ELISABET

[Gr., E·lei·saʹbet manipud Heb., ʼE·li·sheʹvaʽ, a kaipapananna “Ti Diosko ket Aglaplapusanan; Dios ti Panaglaplapusanan”].

Ti managbuteng-Dios nga asawa ti padi a ni Zacarias ken ina ni Juan a Manangbautisar. Ni Elisabet a mismo ket kameng ti pamilia ti papadi a nagtaud ken Aaron a Levita. Bumaket ken lumakaydan nga agassawa idi a ni anghel Gabriel nagparang ken Zacarias idiay Nasantuan a benneg ti templo ket impakaammona a mangipasngay ni Elisabet iti maysa nga anak a lalaki a maawagan iti Juan. Idi masikogen, imputputong ni Elisabet ti bagina iti lima a bulan. Idi maikanem a bulan ti panagsikogna isu ket sinarungkaran ti kabagianna a ni Maria. Iti dayta a pasamak, ti sikog pay laeng a ni Juan naglagto iti aanakan ni inana, ket ni Elisabet, a napno iti nasantuan nga espiritu, insawangna a bendito ni Maria ken ti bunga ti aanakanna, nga inawaganna ni Maria iti “ina ti Apok.”​—Lu 1:5-7, 11-13, 24, 39-43.