Liniwliwanak ti Dios iti Amin a Pakasuotak

Kas Insalaysay ni Victoria Colloy

Imbaga ti doktor ken Nanang: “Inaramidmin ti amin para iti anakmo. Iti unos ti panagbiagna, masapul nga agsaklay ken agusaren kadagiti brace iti saka.” Kasla nagtupak ti langit kaniak! Kasanoakon no diakton makapagna?

NAIPASNGAYAK idi Nobiembre 17, 1949 idiay Tapachula, Chiapas, Mexico kas nasalun-at ken naragsak a maladaga. Siak ti inauna iti uppat nga agkakabsat. Idi innem a bulanko, pagammuan ta diakon makakaradap ken diak unayen makagunay. Dua a bulan kalpasanna, diak pulosen makagaraw. Nasdaaw dagiti doktor iti lugarmi gapu ta kasta met laeng ti dadduma a maladaga iti Tapachula. Isu nga immaynakami ineksamen ti maysa nga orthopedist manipud idiay Mexico. Natakuatanna nga addaankami iti poliomyelitis, wenno polio.

Idi tallon ti tawenko, naopera ti patong, tumeng, ken lipaylipayko. Kalpasanna, nakaro met ti pannakaapektar ti kannawan nga abagak. Idi innem ti tawenko, impandak iti Mexico City tapno agtultuloy ti pannakaagasko iti maysa nga ospital ti ubbing. Makitaltalon ni Nanang idiay Chiapas isu a nagnaedak ken lolak iti Mexico City. Ngem masansan nga addaak iti ospital.

Medio simmayaat ti kasasaadko idi dandanin walo ti tawenko. Ngem kalpasan dayta, kimmaroak manen ta in-inut a diakon makagaraw uray bassit laeng. Isu a kinuna dagiti doktor nga iti unos ti panagbiagko, kasapulan nga agsaklay ken agusarakon iti brace ti saka.

Idi 15 ti tawenkon, 25 a darasen a naoperaak. Dagita ket iti gurong, tumeng, lipaylipay, duri, ken ramramay ti sakak. Kada malpas ti operasion, ma-therapy-ak. Kalpasan ti maysa nga operasion, nasemento ti sakak. Idi naikkat ti semento, nasken a kanayon nga agehersisioak nupay naut-ot dagita.

Pudno a Pannakaliwliwa

Idi 11 ti tawenko, sinarungkarannak ni Nanang bayat nga agpapaimbagak kalpasan ti operasion. Naammuanna a pinaimbag ni Jesus dagiti masakit ken pinapagnana pay ti maysa a paralitiko. Inikkannak iti magasin a Ti Pagwanawanan nga impablaak dagiti Saksi ni Jehova, a nakabasaanna iti dayta. Inkabilko iti pandag ti punganko, ngem maysa nga aldaw, diakon makita dayta. Innala gayam dagiti nars ket inungtandak gapu ta binasak dayta.

Kalpasan ti agarup makatawen, sinarungkarannak manen ni Nanang. Makipagad-adal gayamen iti Biblia kadagiti Saksi idiay Chiapas. Insangpetannak iti libro a Manipud Paraiso a Napucaw Agingga iti Paraiso a Naisubli.a Kinuna ni Nanang: “No kayatmo ti agbiag iti naikari a baro a daga a pangpaimbaganto kenka ni Jesus, masapul nga agadalka iti Biblia.” Isu nga uray no busbusorennak ni lolak, nagpayadalak kadagiti Saksi idi agtawenak iti agarup 14. Iti simmaruno a tawen, masapul a rummuarakon iti ospital ta para laeng dayta kadagiti ubbing.

Panangdaer Kadagiti Problema

Naldaangak unay. Gapu ta busbusorennak ni lolak, napilitanak a nagawid kadagiti nagannakko idiay Chiapas. Ngem adu ti problema idiay balay ta mammartek ni Tatang. Adda idi tiempo a diak kayaten ti agbiag. Pinampanunotko ti agsabidong. Ngem bayat nga intultuloyko ti agadal iti Biblia, nagbalbaliw ti panagpampanunotko. Rimmagsakak gapu iti paraiso a daga nga inkari ti Biblia.

Rinugiak nga iranud ti nagsayaat a namnama a mabasa iti Biblia. (Isaias 2:4; 9:6, 7; 11:6-9; Apocalipsis 21:3, 4) Nabautisaranak idi Mayo 8, 1968 kas maysa kadagiti Saksi ni Jehova iti edad a 18. Sipud idi 1974, binulan a nasurok a 70 nga oras ti us-usarek a mangiranud iti namnama a manggutgutugot kaniak nga agtultuloy nga agbiag.

Nabunga ken Makapnek a Biag

Idi agangay, immakarkami ken Nanang idiay siudad ti Tijuana nga asideg iti beddeng ti Mexico ken Estados Unidos. Nagnaedkami iti lugar a maibagay iti kasasaadmi. Makapagnapagnaak met pay laeng iti uneg ti balay no agsaklayak ken no adda brace ti sakak, ken agusarak iti wheelchair bayat nga agluto, aglaba, ken agplantsaak. No mapanak mangasaba, agus-usarak iti electric cart a nairanta kaniak.

Isarsaritak dagiti pannursuro ti Biblia kadagiti tattao iti kalkalsada ken balbalayda. Regular met a mapanak iti asideg nga ospital tapno kasabaak dagidiay adda iti ruar nga agur-uray iti doktor. Kalpasanna, makitiendaak ket inton makaawidakon, tulongak ni Nanang nga agluto ken iti dadduma pay a trabaho iti balay.

Aglaklakoak kadagiti segunda mano a kawes tapno adda kuartami. Agtawenen ni Nanang iti 78 ken nakapsuten ta namitlon a naatake ti pusona. Isu nga as-asikasuek dagiti taraon ken agasna. Ngem uray no kastoy ti kasasaad ti salun-atmi, ikagkagumaanmi ti makigimong. Nasurok a 30 kadagiti nayadalakon iti Biblia ti mangaskasaba metten kas Kristiano.

Kombinsidoak a matungpalto daytoy a kari ti Biblia: “Iti dayta a tiempo [iti baro a lubong ti Dios] kumalay-atto daydiay pilay a kas iti panagkalay-at ti kalakian nga ugsa.” Kabayatanna, maliwliwaak kadagitoy a kinuna ti Dios: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto. Pudno a tulongankanto. Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg.”—Isaias 35:6; 41:10.b

[Footnotes]

[Ladawan iti panid 12]

Addan “brace” ti sakak idi pito ti tawenko

[Ladawan iti panid 13]

No mangasabaak, agus-usarak iti electric cart a nairanta kaniak