Agimtuod Dagiti Agtutubo

Dakes Kadi ti Agbalin a Popular?

Isuratmo ti sao a mangkompleto iti sumaganad:

․․․․․ a nasayaat ti agbalin a popular.

A. Kanayon
B. Sagpaminsan
C. Saan a pulos

TI UMISO a sungbat ket “B.” Apay? No ngamin popularka, kaipapananna a magusgustuannaka ti adu a tao—ket saan a kanayon a dakes dayta! Impakpakauna ti Biblia a dagiti Kristiano ket agbalin a “silaw dagiti nasion” ken magustuan ida dagiti tattao. (Isaias 42:6; Aramid 13:47) Iti dayta nga anag, makuna a popular dagiti Kristiano.

Ammom kadi?

Popular ni Jesus. Uray idi ubing pay, nagun-odnan ti “pabor ti Dios ken dagiti tattao.” (Lucas 2:52) Kuna pay ti Biblia nga idi agkabannuagen ni Jesus, “simmurot kenkuana dagiti dadakkel a bunggoy manipud Galilea ken Decapolis ken Jerusalem ken Judea ken manipud iti sabali a bangir ti Jordan.”—Mateo 4:25.

Apay a nasayaat dayta?

Gapu ta di tinarigagayan ni Jesus ti maidaydayaw wenno dina inkagumaan ti agbalin a popular. Saan met nga agbibisin iti anamong ti sabsabali. Inaramidna laeng ti umiso—ket no dadduma, dayta ti makagapu nga adu ti naay-ayo kenkuana. (Juan 8:29, 30) Nabigbig met idi ni Jesus a temporario laeng ti aniaman nga anamong a magun-odanna iti publiko ta agbaliwbaliw ti panunotda. Imbagana nga isu ket papatayen dagiti tattao!—Lucas 9:22.

Laglagipem:

Ti panagbalin a popular ket umasping iti kinabaknang. Saan a kanayon a dakes ti maaddaan iti dayta. Ti problema ket ti ar-aramiden dagiti tattao tapno magun-od wenno mataginayonda dayta.

Pakdaar!

Adu nga agtutubo ti mangaramid iti aniaman tapno agbalinda a popular. Ti dadduma ket manangpagusto iti tattao, a sumursurotda lattan iti kaaduan. Adda met dagidiay siga a mangpilit kadagiti tattao a manggusto kadakuada—nupay gapu laeng dayta iti buteng.a

Kadagiti sumaganad a panid, usigentayo ti dua a napeggad a dalan iti panagbalin a popular. Kalpasanna, kitaentayo ti nasaysayaat a ruta.

Ad-adu pay nga artikulo ti masarakan iti serye a “Young People Ask” iti Web site a www.watchtower.org/ype

a Dinakamat ti Biblia dagiti siga a naawagan iti “Nefilim” a natukoy met kas “agdindinamag a lallaki.” Agpasindayag ti kangrunaan a panggepda.—Genesis 6:4.

DAGITI DALAN ITI PANAGBALIN A POPULAR

MANANGPAGUSTO ITI TATTAO

Kayatko nga anamongandak.
Tapno maalak dayta, nasken a tuladek ti kababalinda.

“Inkagumaak a baliwan ti kababalinko tapno akseptarendak. Idi damo, kasla mayat. Ngem idi agangay, naamirisko a di kasapulan nga agbaliwak tapno laeng akseptarendak.”—Nicole.

Prinsipio ti Biblia: “Dimo aramiden ti maysa a banag gapu laeng ta ar-aramiden dayta ti amin. . . . Dika agpaallukoy kadakuada nga agaramid iti dakes.”—Exodo 23:2, Holy Bible—Easy to Read Version.

TI SIGA

Magusgustuandakon ket kayatko nga agtalinaed a kasta.
Aramidek ti amin tapno agtalinaedak a popular uray no adda mapasaktak.

“Masansan a nauyong dagiti agtutubo, ket gapu ta mas popular dagiti siga, ipagarup ti managbabain a husto ti aniaman nga ibagada.”—Raquel.

Prinsipio ti Biblia: “Kas iti kayatyo nga aramiden kadakayo dagiti tattao, isu met laeng ti aramidenyo kadakuada.”—Lucas 6:31.

NASAYSAYAAT A RUTA

Ammuem dagiti prinsipiom. Kuna ti Biblia a dagiti nataengan a tattao ket ‘nasanay a mangilasin agpadpada iti umiso ken di umiso.’—Hebreo 5:14.

No surotem ti tallo a punto iti kannigid, mabalin a maksayan ti kinapopularmo—ngem makaay-ayokanto kadagiti nasayaat a tattao!
Itakderam ti pammatim. Agbalinka a kas ken Josue a sikokompiansa a nagkuna: “Agpilikayo ita nga aldaw maipaay iti bagbagiyo no siasino ti pagserbianyonto . . . Ngem no maipapan kaniak ken iti sangakabbalayak, agserbikamto ken Jehova.”—Josue 24:15.
Agtalekka iti dalan a pinilim. Impalagip ni apostol Pablo ken Timoteo: “Ti Dios inikkannatayo saan a ti espiritu ti kinatakrot, no di ket ti pannakabalin.”—2 Timoteo 1:7.