ken kinapintas wenno kinataer. Gapuna, adu a lallaki ken babbai kadagita a lugar ti agus-usar kadagiti produkto a pagpapudaw—a no dadduma, makadangran unay iti salun-atda.
Dadduma a losion a pagpapudaw ket naglaon iti hydroquinone—kemikal a makapapudaw ngem lapdanna ti pannakapataud ti melanin, isu a maksayan ti natural a proteksion ti kudil manipud iti makadangran nga ultraviolet (UV) radiation. Ti hydroquinone sarutenna ti kudil ken mabalin a permanente a dadaelenna ti mamagkakamang a tisyu. Agresulta dayta iti nasapa a panagkuribetbet. Mabalin met a makapakanser dayta a kemikal. Addaan ti dadduma a losion iti mercury a makasabidong met.
Ti agtultuloy a panagusar kadagiti kasta a produkto ket agresulta met iti nalaad a labbalabbaga, labanglabang, ken naingpis unayen a kudil nga uray la saanen a mabalin a madait no masugat. No dagiti kemikal kadagitoy a produkto ket sumarut met iti dara, madadaelda ti dalem, dagiti bato, wenno ti utek, ken mabalin pay ketdi a pakaigapuan ti naan-anay a pannakadadael ti paspaset ti bagi.
Nakakatkatawa ta nupay kayat dagiti nangisngisit ti kudilda ti agpapudaw, adu met a napudaw ti mangikagkagumaan nga agbalinda a medio nangisit. Pudno a makapasalun-at ti kalkalainganna a panagpainit, ta kas pagarigan, makatulong dayta iti panagpataud ti bagitayo iti bitamina D. Ngem makadangran ti napaut a panagkainitan nangruna no umaldawen. Kinaagpaysuanna, ti panagngisit ti kudil ket pagilasinan a nadangranen ti kudilmo ken ikagkagumaanen ti bagi a protektaran ti kudil manipud iti nakarkaro pay a pannakaisarang iti makadangran a raya ti init. Ngem limitado dayta a proteksion. Nupay makatulong ti kanayon a panaglosion a mangprotektar iti kudil, dina naan-anay a masalakniban ti kudil manipud iti pannakadadael ken dadduma a kita ti kanser, agraman ti melanoma.
Gapuna, irekomenda ti World Health Organization ti “panangigunamgunam iti mensahe a tunggal maysa ket rumbeng a mapnek koman iti natural a kolor ti kudilna,” a “napateg nga addang tapno tunggal maysa maprotektaranna ti bagina kadagiti dakes nga epekto ti panagkainitan.” Nupay kasta, ti pakaseknan dagidiay talaga a masirib ket ti awagan ti Biblia a “nalimed a kinatao ti puso,” a sumaysayaat bayat nga aglabas ti tiempo, saan ket a kas iti kudil nga agkuribetbet bayat a tumataenganda!—1 Pedro 3:3, 4; Proverbio 16:31.