“Ti Kinapudno Wayawayaannakayto”!
KANAYON nga agpayso dagita a sasao ni Jesu-Kristo a mabasa iti Biblia iti Juan 8:32. Dayta a kinapudno ti mangwayawaya kadatayo kadagiti an-anito ken tradision a makadangran ken di makaay-ayo iti Dios. Ipakita dagiti sumaganad no kasano a ti kinapudno iti Biblia winayawayaanna dagiti tattao iti nadumaduma a pagilian manipud kadagiti makapadagsen a tradision a nainaig iti Krismas.
Winayawayaan Ida ti Kinapudno iti Biblia!
Argentina “Napalag-anan ti pamiliami kadagiti problema a mainaig iti nalabes a pannangan ken panaginum agraman ti panaggatang kadagiti regalo a dimi met kabaelan,” kuna ni Oscar.
Nabang-aran unay ni Mario idi adda nangibaga kenkuana a saan nga umiso ti Krismas. “Maragragsakanak itan a mangyebkas iti panangapresiarko iti sabsabali babaen iti panagregalok aniaman a kanito ken depende iti badyetko.”
Canada “Magusgustuak ti mangted ken umawat iti regalo,” insurat ni Elfie. “Ngem diak kayat ti mapilitan a mangted. Anian a gin-awami idi simmardengen ti pamiliami a mangselebrar iti Krismas!”
Malagip ni Ulli nga anak ni Elfie: “Idi insardengen dagiti nagannakmi ti agselebrar iti Krismas, masansan a sorpresaendakami kadagiti makaparagsak nga aktibidad wenno regalo iti uray kaano, ket magusgustuanmi dayta! No damagen dagiti kaklasemi no ania ti okasion, maay-ayatankami a mangibaga iti “Awan, nakalagipda laeng!” Ngem gapu iti ibubusor ken impluensia dagiti kabagianmi, saan a kaskarina para kadagiti nagannakmi nga iyaplikar dagiti nasursuroda iti Biblia. Nupay kasta, napabilegak unay ta nakitak a determinadoda nga agdayaw ken Jehova a Dios iti umiso a wagas.”
Nabang-aran met unay ni Sylvia idi insardengnan a selebraran ti Krismas. “Nagmayat ti riknak kalpasanna! Ammok a maparparagsakko ni Jehova a Dios ket nasaysayaat dayta ngem iti rinibu a panangselebrar iti Krismas.”
Kenya Insurat ni Peter: “Idi selselebrarak pay laeng ti Krismas, dakkel ti ut-utangek a paggatangko kadagiti regalo ken pagbayadko iti agkakangina a taraon. Siempre, kasapulanen nga agobertaymak isu a manmanon ti tiempok para iti pamiliak. Naimbag laengen ta saanen a kasta ti ar-aramidek!”
“Mangmangtedak—ken umaw-awatak—kadagiti regalo manipud iti pamiliak ken gagayyemko iti aniaman a tiempo,” kuna ni Carolyne. “Patiek a kasayaatan dagiti kasta a di ninamnama ken sibubulos a naited a regalo.”
Japan Insurat da Hiroshi ken Rie: “Saan a nairuam dagiti annakmi a mangnamnama a maregaluanda uray awan pateg dagita kadakuada. Kas nagannak, maragsakankami a makakita a maawatandan a rumbeng a naimpusuan ti panangted.”
Malagip ni Keiko: “Agkris-Krismas idi ti pamiliami. No sigurado a nakaturogen ti anakmi, mangikabilkami ken lakayko iti regalo iti abay ti iddana. Kabigatanna, ibagami kenkuana: ‘Nasingpetka ngamin isu a rinegaluannaka ni Santa.’ Idi naammuak ti kinapudno maipapan iti Krismas ken imbagak dayta iti anakko, naklaat ken nagsangit. Idin a naan-anay a naamirisko a saan a nasayaat ti Krismas. Inuulbod gayam, ken gapu ta selselebraranmi dayta, panagriknak ket linuklukomi ti anakmi.”
Pilipinas Kuna ni Dave: “Diak naan-anay a madeskribir ti rag-o nga ipapaay kadakami ni Jehova babaen kadagiti nasin-aw a kinapudno manipud iti Biblia. No agregalo ti pamiliami, dikam mangnamnama iti kasukat dagita. Naimpusuan ti panangtedmi.”
Sumagmamano laeng dagita iti minilion a nakapanekneken manipud iti bukodda a kapadasan a ti kinapudno iti Biblia ket mangwayawaya iti tattao. Ngem napatpateg pay, maparagsaktayo ti Dios no agbiagtayo a maitunos iti dayta a kinapudno. (Proverbio 27:11) Kinuna ni Jesu-Kristo: “Dagiti pudno a managdaydayaw agdayawdanto iti Ama buyogen ti espiritu ken kinapudno, ta, pudno unay, ti Ama sapsapulenna dagiti kasta nga agdayaw kenkuana.” (Juan 4:23) No sukimaten ti Dios ti pusom, masarakanna ngata a magagaranka a mangammo iti kinapudno? Sapay koma ta ti sungbatmo ket nalawag a wen!
[Ladawan iti panid 9]
Naimpusuan a mangted dagiti Kristiano iti aniaman a tiempo ti tawen