Nagunggonaanda Gapu iti Pannagnada nga Awan Pakababalawanna

BENDISIONAN ken gunggonaan ni Jehova dagiti matalek nga adipenna. Mabalin a kasapulan nga agurayda iti sumagmamano a tiempo tapno makitada ti pannakatungpal dagiti panggep ti Dios, ngem anian a makaay-ayo no mapasaran ti pammendisionna!

Nailadawan daytoy iti agarup dua ribu a tawenen ti napalabas iti kaso ti padi a Judio a ni Zacarias ken ti asawana, ni Elisabet, agpada a nagtaud iti kaputotan ni Aaron. Inkari ti Dios a paraburanna dagiti Israelita iti annak no agserbida a simamatalek kenkuana. Kinunana a dagiti annak ket gunggona. (Levitico 26:9; Salmo 127:3) Nupay kasta, awan ti anak da Zacarias ken Elisabet ken maysa pay, lakay ken baketdan.​—Lucas 1:1-7.

Kunaen ti Kasuratan a da Zacarias ken Elisabet “agpadpadada a nalinteg iti sanguanan ti Dios gapu iti pannagnada nga awan pakababalawanna maitunos kadagiti amin a bilin ken legal a kalikaguman ni Jehova.” (Lucas 1:6) Dakkel ti panagayatda iti Dios ket saan a makapadagsen kadakuada ti panangsurot iti nalinteg a panagbiag ken panangsalimetmet kadagiti bilinna.​—1 Juan 5:3.

Dagiti Di Ninamnama a Bendision

Agsublitayo iti naladaw a primavera wenno nasapa a kalgaw ti tawen 3 K.K.P. Agturturay idi ni Herodes a Dakkel kas ari idiay Judea. Iti maysa nga aldaw, simrek ni padi a Zacarias iti Nasantuan [a disso] ti templo idiay Jerusalem. Bayat nga agkarkararag dagiti tattao iti ruar ti santuario, pupuoranna ti insienso iti balitok nga altar. Nalabit naibilang kas kaindaklanan kadagiti inaldaw a serbisio, maaramid daytoy kalpasan a maidatag ti daton. Mabalin a maminsan laeng iti unos ti panagbiagna a mapadasan ti padi daytoy a pribilehio.

Saan a mamati ni Zacarias iti nakitana. Nakatakder ti anghel ni Jehova iti makanawan ti altar a pagpuoran iti insienso! Nariribukan ken nagbuteng ti lakayen a padi. Ngem kinuna ti anghel: “Dika agbuteng, Zacarias, agsipud ta ti ararawmo naimdengan buyogen ti pannakaanamong, ket ni asawam nga Elisabet agbalinto nga ina ti anakmo a lalaki, ket panaganamto iti Juan.” Wen, impangag ni Jehova dagiti napasnek a kararag da Elisabet ken Zacarias.​—Lucas 1:8-13.

Innayon ti anghel: “Maaddaankanto iti rag-o ken dakkel a ragsak, ken adunto ti agrag-o iti pannakaiyanakna; ta isu dakkelto iti sanguanan ni Jehova. Ngem masapul a saanto a pulos uminum iti arak ken iti naingel nga inumen, ket mapnonto iti nasantuan nga espiritu manipud pay iti aanakan ni inana.” Agbalinto ni Juan a maysa a Nazareo a napno iti nasantuan nga espiritu ti Dios iti unos ti panagbiagna. Intuloy a kinuna ti anghel: “Adu kadagiti annak a lallaki ti Israel ti pasubliennanto ken Jehova a Diosda. Kasta met, mapanto iti masanguananna buyogen ti espiritu ken pannakabalin ni Elias, tapno pasublienna ti puspuso dagiti amma kadagiti annak ket dagiti nasukir iti praktikal a kinasirib dagiti nalinteg, tapno isaganana maipaay ken Jehova ti maysa nga ili a sisasagana.”​—Lucas 1:14-17.

Sinaludsod ni Zacarias: “Kasano a makasiguradoak iti daytoy? Ta lakayakon ket ni asawak aduan unayen iti tawen.” Kinuna ti anghel: “Siak ni Gabriel, nga agtaktakder iti asideg ti sanguanan ti Dios, ket naibaonak a makisao ken mangideklara kenka ti naimbag a damag dagitoy a bambanag. Ngem, adtoy! agulimekkanto ket dikanto makapagsao agingga iti aldaw a maaramid dagitoy a bambanag, agsipud ta dika pinati dagiti sasaok, a matungpalto iti naituding a tiempoda.” Idi rummuar ni Zacarias iti santuario, saanen a makasao, ket naawatan dagiti tattao nga adda nakitana a nakaskasdaaw. Nagsensenias lattan tapno maipaawatna ti kapanunotanna. Nagawid [ni Zacarias] kalpasan ti publiko a panagserbina.​—Lucas 1:18-23.

Maysa a Pagrag-oan

Kas naikari, di nagbayag naaddaan ni Elisabet iti panggapuan nga agrag-o. Masikogen, a nangikkat iti pannakaibabain ti panagbalin a lupes. Naragsakan met ti kabagianna a ni Maria, ta kinuna kenkuana ti isu met laeng nga anghel a ni Gabriel: “Adtoy! iyinawmonto iti aanakam ken ipasngaymonto ti maysa nga anak a lalaki, ket panaganamto iti Jesus. Daytoy a maysa naindaklanto ket maawaganto iti Anak ti Kangatuan; ket ni Jehova a Dios itednanto kenkuana ti trono ni David nga amana.” Sitatallugod ni Maria nga agakem kas “ti babai nga adipen ni Jehova.”​—Lucas 1:24-38.

Nagdardaras ni Maria a napan iti pagtaengan da Zacarias ken Elisabet iti kabambantayan a pagilian, iti maysa a siudad ti Judea. Idi nangngeg ni Elisabet ti kablaaw ni Maria, limmagto ti ubing iti aanakanna. Babaen ti impluensia ti nasantuan nga espiritu ti Dios, impukkaw ni Elisabet: “Benditoka kadagiti babbai, ket bendito ti bunga ti aanakam! Gapuna kasano a naadda kaniak daytoy a pribilehio, a ti ina ti Apok umay kaniak? Ta, adtoy! bayat a ti aweng ti kablaawmo dimteng kadagiti lapayagko, ti maladaga iti aanakak limmagto a buyogen ti dakkel a ragsak. Naragsak met daydiay namati, agsipud ta addanto naan-anay a pannakaaramid dagidiay bambanag a naisao kenkuana manipud ken Jehova.” Siraragsak met a simmungbat ni Maria. Agtallo a bulan a nakipagyan [ni Maria] ken Elisabet.​—Lucas 1:39-56.

Ti Pannakayanak ni Juan

Iti naituding a panawen naipasngay ti maysa nga ubing a lalaki kada baket ken lakayen nga Elisabet ken Zacarias. Iti maikawalo nga aldaw, nakugit ti maladaga. Kayat dagiti kabagianda a panaganan ti ubing iti Zacarias, ngem kinuna ni Elisabet: “Saan a pulos! no di ket isu maawaganto iti Juan.” Umanamong ngata ti di pay makasao nga asawana? Iti maysa a tapi insuratna: “Juan ti naganna.” Iti dayta met la a kanito, makasao manen ni Zacarias, ket indaydayawna ni Jehova.​—Lucas 1:57-66.

Napno iti nasantuan nga espiritu, nagipadto ti maragsakan a padi. Nagsao a kas man la ti naikari a Manangisalakan​—‘ti sara ti pannakaisalakan iti balay ni David’​—ket rimmusingen maitunos iti Abrahamiko a tulag maipapan iti maysa a Bin-i a pakabendisionan ti amin a nasion. (Genesis 22:15-18) Kas manangyam-ammo iti Mesias, ti anak ni Zacarias a simimilagro a naipasngay ‘mapanto nga umun-una iti sanguanan ni Jehova tapno ikkanna dagiti tattao iti pannakaammo ti pannakaisalakan.’ Iti panaglabas ti tawtawen, nagtultuloy a dimmakkel ni Juan ken nagbalin a nabileg iti espiritu.​—Lucas 1:67-80.

Sibabaknang a Nagunggonaan

Da Zacarias ken Elisabet ket nasayaat nga ulidan ti pammati ken kinaanus. Intultuloyda ti nagserbi a simamatalek ken Jehova nupay masapul nga agurayda iti Dios, ken sa la dimteng ti kadakkelan a gunggonada idi lakay ken baketdan.

Kaskasdi, anian a bendision ti tinagiragsak da Elisabet ken Zacarias! Babaen ti impluensia ti espiritu ti Dios, agpadada a nagipadto. Naaddaanda iti pribilehio nga agbalin a nagannak ken mannursuro ti manangyam-ammo iti Mesias, ni Juan a Mammautisar. Maysa pay, imbilang ti Dios ida a nalinteg. Kasta met, dagidiay sumursurot ita iti nadiosan a panagbiag addaanda iti nalinteg a takder iti Dios ken umawatdanto iti naruay a naparaburan a gunggona gapu iti pannagnada nga awan pakababalawanna kadagiti bilin ni Jehova.