Dagiti Edukasional a Programa

GAPU iti panangipategda iti trabahoda a panangisuro iti Biblia, mabalin a panunoten ti dadduma a saanda nga interesado iti sekular nga edukasion. Ngem saan a pudno dayta. Tapno maisurona dagiti sabsabali, ti maysa a mannursuro masapul nga agadal pay nga umuna, ket kalikaguman daytoy ti umiso a pannakasanay ken pannakaiwardas. Isu a malaksid pay iti pananggundaway a naimbag iti sekular a panagadal, adun a tawen a mabembenepisiaran dagiti Saksi ni Jehova iti nadumaduma nga edukasional a programa ken eskuelaan nga imatmatonan ti Watch Tower Society. Nakatulong dagitoy kadagiti Saksi ken dadduma pay a nangparang-ay iti bagbagida iti mental, moral, ken naespirituan a pamay-an.

Kas pagarigan, iti adu a pagilian naipasango dagiti Saksi iti maysa a naisangsangayan a karit​—no kasano nga isuro dagiti tattao a bassit laeng wenno awan a pulos ti gundawayda nga umawat iti umiso nga edukasion ket ngarud saanda nga ammo ti agbasa wenno agsurat. Tapno mapennek daytoy a panagkasapulan, nangorganisar ti Watch Tower Society kadagiti programa iti panagbasa ken panagsurat.

Idiay Nigeria, kas pagarigan, mangang-angay dagiti Saksi ni Jehova kadagiti klase iti panagbasa ken panagsurat sipud pay idi 1949. Idi 1961, rinibu a taga-Nigeria ti nakasursuro nga agbasa, ket ipakita dagiti rekord nga iti nagbaetan ti 1962 ken 1994, agdagup iti 25,599 pay a nataengan ti nasursuruan nga agbasa ken agsurat kadagitoy a klase. Impakita ti maysa a nabiit pay a surbey a nasurok a 90 porsiento kadagiti Saksi ni Jehova idiay Nigeria ti makabasa ken makasurat, no idilig iti nakurkurang ngem 50 porsiento iti intero a populasion. Idiay Mexico, mangang-angay ti Watch Tower Society kadagiti klase iti panagbasa ken panagsurat sipud pay idi 1946. Idi 1994, nasurok nga 6,500 a tattao ti nasursuruan nga agbasa ken agsurat. Iti nagbaetan ti 1946 ken 1994, nasurok a 127,000 ti natulongan nga agbasa ken agsurat. Naorganisar met dagiti klase iti panagbasa ken panagsurat iti adu a dadduma pay a pagilian, kas iti Bolivia, Cameroon, Honduras, ken Zambia.

Dagiti kasta a programa a panangisuro ket masansan a bigbigen dagiti autoridad iti edukasion kadagiti pagilian a pakaang-angayan dagitoy. Idiay Mexico, kas pagarigan, insurat ti maysa a kameng ti serbisio sibil: “Agyamanak iti pannakitinnulongyo, ket iti biang ti estado idanonko kadakayo ti napasnek unay a pammadayawda iti natan-ok ken narang-ay a trabahoyo maipaay iti pagimbagan dagiti tattao iti panangyegyo iti lawag ti pannakaammo kadagiti awan adalna. . . . Sapay koma ta agballigi ti trabahoyo a panangisuro.”

Ti Teokratiko nga Eskuelaan ti Panagministro

Gapu iti dakkel a panangipategda iti trabahoda a panangisuro iti Biblia, ikagkagumaan dagiti Saksi ni Jehova a parang-ayen ti abilidadda a mangilawlawag iti pannursuro ti Biblia kadagiti sabsabali. Tapno maipaay ti kastoy a tulong, iti tunggal maysa iti nasurok a 75,000 a kongregasion iti intero a lubong, linawas a maang-angay ti maysa a gimong a maaw-awagan iti Teokratiko nga Eskuelaan ti Panagministro. Agsisinnublat dagiti amin a nagpalista, Saksi man wenno saan, a mangipaay iti ababa a presentasion iti tallaong maipapan iti naituding a topiko. Kalpasanna, aniaman ti edadda, balakadan ti instruktor dagiti estudiante tapno masanayda a nalaing nga agbasa ken agsao iti publiko. Uray pay dagiti kaubingan, apaman nga ammodan ti agbasa, mabalinda ti agpalista ken umawat iti kastoy a pannakasanay, a makatulong met kadakuada iti dadduma pay a banag, a pakairamanan ti sekular a panagadalda. Adu dagiti edukador a nagkuna a nasayaat ti panangyeb-ebkas dagiti estudiante a Saksi iti kapanunotanda.

Kanayonanna, maparegta ti tunggal kongregasion dagiti Saksi ni Jehova a maaddaan iti libraria a naglaon kadagiti katulongan iti panagadal iti Biblia, diksionario, ken dadduma pay a reperensia iti Kingdom Hall-da, wenno paggigimongan. Daytoy a libraria ket mabalin nga usaren dagiti amin a tumabtabuno kadagiti gimong iti Kingdom Hall. Sipapasnek a maiparegta ti panagbasa kadagiti kongregasionda, ken maparegta met ti tunggal pamilia a maaddaan iti libraria a naglaon iti nadumaduma a publikasion tapno mapennek dagiti kasapulan ti ubbing ken natataengan.

Dadduma Pay nga Eskuelaan

Addaan met ti Watch Tower Society kadagiti eskuelaan a pagsanayan dagiti lallaki ken babbai kas misionero, kasta met dagiti eskuelaan a pagsanayan dagiti lallaki nga addaan iti ministerial a pagrebbengan kadagiti lokal a kongregasion. Dagitoy nga eskuelaan ket kanayonan a pammaneknek a dakkel ti panangipateg dagiti Saksi ni Jehova iti edukasion.