Kapitulo 3
Ti Mangisagana iti Dalan Naipasngayen
NGANGNGANIN agpasngay ni Elisabet. Kadagiti napalabas a tallo a bulan, nakipagtaeng ni Maria kenkuana. Ngem ita panawenen nga agpakada ni Maria ket agdaliasat iti adayo nga agawid idiay Nasaret. Iti agarup innem a bulan uray isu, maaddaanto metten ti anak.
Di nagbayag kalpasan ti ipapanaw ni Maria, nagpasngayen ni Elisabet. Anian a rag-oda idi a naballigi ti panagpasngayna ket ni Elisabet ken ti maladaga nasalun-atda! Idi impakita ni Elisabet ti maladaga kadagiti kakaarrubana ken kakabagianna, nakipagrag-oda kenkuana.
Ti maikawalo nga aldaw kalpasan ti pannakaipasngayna, sigun iti Linteg ti Dios, ti maladaga a lalaki iti Israel masapul a makugit. Gapu itoy nga okasion immay simmarungkar dagiti gagayyem ken kakabagian. Kunada a ti ubing maipanagan koma ken amana, a Zacarias. Ngem simmungbat ni Elisabet. “Saan!” kunana, “no di ket maawaganto iti Juan.” Laglagipenyo, dayta ti nagan nga imbaga ni anghel Gabriel a maitedto iti ubing.
Nupay kasta, sinuppiat dagiti gagayyemda: “Awan ti uray siasino kadagiti kakabagiam ti managan iti kastoy a nagan.” Kalpasanna, babaen iti panagsenias, insaludsodda no aniat’ kayat ti amana a painagan iti ubing. Idi dimmawat ti maysa a pagsuratan a tapi, ni Zacarias, a nagsiddaawan ti isuamin, insuratna: “Juan ti naganna.”
Iti dayta, ti panagsao ni Zacarias simimilagro a naisubli kenkuana. Malagipyo pay a napukawna ti abilidadna nga agsao idi a dina pinati ti impakaammo ti anghel a ni Elisabet maaddaanto iti anak. Bueno, idi nagsao ni Zacarias, amin dagiti agnanaed iti sangakaarrubaan nagsiddaawda ket kunada iti bagbagida: “Anianto ngata ti pagbalinan daytoy nga ubing?”
Ni Zacarias napno itan iti nasantuan nga espiritu, ket siraragsak a kinunana: “Madaydayaw koma ni Jehova a Dios ti Israel, ta sinarungkaranna ken sinubbotna ti ilina. Ket imbayogna ti maysa a sara ti panangisalakan a maipaay kadatayo iti balay ni David nga adipenna.” Daytoy “sara ti panangisalakan,” siempre, isu ni Apo Jesus, a maipasngayto pay laeng. Babaen kenkuana, kuna ni Zacarias, ti Dios “ipaayna kadatayo, kalpasan ti pannakaluk-attayo iti im-ima dagiti kabusortayo, ti pribilehio a panangipaay nga awan butengna ti sagrado a panagserbi kenkuana buyogen ti kinamatalek ken kinalinteg iti amin nga aldawtayo.”
Kalpasanna nagipadto ni Zacarias maipapan iti anakna, a ni Juan: “Ket sika, nga ubing, managankanto iti mammadto ti Kangatuan, ta mapankanto iti sanguanan ni Jehova tapno isaganam dagiti dalanna, a mangipaawat kadagiti tattaona ti pannakaisalakan babaen ti pannakapakawan ti basbasolda gapu iti nasnek a panangaasi ti Diostayo. Iti daytoy a panangaasi sarungkarannatayo ti sinamar manipud iti ngato, tapno lawlawagan dagiti agtugtugaw iti sipnget ken anniniwan ni patay, tapno idalan dagiti saksakatayo iti dalan ti talna.”
Iti daytoy a tiempo ni Maria, a kaawatan maysa pay laeng a balasang, nakagtengen idiay Nasaret. Aniat’ mapasamak kenkuana inton nalawag nga isut’ masikogen? Lucas 1:56-80; Levitico 12:2, 3.
▪ Manot’ in-inaunaan ni Juan ken ni Jesus?
▪ Ania a bambanag ti napasamak idi a ni Juan ket walo nga aldawnan?
▪ Kasanot’ panangsarungkar ti Dios iti ilina?
▪ Ania a trabaho ti naipadto nga aramiden ni Juan?