Dagiti Marigrigatan nga Estudiante

NI Jennifer a 17 anyos ket maysa kadagiti kalaingan iti klaseda. Makiramraman kadagiti ekstrakurikular nga aktibidad ken padpadayawan dagiti mannursurona ken mamalbalakad idiay eskuelaan. Ngem iti tawen sakbay ti panagturposna, masansanen a nakaro ti panagsakit ti ulona ken kanayon a makasarsarwa. Ipapanna a ti napaut ken napasnek a panagad-adalna iti leksionna ken ti panagpuypuyatna ti makagapu iti panagsakitna.

Saan la a ni Jennifer ti kasta. Umad-adu dagiti estudiante a marigrigatan unay iti panageskuelada. Dadduma kadakuada ti agpakpakonsulta payen kadagiti doktor nga eksperto iti sakit ti isip. Gapu iti dayta, maysa a grupo dagiti edukador idiay America ti nangbuangay iti programa tapno mapalag-anan dagiti estudiante kadagiti pakarigatanda iti eskuelaan. Ti programa ket naawagan iti Challenge Success.

No maysaka nga estudiante, nalabit a kas met ken Jennifer ti kasasaadmo. Wenno no maysaka nga ama wenno ina, mabalin a mapalpaliiwmo a kanayon a marigrigatan ti anakmo tapno agballigi iti panageskuelana. Ania ngata ti epektibo a makatulong kadagiti estudiante ken nagannak?