Ti Patpatien Ti Dadduma

Hindu

Patienda a mamin-adu a mayanak ti maysa a tao iti agduduma a bagi. Agsagaba wenno agrigat kano ti maysa a tao gapu kadagiti aramidna iti agdama wenno iti napalabas a biagna. Agpatingga dayta no maragpatna ti moksha, wenno no saanen a mayanak manen. Maaramidna dayta no masursurona a tallikudan dagiti bambanag iti lubong.

Muslim

Ibilangda ti panagrigrigat kas pannusa gapu iti basol ken pannubok iti pammati. Kuna ni Dr. Sayyid Syeed, a presidente ti Islamic Society of North America a dagiti trahedia ket palagip a “kanayon koma nga agyamantayo iti Dios gapu iti amin a bendisionna ken ditayo liplipatan a tulongan dagidiay agkasapulan.”

Tradision dagiti Judio

Mamatida nga agrigat ti maysa a tao gapu kadagiti bukodna nga aramid. Ibagbaga ti dadduma a Judio nga addanto panagungar tapno maipaayan iti hustisia dagiti inosente a nagsagaba. Isursuro ti Kabbalistic Judaism ti reinkarnasion a mangted iti maysa a tao iti adu a gundaway a mangilinteg kadagiti kamalina.

Budismo

Mamatida a mamin-adu a mayanak ti maysa a tao ken agtultuloy nga agrigat agingga nga isardengna dagiti negatibo nga aramid, emosion, ken pagannayasanna. No agbalin a masirib, agaramid iti naimbag, ken pagtalinaedenna a nadalus ti panunotna, maragpatna ti nirvana—ti kasasaad nga awanen ti rigat.

Confucianismo

Patienda a ti panagrigrigat ket kaaduanna a gapu iti “panagkamali ti tao,” kuna ti A Dictionary of Comparative Religion. Nupay isursuroda a maksayan ti panagrigrigat no agaramidka iti naimbag, mamatida a ti kaaduan a makagapu iti panagrigrigat ket “dagiti espiritu a parsua a nabilbileg ngem iti tao. Kadagiti kasta a kasasaad, awatenda lattan no ania ti gasatda.”

Dadduma a relihion dagiti tribu

Patienda nga agrigat ti maysa gapu iti espiritismo. Isursuroda a dagiti mangkukulam ket makayeg iti suerte wenno malas. Tapno makontra dagiti aramidda, adda dagiti maaramid a nagduduma a ritual. Gapuna, no agsakit ti maysa a tao, patienda a dagiti ritual ken agas dagiti arbulario ti mangsumra iti aramid dagiti mangkukulam.

Kristiano

Isursuroda a ti panagrigrigat ket gapu iti basol ti immuna a pagassawaan a nadakamat iti Genesis a libro iti Biblia. Ngem adu a relihioso a grupo ti nanginayon iti bukodda a kapanunotan iti dayta a sursuro. Kas pagarigan, ibagbaga ti dadduma a Katoliko a mabalinda a parigaten ti bagbagida kas ‘datonda iti Dios’ tapno gunggonaanna ti simbaanda, wenno tapno maisalakan ti maysa a tao.