Addaanka Kadi iti Realistiko a Kalat?
● Ania ti kayatmo iti biag? Rasonable kadi dagiti in-inanamaem, wenno ar-arapaapem dagiti dimo kabaelan a ragpaten? Kastoy ti nainsiriban a balakad ti nasaririt a nangpaliiw iti kababalin ti tao: “Nasaysayaat a mapnekka iti adda iti sanguanan dagiti matam ngem iti itutulok iti tarigagay; daytoy met ket kinaubbaw ken panangkamat iti angin.”—Eclesiastes 6:9 The New English Bible.
Ti “adda iti sanguanan dagiti mata[tayo]” tukoyenna dagiti agdama ken aktual a kasasaadtayo. Saan met ketdi a dakes no ikagumaantayo a pasayaaten ti biagtayo. Ngem kayat a pagminaren ti Biblia a di umiso ti panangtarigagay kadagiti saan a realistiko a kalat. Mabalin a dagita ket kinalatak, kinabaknang, kasayaatan nga asawa, wenno perpekto a salun-at.
Kanayonanna, uray naragpaten ti dadduma ti kalatda, kas iti material a kinabaknang, mabalin nga agtarigagayda pay iti ad-adu. Sipaprangka a kuna ti Biblia: “Ti managayat laeng iti pirak saanto a mapnek iti pirak, uray ti asinoman a managayat iti kinabaknang saanto a mapnek iti sapul. Daytoy met ket kinaubbaw.” (Eclesiastes 5:10) Ikagumaan ngarud dagidiay masirib iti naespirituan ti agbalin a kontento iti adda kadakuada, ti “adda iti sanguanan dagiti mata[da].” Wen, umanamongda iti daytoy a kinapudno: “Awan ti inyegtayo iti lubong, ket saantay met a mabalin ti mangitugot iti aniaman a banag.”—1 Timoteo 6:7.
Ti panangpennek iti naespirituan a kasapulan ti mangyeg iti kasta unay a kinaragsak. Nainkasigudan dayta iti tao. (Mateo 5:3) Kasanotayo a maaramidan dayta? Kinuna ni Jesu-Kristo: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mateo 4:4) Masarakan iti Biblia dagita nga agkakapateg a sasao ken libre ti pananggun-od kadagita.
Masarakan iti Salmo 37:4 ti maysa kadagita a kastoy ti kunana: “Agragsakka iti napalalo ken Jehova, ket itdennanto kenka dagiti kiddaw ta pusom.” Kas Mannakabalin-amin a Dios, ipaayto ni Jehova kadagiti matalek nga agdaydayaw kenkuana dagiti di maipaay ti asinoman a tao: perpekto a salun-at, material a kinatalged, ken agnanayon a biag iti Paraiso a daga. (Lucas 23:43; Apocalipsis 21:3, 4) Ti panamatim kadagitoy a sasao ipakitana a realistikoka.