Naipablaaken iti nasurok a 100 a lengguahe ti minilion a kopia ti Apply Yourself to Reading and Writing, bokleta a makatulong iti panagsursuro nga agbasa ken agsurat

Panagadal iti Biblia—Makatulong iti Panagsursuro nga Agbasa ken Agsurat

“Kalintegan ti tao ti agsursuro nga agbasa ken agsurat. Makatulong dayta tapno maaddaan iti talek iti bagi ken mapasayaatna ti pannakilangenna ken ti kasasaadna.”—UNESCO.a

IPAKITA dagiti report nga iti intero a lubong, nasurok a 700 a milion a tattao nga agtawen iti 15 ken nasursurok pay ti saan a makaammo nga agbasa wenno agsurat. Kas resultana, saanda a kabaelan nga ammuen dagiti nagadu a pannakaammo, a pakairamanan dagiti nagsasayaat a sursuro ti Biblia maipapan iti moral ken iti naespirituan a ‘naisurat a pakasursuruantayo.’ (Roma 15:4) Dayta ti gapuna nga iti adu a pagilian, inraman dagiti Saksi ni Jehova ti panangisuro nga agbasa ken agsurat iti programada a panagadal iti Biblia—amin ket libre. Nagballigi kadi dayta?

Kitaentayo ti trabaho dagiti Saksi ni Jehova idiay Mexico, maysa a pagilian a kaaduan ti agsasao iti Spanish. Manipud 1946, nasuroken a 152,000 a tattao ti nasuruan dagiti Saksi nga agbasa ken agsurat. Nagbalin a mannursuro ti kaaduan kadakuada idi agangay. Kas pammadayaw iti trabahoda, nakaawat dagiti Saksi iti adu a surat manipud iti gobierno. Kuna ti maysa a surat: “Bigbigen ken padayawan ti General Board of Education ti tulongyo iti pannakapasayaat ti Adult Education Program.”

Adda dagiti ubbing ken nataengan a natulongan iti programa a panagsursuro nga agbasa ken agsurat. Kas pagarigan, 101 ti tawen ni Josefina idi nagenrol iti dayta a kurso ket nalpasna iti dua a tawen!

Uray no Spanish ti kangrunaan a pagsasao iti Mexico, saan la a dayta a lengguahe ti maus-usar iti panangisuro. Idi 2013, adda dagiti tattao iti walo a grupo ti katutubo a nakasursuro nga agbasa ken agsurat iti nakayanakanda a lengguahe babaen iti daytoy a programa.

Talaga a nagpateg nga ammom ti agbasa ken agsurat tapno adu ti masursurom. Ngem ti kapatgan iti amin, makatulong dayta iti amin a klase ti tattao tapno mabasada ti Biblia—ti libro a naggapu iti Dios a mabalin a mangwayawaya kadagiti tattao iti pannakaadipenda iti pampammati (superstitions), ulbod a narelihiosuan a sursuro, ken dakes nga ugali.—Juan 8:32.

a United Nations Educational, Scientific, and Cultural Organization.

PINAGSIDDAAWNA TI PAMILIANA

Nasursuro ni Daniel ti Mexican Sign Language babaen kadagiti DVD

Umel ni Daniel ken marigatan a makikomunikar. Kas resultana, kanayon a madismaya isu a riawanna dagiti kapamiliana. Idi agarup 23 ti tawen ni Daniel, adda umel a Saksi nga agnagan iti Josué a nangyadal kenkuana iti Biblia. Idi damo, inusarna ti senias agraman dagiti drowing. Kalpasanna, nasursuro ni Daniel ti Mexican Sign Language babaen iti DVD.b

Idi naawatanen ni Daniel ti isursuro ti Biblia, napatanorna ti ibagbaga ti Biblia a “baro a personalidad.” Karaman iti dayta ti “pannakipagrikna, kinamanangngaasi, kinapakumbaba ken mabayag a panagitured.” (Colosas 3:10, 12) Tinungpal met ni Daniel ti balakad ti Biblia nga agtulnog kadagiti nagannak ken maaddaan iti respeto kadakuada. (Efeso 6:1, 2) Nasdaaw ti pamiliana! Kinapudnona, uray la nakalua ti nanang ni Daniel a nagyaman ken Josué ta tinulonganna ni Daniel iti naespirituan. Idi 2007, nagpabautisar ni Daniel kas maysa a Saksi ni Jehova.

b Idiay Mexico, ti 46 a publikasion dagiti Saksi ni Jehova ket magun-odanen iti Mexican Sign Language a DVD. Naglaon ti Website-mi a jw.org kadagiti publikasion a naipatarus iti agarup 80 a sign language. Adda met dagiti literatura iti Braille para kadagiti bulag.