Apektadotayo Amin iti Kinaranggas

ASINO kadatayo ti di apektado iti kinaranggas? Kanayon a madamagtayo dayta. Mabutbutengtayo iti kalsada ken iti trabaho amangan no adda mangranggas kadatayo. Maipaspasango met dagiti ubbing iti dayta gapu kadagiti siga idiay eskuelaan. Uray iti pagtaengan, a kadawyan a natalged koma ti rikna ti tattao gapu kadagiti nakakandado a ridawda, minilion ti mabutbuteng​—nangruna dagiti babbai. Kinapudnona, depende iti pagiliam, agingga iti 70% kadagiti babbai ti nangibaga a dinangran ida ti asawa wenno kabkabbalayda.

Iti adu a pagilian, pagbutbutngan ti tattao dagiti naranggas a panagraranget iti politika wenno kagimongan wenno uray ti terorismo. Agminar dagita iti iyaadu ti CCTV (closed circuit television) wenno surveillance camera iti dadduma a pagilian, nangruna kadagidiay puntiria dagiti terorista.

Gapu iti dayta, pumigpigsa nga industria ti panaglako iti CCTV uray nagsuek ti sangalubongan nga ekonomia. Siasino ti agbayad para iti dayta? Datayo met laeng babaen iti buis ken dadduma pay a babayadan. Mabalin a dumakkel pay ti magasto kadagita bayat a rumangrang-ay, sumaksaknap, ken nguminngina dagiti pamuspusan a panglapped iti kinaranggas.

Dagiti makapadanag nga epekto ti kinaranggas ti mangtignay koma kadatayo a mangsukimat kadagiti prinsipio ken patpatientayo. Usigen dagiti sumaganad nga artikulo dagitoy a saludsod: Ania ti paset ti media iti panagsaknap ti kinaranggas? Ania a bambanag ti mangimpluensia iti panangmatmattayo iti kinaranggas? Kasanotayo a masalakniban kadagiti dakes nga impluensia?