Panangmatmat iti Lubong
Inangay ti Italy ti kaunaan a “divorce fair-na.” Nagkonsulta dagiti bisita kadagiti ahensia ti panagasawa tapno agbirokda iti baro a kaparehada, kadagiti travel agency tapno mangyurnos iti bakasion para kadagiti awanan asawa, ken ahensia a tumultulong a mangiplano iti panagdiborsio tapno agbirokda kadagiti abogado, accountant, sikologo, ken albasiador iti uneg ti pamilia.—CORRIERE DELLA SERA, ITALY.
Ti “kinaawan ti kredibilidad” a resulta ti “di umiso a panangtaming [ti Iglesia Katolika] iti problema a seksual a panangabuso dagiti papadi” ket nagbalinen a “kakaruan a problema ti simbaan, nalabit sipud idi nabuangay dayta.”—NATIONAL CATHOLIC REPORTER, U.S.A.
Dagiti sientista a nangurnos iti DNA manipud iti nagyelo a buok ti taga-Greenland a natay agarup 4,000 a tawenen ti napalabas natakuatanda a dayta a tao ket “kasla naggapu idiay Siberia.”—REUTERS NEWS SERVICE, U.S.A.
Mapukpukawen ti Panagtalek iti Simbaan
“Saanen nga agtalek ti kaaduan a tattao iti Iglesia [Katolika],” kuna ti paulo ti The Irish Times. Sigun iti report, ti Iglesia Katolika ket naikategorian kadagiti institusion a kas kadagiti banko ken gobierno a din pagtalkan ti kaaduan a taga-Ireland. Iti pagilian a mabigbigbig ti kinasungdona iti simbaan, nasurok a kagudua kadagiti nainterbiu iti nabiit pay a surbey ti nagkuna a “pulos” a didan agtalek (32%) wenno saanda a “talaga” nga agtalek (21%) iti simbaan. Dagiti eskandalo a nangibabain iti simbaan ti makagapu a ‘mapukpukawen’ ti panagtalek ti publiko iti dayta.
Awan Trabaho Dagiti Nakaturpos iti Kolehio
Sigurado kadi a makastrekka iti trabaho no nagturposka iti kolehio? Saan para iti adu, kuna ti Manila Bulletin. Inadawna ti kinuna ti mayor ti Quezon City a ni Herbert Bautista: “Kada tawen, minilion ti agturpos kadagiti kolehio ken unibersidadtayo ngem awan ti maserkanda a trabaho ta dagiti kursoda ket di maibagay kadagiti bakante a trabaho.” Adu ti agtinnag kadagiti nababbaba a pagtrabahuan wenno fast-food restaurant. Iparparegta ti gobierno kadagiti agturpos iti haiskul a mangalada iti ababa a vocational a kurso tapno nalaklakadanto a makasapul iti trabaho.
Rumukrukop a Rangtay Gapu iti Tupra
Idiay Calcutta, India, ti 1,500 pie ti kaatiddogna (457 m) a Howrah Bridge ket rumukrukop gapu iti tupra dagiti bumalballasiw iti dayta. Apay? Ti ngamin gutkha—napaglaok a bua, gawed, ken nadanuman nga apug, a kadawyan a ngalngalen sa itupra ti adu nga umili—ket napigsa a mamaglati ken mangrunot iti landok. Sigun iti diario idiay Calcutta a The Telegraph, “sipud idi 2007, immingpis iti innem [.24 a pulgada] agingga iti tallo [.12 a pulgada] a milimetro ti landok kadagiti poste ti rangtay gapu iti kapigsa ti napagtitipon a tupra dagiti lumaslasat iti dayta.” Kada aldaw, agarup 500,000 a tattao ken 100,000 a lugan ti bumalballasiw iti daytoy a rangtay.