1. Basol Kadi ti Dios ti Panagsagabatayo?
No Apay a Napateg a Maammuam ti Sungbat
Adu ti saan a mayat nga agserbi iti Dios ta ipabpabasolda kenkuana ti panagsagaba.
Panunotem
Adu a lider ti relihion ti direkta wenno saan a direkta a mangisursuro a ti Dios ti makagapu iti panagsagaba wenno panagrigrigattayo. Kastoy ti ibagbaga ti dadduma:
Dagiti natural a didigra ket pannusa ti Dios.
Matmatay dagiti ubbing ta kasapulan ti Dios ti ad-adu nga anghel idiay langit.
Adda dasdasigan ti Dios kadagiti gubat, a mangparparigat unay kadagiti tattao.
Ngem posible ngata a di umiso ti isursuro dagiti relihion maipapan iti Dios? Kasano no saan gayam nga akseptaren ti Dios ida?
AMMUEM TI AD-ADU PAY
Buyaem ti video nga Apay nga Adalem ti Biblia? iti jw.org/ilo.
Ti Kuna ti Biblia
Saan a ti Dios ti makagapu kadagiti panagsagabatayo.
No wen, maikontra dayta kadagiti kualidadna a nailanad iti Biblia. Kas pagarigan:
“Kinahustisia ti amin a [dalan ti Dios].” Isu ket “nalinteg ken naimbag.”—DEUTERONOMIO 32:4.
“Imposible nga agaramid ti Dios iti dakes, ken saan nga agaramid ti Mannakabalin-amin iti di umiso!”—JOB 34:10.
“Saan a killuen ti Mannakabalin-amin ti hustisia.”—JOB 34:12.
Saan nga awaten ti Dios ti relihion a di umiso ti isursurona maipapan kenkuana.
Karaman dagiti relihion a mangisursuro a ti Dios ti makagapu kadagiti panagrigrigattayo ken dagidiay makiramraman iti gubat ken kinaranggas.
“Ulbod ti ipadpadto dagiti propeta a mangus-usar iti naganko [ti Dios]. Saanko ida nga imbaon, binilin, wenno kinasarita. Agipadpadtoda kadakayo iti saan nga agpayso a sirmata . . . ken ti panangallilaw ti pusoda.”—JEREMIAS 14:14.
Binabalaw ni Jesus ti panaginsisingpet ti relihion.
“Saan a ti tunggal maysa nga agkuna kaniak, ‘Apo, Apo,’ makastrekto iti Pagarian ti langit, no di ket daydiay laeng mangar-aramid iti pagayatan ni Amak nga adda idiay langit. Adunto ti agkuna kaniak iti dayta nga aldaw: ‘Apo, Apo, saan aya a nagipadtokami iti naganmo, ken nangparuar kadagiti demonio iti naganmo, ken nagaramid iti adu a milagro iti naganmo?’ Ngem ibagakto kadakuada: ‘Saankayo nga am-ammo! Pumanawkayo, dakayo nga agar-aramid iti dakes!’”—MATEO 7:21-23.