Dandani Di Maibturan a Pukaw

Nasalun-at nga ubing ni Nicolle. Ngem maysa a rabii, nagsakit ti ulona isu nga impan dagiti dadakkelna iti ospital. Iti simmaruno a rabii, bayat a palpaliiwen pay laeng dagiti doktor, naatake ti puso ni Nicolle. Sigun kadagiti eksaminasion, nakaptan iti karkarna nga impeksion a gapuanan ti bakteria ket nagwaras dayta iti bara, kidney, ken iti pusona. Iti las-ud ti 48 nga oras, natay ni Nicolle. Tallo laeng idi ti tawenna.

TI IPAPATAY ti ipatpateg ket maysa kadagiti kasaeman a mapasaran ti tao. No dadduma, kasla di maibturan dayta. “Mailiwak unay ken Nicolle,” kuna ni Isabelle nga ina ti ubing. “Kailiwko dagiti arakupna, ti say-upna, ti kinalailona. Mailiwak iti inaldaw a panangtedna kaniak iti sabong. Saan a mapukaw ni Nicolle iti panunotko.”

Naawananka met kadin iti ay-ayaten—nalabit anak, asawa, kabsat, nagannak, wenno nasinged a gayyem? No wen, kasanom a mailiwliwag ti ladingitmo?