SALUDSOD DAGITI AGTUTUBO
Panaggayyem Laeng Wenno Ayat?—Paset 2: Ipakpakitak Kadi a Kasla Adda Riknak Kenkuana?
Kayatmo a kanayon nga adda tiempom no kasapulan dagiti gagayyemmo ti kasarita. Ket iti nabiit, kanayonmo a kasarsarita ti maysa a gayyemmo. Ngem ti problema, saanmo isuna a kasekso. ‘Aggayyemkam laeng,’ ibagbagam iti bagim ket pampanunotem a kasta met laeng ti riknana. Adda kadi rason tapno agdanagka?
Ti mabalin a mapasamak
Saan a dakes nga adda gagayyemmo a dimo kasekso. Ngem kasanon no agbalin a mas espesial ti relasionmo iti maysa kadakuada? No kasta ti mapasamak, mabalin nga ipapanna nga adda riknam kenkuana.
Kasta kadi a talaga ti kayatmo a panunotenna? Ammuem ti dadduma a rason no apay a mapasamak dayta uray saan met a kasta ti intensionmo.
Sobra ti it-itedmo nga atension iti gayyemmo.
“Saanmo a makontrol ti rikna ti sabali a tao. Ngem ad-adda a matnag ti riknana kenka no ibagbagam nga aggayyemkay laeng ngem kanayonmo met a tawtawagan ken kasarsarita.”—Sierra.
Subsubadam ti atension nga it-ited ti gayyemmo.
“Kanayon idi nga agteteks kaniak ti maysa a balasang. Saan a siak ti umun-una nga agteks, ngem ag-reply-ak met kada agteks. Idi kuan, marigatanakon a mangibaga kenkuana a gayyem laeng ti pangibilangak kenkuana.”—Richard.
Ipakpakitam a kayatmo nga ikkannaka iti atension ti gayyemmo.
“Para iti dadduma, ay-ayam laeng ti flirting. Ay-ayamenda ti rikna ti sabsabali nga awan met a talaga ti planoda a sumrek iti maysa a relasion. Nagadun ti nakitak a kasta, ket adda nga adda ti nasaktan.”—Tamara.
Konklusion: No kanayon a makisarsaritaka iti maysa a gayyemmo ken kanayon nga ik-ikkam iti atension, kasla ibagbagam nga adda riknam kenkuana.
No apay a napateg
Masaktan ti gayyemmo.
Ti kuna ti Biblia: “Ti inanama a maitantan pagsakitenna ti puso.” (Proverbio 13:12) Ania ti mabalin a namnamaem no kanayon nga ipakpakita ti maysa a kasla adda riknana kenka?
“No awan met planom a maki-boyfriend wenno maki-girlfriend ngem baybay-am a matnag ti rikna ti maysa kenka, kaslaka la nakabanniit iti ikan ngem dimo met alaen wenno ibulos. No kasta ti aramidem, sigurado a masaktan dayta a tao.”—Jessica.
Madadael ti reputasionmo.
Ti kuna ti Biblia: “Saan la a ti pagimbaganyo ti kitaenyo. Kitaenyo met ti pagimbagan ti tunggal maysa.” (Filipos 2:4, Ti Baro a Naimbag a Damag Biblia) Ania ti maikunam iti maysa a tao a bagina laeng ti pampanunotenna? Ania ti mabalin nga epektona dayta iti reputasionna?
“Diak kayat ti lalaki nga ang-angaw a mangipakpakita iti romantiko nga interes kadagiti babbai. Mabalin a pakakitaan dayta a saanto isuna a matalek iti agbalin nga asawana. Us-usarenna ti sabsabali tapno dumakkel ti kompiansana iti bagina. Ti kasta a tao bagina laeng ti pampanunotenna.”—Julia.
Konklusion: Ti maysa a tao a mangipakpakita a kasla adda riknana iti gayyemna ngem awan met planona a sumrek iti maysa a relasion saksaktanna ti gayyemna ken ti bagina.
Ti mabalinmo nga aramiden
Kuna ti Biblia a tratuentayo dagiti “ub-ubing a lallaki a kas kakabsat a lallaki” ken dagiti “ub-ubing a babbai a kas kakabsat a babbai buyogen ti isuamin a kinadalus.” (1 Timoteo 5:1, 2) No surotem dayta a prinsipio, saan a madadael ti pannakigayyemmo kadagiti dimo kasekso.
“Inton adda asawak, diakto ag-flirt iti asawa ti sabali. Isu nga ita ta awan pay asawak, nasayaat nga annadak ti pannakikaduak ken pannakisaritak iti saanko a kasekso.”—Leah.
Sigun iti Biblia, dakdakkel ti posibilidadna nga agbasol ti maysa no adu ti maibagana. (Proverbio 10:19) Pudno dayta a prinsipio saan laeng nga iti pannakisarita no di ket uray iti pannakiteks. Ramanenna pay ti kasansan ti panagteksmo ken no ania ti ibagbagam.
“Apay koma nga inaldaw a teksam ti maysa a balasang no awan met planom nga agbalin isuna a girlfriend?”—Brian.
Kuna ti Biblia: “Ti sirib manipud ngato umuna iti amin nadalus.” (Santiago 3:17) No dadduma, mabalin nga arakupen ti maysa ti gayyemna nga awan aniaman a kaipapananna. Ngem mabalin met nga ipapan ti gayyemna a panangipakita dayta nga adda riknana kenkuana.
“No makisarsaritaak iti maysa a gayyem, kayatko nga ipakita a mannakigayyemak, ngem saanak unay nga umasideg ken ikagumaak a saan a personal a banag ti pagsaritaanmi.”—Maria.
Konklusion: Panunotem a naimbag ti pannakikaduam ken pannakisaritam iti dimo kasekso. “Narigat ti agbirok iti nasayaat a gayyem,” kuna ti tin-edyer a ni Jennifer, “ket sigurado a saanmo a kayat a madadael ti nasayaat a relasionmo iti gayyemmo babaen ti panangaramidmo iti maysa a banag a posible nga agbalin a rason tapno ipapanna nga adda riknam kenkuana.”
Tip
Ikabilangam ti ibagbaga ti sabsabali. No adda agdamag kenka, “Dakay kadin ken ni . . . ?” mabalin nga ipakita dayta a nadekketkayo unayen.
Agpapada koma ti panangtratom kadagiti gagayyemmo a saanmo a kasekso. Awan koma ti tratuem a mas espesial wenno ikkam iti ad-adu nga atension.
Agbalinka a naannad iti panagteksmo. Ramanen dayta ti kasansan ti panagteksmo, ti iteteksmo, ken ti oras ti panagteksmo. Kuna ti maysa a balasang nga agnagan Alyssa, “Apay koma a teksam ti maysa a dimo kasekso iti tengnga ti rabii?”