“Pagyamanan iti Daytoy a Serye!”
● Adu a tao iti intero a lubong ti agyamyaman iti serye ti Agriingkayo! nga “Adalen ti Pamilia” iti panid 30 ken 31 iti kada ruar daytoy a magasin. Makaisuro ken nakaay-ayat iti intero a pamilia dagiti ladawan, saludsod, makartib ken maurnong a Bible card, ladladawan a biroken ti ubbing, ken dagiti benneg nga agpaay iti aktibidad ti pamilia. Adtoy dagiti insuratda:
“Babaen iti koreo, iyad-adalak iti Biblia ti dua nga apokok nga agtawen iti 12. Pasungbatak kadakuada ti kopia ti ‘Adalen ti Pamilia’ sada ipatulod kaniak dagita a panid. Talaga a magusgustuan dagiti apokok ti panagadalmi. Gapu iti panagsisinnuratmi, ad-adu a punto ti mailawlawagko. Pagyamanan iti daytoy a serye!”
V. C., Estados Unidos
“Itay nabiit, sakbay a maturog ti 5 ti tawenna nga anakko, kiniddawna a sungbatanmi ti ‘Ania ti Di Umiso iti Daytoy a Ladawan?’ Nakabirokak iti maysa, ket rinugianmi a nagsaritaan ti ladawan. Nagimdeng a naimbag bayat a binasak ti salaysay manipud iti mismo a Biblia. Ita, dandani rinabiin a kayatna nga agadalkami. Naimpusuan nga agyamankami a sangapamiliaan ta tultulonganyo dagiti annakmi a maay-ayo iti Biblia.”
M. F., Francia
“Naam-ammok ti 12 ti tawenna a ni David ken ti 6 ti tawenna a ni Jennifer iti maysa nga estasion ti bus. Nakita ti amada a mangmangtedak iti Agriingkayo! kadagiti pasahero isu a pinalubosanna ida nga umasideg kaniak. Bayat a basbasaen ni David ken ti amana dagiti magasin, nagustuanmi ken ni Jennifer nga inadal dagiti nagpipintas a ladawan dagiti tumatayab ken animal. Nagsaritaanmi ti amin a napipintas nga inaramid ni Jehova a Dios agpaay kadatayo. Idi nakadanonkami iti panid 31, pinadasmi ti ‘Ubbing, Birokenyo Dagiti Ladawan.’ Sapsapulek pay la ti umuna a ladawan, sipapartak nga uk-ukradenen ni Jennifer dagiti panid ket dagus a nabirokanna dayta. Pinadasmi a biroken ti maikadua ken ti maikatlo, ket isu manen ti immuna a nakakita. Saan a nagsardeng ni Jennifer agingga a nalpasmi a biroken ti amin a ladawan iti 10 a nagduduma a ruar! Kamaudiananna, dimmawat ni Jennifer iti dua pay a magasin nga itedna ken ni tatangna ken ni manongna. Idi pumanawakon, nagyamanda a tallo iti daytoy nagsayaat a magasin.”
M. C., Ecuador