Panangmatmat iti Lubong
Iti maysa ket kagudua a tawen nga operasion kontra iti panangipuslit iti tattao, “winayawayaan dagiti polis idiay China ti 10,621 a babbai ken 5,896 nga ubbing a nakidnap.” Naibalud ti 15,673 a suspek.—CHINA DAILY, CHINA.
“Idiay Kenya, nasurok a 1,000 a mannursuro ti nasesante gapu iti seksual a panangabusoda iti babbai nga estudiante iti napalabas a dua tawen. . . . Sigun iti maysa a kompidensial ken pagpatulongan a linia ti telepono . . . nasaksaknap ti problema ngem iti pagarupda.”—DAILY NATION, KENYA.
Naammuan iti maysa a panagadal a dagiti agus-usar iti tanning bed (pangpakayumanggi iti kudil) ket 75% a dakdakkel ti posibilidad nga agkanser ti kudilda ngem kadagidiay di pulos nagusar iti kasta. Dagidiay nagusar iti kasta nga alikamen iti nasurok a 50 nga oras ket 2.5 agingga iti 3 a daras nga ad-adda nga agkanser ti kudilda.—CANCER EPIDEMIOLOGY, BIOMARKERS & PREVENTION, U.S.A.
“Para [kadagiti naitulagen a maikasar a taga-Canada], 8% laeng ti mamati a di umiso ti makidenna sakbay ti kasar,” ken “74% ti agkabkabbalayen sakbay ti kasarda.”—WEDDINGBELLS, CANADA.
Dagiti Peggad ti Narugit a Danum
Sigun iti report ti United Nations, “ad-adu a tattao ti matmatay gapu iti kontaminado ken narugit a danum ngem iti amin a kita ti kinaranggas a pakairamanan dagiti gubat.” Impadamag ti UN a dua a milion a tonelada ti basura—manipud agrikultura ken industria, agraman balbalay ken dadduma pay—ti inaldaw a mayanud kadagiti karayan ken baybay. Gapu iti dayta, agwaras ti sakit ken madadael dagiti sistema ti ekolohia. Kada 20 met a segundo, adda matay nga ubing nga awan pay lima ti tawenna gapu iti sakit a nainaig iti narugit a danum. Kuna ni Achim Steiner nga executive director ti UN Environment Programme: “Tapno sumayaat ti kasasaad ti lubong, . . . nasken a pagtitinnulongantayo a solbaren ti problematayo mainaig iti basura.”
Panagkanta Tapno Agsubli ti Panagsao
Ti panagkanta ket makatulong iti adu a pasiente a naistrok tapno makasaoda manen. Iparparegta dagiti neurologist kadagiti naistrok nga ikantada ti kayatda nga isao ken idayyengda dagiti pampanunotenda. Nagsayaat ti resulta daytoy a panangagas a maawagan iti melodic intonation therapy. Kalpasan ti 15 a lawas, “in-inut a nasursuro dagiti pasiente nga isao dagiti inkantada,” kuna ti The Wall Street Journal.
“Kimmaro ti Panagkusit Dagiti Estudiante”
Idi napagsaludsodan ti 20,000 a kasserrek nga estudiante iti unibersidad idiay Canada, 73% ti “nangamin nga idi haiskulda pay, naminsan wenno namin-adu a nagkopia wenno nagkodigoda,” kuna ti Canadian Council on Learning (CCL). Impadamag ti maysa nga unibersidad a ti panagkusit ken panagsakar ket immadu iti 81% bayat ti 2003 agingga iti 2006. “Iti napalabas a dekada,” kuna ni Dr. Paul Cappon, a presidente ti CCL, “ti internet ken dagiti baro a gadyet ti makagapu a kimmaro ti panagkusit dagiti estudiante.”