Panangmatmat iti Lubong
Iti Republic of Georgia idiay abagatan a daya a Europa, “dandani nagdoble ti bilang dagiti nagdiborsio iti napalabas a 10 a tawen.” Awan pay 20 anyos ti kaaduan kadagiti nagdiborsio.—FINANCIAL, GEORGIA.
Idiay Ireland, 17% kadagiti 11-16 anyos “ti nakaiteden iti kompleto a naganda iti Internet iti maysa a dida pay pulos personal a naam-ammo.” Adda met 10% a nangted iti bukodda nga “email address, numero ti selpon wenno retrato.”—THE IRISH SOCIETY FOR THE PREVENTION OF CRUELTY TO CHILDREN.
Agarup 4% laeng kadagiti napuoran a bakir iti intero a lubong ket natural ti nakaigapuanna. Tattaon ti makinggapuanan iti dadduma—inggagarada man dayta wenno gapu iti kinaliwayda.—PRESSEPORTAL, GERMANY.
“Kinuna ti dandani 1 iti kada 10 nga Americano [agtawen iti 12 wenno nasursurok pay] a kanayon nga agus-usarda iti maiparit a droga, a pakairamanan ti marijuana, cocaine, heroin, hallucinogen, inhalant wenno maireseta nga agas ngem mausar iti di umiso a pamay-an.”—USA TODAY, U.S.A.
Napateg ti Panagteppel iti Panagballigi
“Sigun iti panagadal, no awan panagteppel ti agtutubo, mabalin nga agproblemanto iti salun-at, kuarta, ken makaaramid iti krimen inton adulto,” kuna ti magasin a Time. Naadal ti kabibiag ti nasurok a 1,000 a tattao sipud nayanakda agingga nga agtawenda iti 32. Idi adultodan, “dagidiay nadardarasudos ken nalaklaka a masuron ken di unay makatuttutor wenno di makaan-anus [idi ubbingda]” ket agarup mamitlo a daras a posible nga isuda ti mangibaga a nakapuy ti salun-atda, bassit ti sapulda, agsolsoloda a nagannak, wenno nakaaramidda iti krimen. Ngem “ti panagteppel ket mabalin a masursuro,” kuna ti magasin. Innayonna: “No dagiti ubbing ket isuro ti eskuelaan ken ti pamiliada nga agteppel bayat ti kinaubingda, nasalsalun-at ken nabalballigida inton adultodan.”
Tapno Agnakem Dagiti Tuso a Drayber
Padpadasen dagiti autoridad idiay India dagiti baro a pamay-an a mamagnakem kadagiti sobra ti kinatusona a drayber: pagtrabahuenda ida kas para-trapik a polis. Ti kalatda ket tapno maawatan a mismo dagiti drayber ti perhuisio a patpataudenda. Ita, imbes a pasardengenda laeng dagiti nakabasol a drayber sada multaen ida, dagiti polis iti Gurgaon, idiay amianan a laud nga India, bilinenda met dagita a drayber a makikaduada kadagiti para-trapik a polis iti kagudua oras wenno nasursurok pay tapno urnosenda ti trapik. Admitiren ti dadduma a nakasursuroda iti dayta isu a nagbalbaliwda. “Ag-1000 a drayber ti matiliw [mamulta] kada aldaw ditoy Gurgaon,” kuna ni Bharti Arora a deputy commissioner ti polisia iti dayta a lugar. “Bale adda 1000 nga ekstra a para-trapikmi kada aldaw.”