Apay a Maallukoy ti Tattao iti Okulto?
TI SUNGBAT dayta ket depende iti lugar a pagnanaedan ti maysa a tao, iti narelihiosuan a patpatienna, ken iti namulagatanna a kultura. Iti lugaryo, ania ti pakaallukoyan ti tattao iti okulto? Nalabit gapu iti maysa kadagiti sumaganad.
● Panagusioso Nainkasigudan a managusioso dagiti tattao, ket yantangay misterioso ti okulto, adu ti maallukoy iti dayta. Gapuna, pampanunoten ti dadduma no adda karkarna a pannakabalin iti likudan dayta. Nalabit adda dagiti mangpadas nga agusar iti Ouija board, agay-ayam iti spirit of the glass, ken agbasa iti horoscope tapno maammuanda no pumayso dayta. Makiuman met ti dadduma kadagiti natay wenno agpatulongda kadagiti psychic.
● Paglinglingayan Iti nabiit pay a tawtawen, kellaat nga immadu dagiti libro, pelikula, ken computer game a mangitampok iti okulto ken nagkauna a narelihiosuan nga an-anito dagiti pagano. Nakarangranggas ken imoral unay nga eksena ti linaon ti dadduma kadagita.
● Pannakaseknan iti masanguanan Impadto ti Biblia: “Kadagiti maudi nga aldaw dumtengto dagiti napeggad a tiempo a narigat a pakilangenan.” (2 Timoteo 3:1) Narigat a talaga itan ti tiempo isu nga adu ti agpatulong kadagiti mangan-annurot iti okultismo, a kas kadagiti astrologo, mammadles, mammalad, mammuyon, ken psychic. “Maysa dayta kadagiti sumagmamano a negosio a napigsa latta uray no kumapuy ti ekonomia,” kinuna ti maysa a psychic. “Saan nga umay kadakami dagiti tattao no naragsakda.” Kinuna ti maysa a mammadles idiay Canada: “Agpatpatulong metten uray dagiti propesional iti tay-ak ti negosio. Agar-arasaasda nga umawag iti pribado a linia ti telepono ti opisinada wenno usarenda ti selponda iti pasilio.” Innayonna: “Isuda dagidiay dati a di mamatpati ken alusiisen nga agkonsulta iti psychic.”
● Sakit Iti dadduma a lugar, dagiti tattao a nakaro ti sakitna ken nauman kadagiti doktor ket masansan nga agpaagas kadagiti erbolario nga agus-usar iti okulto. Ipagarupda a dagiti sakitda ket gapuanan ti lunod wenno gamud. Tapno masumra dayta, ti gagayyem wenno kabagian ti agsakit ket nalabit agpatulong iti espiritista a nangina ti singirna.
● Panagtarigagay iti salaknib ken suerte Iti dadduma a paset ti Africa, manangdan dagiti bumario iti “propeta” manipud iti karismatiko a simbaan tapno mapaksiat dagiti dakes nga espiritu iti lugarda. Karaman kadagiti ritual ti iyiinum iti namilagruan nga agas ken “agua bendita.” Iti sabali pay a lugar, makiuman dagiti tattao kadagiti espiritista tapno sumrek ti suerte iti baro a balay wenno uray iti tanem, ta patienda a ti espiritu dagiti natay ti mangyeg kadakuada iti suerte.
● Proteksion kadagiti ubbing No rabii idiay Papua New Guinea, saan a kayat ti ina ti rummuar a kadua ti kappasngay nga anakna. Apay? Mabuteng amangan no ti anakna ket dangran dagiti dakes nga espiritu. Idiay Uganda, ugali dagiti inna ti mangisiglot iti sinulid, a pasaray addaan kadagiti bead ken shell, iti pungupunguan ken lipaylipay dagiti maladagada kas proteksion.
● Ipapatay ti ay-ayaten Idi Sangalubongan a Gubat I, ti Briton nga autor a ni Sir Arthur Conan Doyle ket natayan iti anak, kabsat, kayong, ken kaanakan. Gapu ta mariribukan ken maldaangan unay, kaduana ti baketna a nakiuman iti psychic bareng makasaritada ti natay nga anakda. Kasta met ti ar-aramiden ita ti adu a tattao. Iti dadduma a lugar, isursuro dagiti kangrunaan a relihion ken dagiti relihion nga agkunkuna a Kristianoda a ti ipapatay ket gapuanan dagiti dakes nga aramid dagiti nauyong nga espiritu. Ipilitda kadagiti natayan ti dadduma a nangina a ritual tapno mapasardeng ti agsasaruno nga ipapatay iti lugarda.
● Panagbuteng kadagiti natay Nagdakkel ti impluensia kadagiti tattao ti patpatien maipapan iti ipapatay ken kadagiti natay. Isu nga iti adu a lugar, ar-aramiden ti tattao ti amin a kita ti ritual, agraman panangdangran iti bagi, tapno maay-ayo dagiti natay wenno “mapasingkedanda” ti ayatda kadakuada. Iti dadduma nga umili kadagiti isla ti Pacifico, pilitenda nga agpanes dagiti balo bayat ti panagladingitda iti adu a bulan. Agpupokda iti balay ket dida mangan iti paborito ti pimmusay. Mabalin nga agbanag dayta iti depresion, sakit gapu iti bisin, wenno ipapatay pay ketdi.
Nalawag nga adu ti pakaallukoyan dagiti tattao iti okulto. Nagpateg ngarud a maammuantayo ti pudno a nagtaudan dagiti sursuro a nainaig iti okulto! Gapuna, usigentayo ti Biblia, ti kakaisuna a libro a makailawlawag iti amin a nainaig iti okulto.