Aggayyemkami Laeng Kadi​—Wenno Nalablabes Pay Ngem iti Dayta?, Paset 1

ADDA KADI PARTIKULAR A TAO A MALAGIPMO NO MABASAM TI PAULO ITI NGATO?

ADDA → BASAEM A DAGUS DAYTOY NGA ARTIKULO. MABALIN A NASKEN A MABASAM A DAGUS DAYTOY.

AWAN → BASAEM LATTA DAYTOY. MAKATULONG DAYTA KENKA TAPNO MAPAGTALINAEDMO A NADAYAW KEN AWAN PROBLEMA TI PANNAKIGAYYEMMO ITI KASUNGANIM A SEKSO.

Markaam no umiso wenno di umiso:

Diak rumbeng a makigayyem kadagiti kasungani a sekso no saanak pay a nakasagana iti serioso a relasion a mabalin nga agtungpal iti panagasawa.

․․․․․ UMISO ․․․․․ DI UMISO

Usigem: Nakigayyem ni Jesus iti babbai nupay awan planona a mangasawa. (Mateo 12:46-50; Lucas 8:1-3) Nabatad a kasta met ni Timoteo ta binagaan ni apostol Pablo a tratuenna dagiti “ub-ubing a babbai a kas kakabsat a babbai buyogen ti isuamin a kinadalus.”​—1 Timoteo 5:1, 2.

Ammo la ketdi ni Pablo a bayat nga agserbi ni Timoteo kadagiti kongregasion, adu a babbalasang ti maam-ammona. (Marcos 10:29, 30) Dakes kadi a makigayyem ni Timoteo kadakuada? Saan. Ngem gapu ta awan pay planona a mangasawa, masapul a mangaramid kadagiti limitasion tapno saan a matnag ti riknana iti maysa kadakuada. Sigurado a saan met a nagalembong kadakuada wenno dina met inay-ayam ti riknada.​—Lucas 6:31.

Sika ngay? Nakasaganaka kadin a mangasawa wenno makiasawa?

No WEN ⇨ Ti pannakigayyemmo kadagiti kasungani a sekso ket mabalin nga agresulta iti pannakasarakmo iti agbalin nga asawam.​—Proverbio 18:22; 31:10.

No SAAN ⇨ Masapul a mangaramidka iti limitasion. (Jeremias 17:9) Nalaka kadi nga ibaga ngem narigat nga aramiden? Wen! “Narigat nga agtalinaed nga aggayyem laeng ti maysa a lalaki ken babai,” kinuna ti 18 anyos a ni Nia.a “Narigat nga ammuen dagiti aramiden a limitasion.”

Apay a nasken pay laeng a mangaramidka kadagiti limitasion? No ngamin awan, sigurado a masaktanka wenno adda mapasaktam. Usigem no apay.

REALIDAD: No matnag ti riknam a dika pay nakasagana iti serioso a relasion, sigurado nga adda masaktan. “Naminduan a napasamak kaniak dayta,” kinuna ti 19 anyos a ni Kelli. “Idi damo, adda nagustuak a baro. ‘Diay met simmaruno, adda nagkursonada kaniak a baro. Agpadpada nga adda nasaktan, ken diak pulos malipatan ti nagsaem a resultana.”

Panunotem:

● Kadagiti ania a kasasaad nga umiso a makilangenka kadagiti kasungani a sekso? Ania dagiti situasion a rumbeng a liklikam?

● Apay a di nainsiriban a maymaysa la a kanayon ti kadkaduam? Ania ti mabalin a panunotenna? Ania ti mabalin a panunotem?

“No dadduma, loklokuek ti bagik ta ibagbagak nga ‘aggayyemkami laeng. Kabsat laeng ti pangibilangak kenkuana.’ Ngem idi adda sabalin nga ipakpakitaanna iti atension, nasaktanak ta panagriknak, siak laeng ti rumbeng a pangaramidanna iti kasta.”​—Denise.

Ti kuna ti Biblia: “Makita ti manakem ti dumteng a riribuk ket liklikanna, ngem sarakusoken ti saan nga agpampanunot a tao ket agbabawi kalpasanna.”​—Proverbio 22:3, Ti Baro a Naimbag a Damag Biblia.

REALIDAD: No matnag ti riknam a dika pay nakasagana iti serioso a relasion, mabalin a maawananka iti nasayaat a gayyem. “Adda kateksko,” kuna ti 16 anyos a ni Kati, “ngem di nagbayag, agal-alembongen. Dandani inaldaw nga agtintinnekskamin. Pagammuan ta imbagana a kursonadanak ken kayatnak a manobia. Ti adatna, awan a pulos ti sumgar a dutdotko kenkuana. Idi imbagak dayta, manmanokamin nga agsarita ken nagpatinggan ti panaggayyemmi.”

Panunotem:

● Iti situasion ni Kati, asino ti nasaktan ken apay? Naliklikan koma kadi ni Kati wenno ti lalaki ti nasaktan? No wen, kasano?

● Iti pannakiteks, kasano a di inggagara a maipasimudaag ti maysa a saan la a ti panaggayyem ti kayatna?

“No dadduma, rumbeng a kontrolek ti bagik. Naragsak a gayyem dagiti lallaki ngem diak kayat a madadael ti panaggagayyemmi no agbalin a nalablabes ngem iti dayta ti relasionmi.”​—Laura.

Ti kuna ti Biblia: “Annadan ti manakem ti pannagnana.”​—Proverbio 14:15, Ti Baro a Naimbag a Damag Biblia.

Laglagipem: Saan met ketdi a dakes ti makilangen iti kasungani a sekso. Ngem no dika pay nakasagana iti serioso a relasion nga agtungpal iti panagasawa, masapul a mangaramidka kadagiti limitasion.

ITI SUMAGANAD NGA “AGIMTUOD DAGITI AGTUTUBO . . . ”

No matnag ti riknam a dika pay nakasagana iti serioso a relasion, mabalin a madadael ti reputasionmo. Ammuem no apay.

Ad-adu pay nga artikulo manipud iti serye a “Young People Ask” ti masarakam iti Web site a www.watchtower.org/ype

[Footnote]

[Kahon/Ladawan iti panid 16]

ANIA TI ARAMIDEM?

KAPADASAN: “Tineksko ti maysa a gayyem a nasurok a 1,500 a kilometro ti kaadayo ti pagnanaedanna. Agtintinnekskami nalabit maminsan kada lawas. Diak kursonada ket panagkunak, dinak met kursonada. Ngem pagammuan ta adda aldaw a tineksnak iti ‘Hi, beautiful! I miss you. Komustakan?’ Naklaatak! Imbagak a gayyem laeng ti pangibilangak ken awan riknak kenkuana. Nag-reply iti ‘Whatever.’ Sipud idin, saanen a pulos a nagteks pay.”​—Janette.

● No dika pay nakasagana wenno awan planom a sumrek iti serioso a relasion, ania ti isungbatmo no adda nagteks kenka iti kas iti naawat ni Janette?

● No maysaka a lalaki, maitutop kadi ti naiteks ken Janette? Apay a kasta ti sungbatmo?

● Panagkunam, nalaklaka kadi a matnag ti rikna ti maysa iti pannakiteks ngem iti aktual a pannakisarita? Apay a kasta ti sungbatmo?

[Kahon iti panid 17]

DAMAGEM ITI NAGANNAKMO

Damagem iti nagannakmo no ania ti makunada kadagiti saludsod kalpasan ti dadakkel a tulnek iti daytoy nga artikulo. Agduma kadi ti kapanunotanyo? No wen, kasano? Ania ti nakitam a pagsayaatan ti kapanunotanda?​—Proverbio 11:14.

[Kahon/Dagiti Ladawan iti panid 17]

TI KUNA DAGITI PADAM NGA AGTUTUBO

Joshua​—No masansan a makikomunikarka iti isu met la a tao, dakdakkel ti posibilidadna a matnag ti riknam.

Natasha​—Uray no kayatmo nga aggayyemkayo laeng, matnag ti rikna ti maysa wenno matnag ti riknayo a dua no kanayonkayo nga agkadua.

Kelsey​—Uray no aggayyemkayo iti damo, nalaka nga agbaliw ti riknayo no masansan nga agkaduakayo. Posible met ketdi nga agtalinaedkayo nga aggayyem laeng ngem nasken a manakem ken naannadkayo.

[Ladawan iti panid 16]

Agproblemakanto laeng no matnag ti riknam a dika pay nakasagana iti serioso a relasion