Dagiti Saludsod Manipud Kadagiti Managbasa

Masikog kadin ni Maria a nagbalin nga ina ni Jesus idi napan simmarungkar ken ni kabagianna nga Elisabet?

Wen, nalawag a kasta.

Iti Lucas kapitulo 1, mabasatay nga umun-una maipapan iti panagsikog ni Elisabet, ti asawa ni padi a Zacarias, a nangyanak ken ni Juan (a Mammautisar). ‘Idi maikanem a bulan [ni Elisabet simmarungkar] ni anghel Gabriel’ ken Maria tapno ipadamagna nga agsikogto ken ipasngayna ti “Anak ti Kangatuan.” (Lucas 1:26, 30-33) Ngem kaano a nagsikog ni Maria?

Intultuloy a kunaen ti salaysay ni Lucas a dagus a nagdaliasat ni Maria a nagturong idiay Juda tapno sumarungkar iti masikog a kabagianna a ni Elisabet. Idi nagkita dagitoy dua a babbai, limmagto (ni Juan) ti maladaga iti aanakan ni Elisabet. Dinakamat ni Elisabet ti ‘bunga iti aanakan ni Maria,’ ken inawaganna ni Maria kas “ti ina ti Apok.” (Lucas 1:39-44) Ti lohikal a konklusion ngarud ket nalpas idin a naginaw ni Maria, nga isut’ masikogen idi simmarungkar a mangkita ken ni Elisabet.

Mabasatayo iti Lucas 1:56: “Idin ni Maria nakipagtaeng kenkuana iti agarup tallo a bulan, ket nagsubli iti bukodna a pagtaengan.” Saan a mangipaay daytoy a bersikulo iti detalyado a pamattapattaan iti apag-isu nga aldaw iti kalendario. Kunana nga “agarup tallo a bulan,” a mangyeg ken ni Elisabet iti maikasiam a bulan ti panagsikogna.

Kalpasan ti itutulongna ken ni Elisabet iti maudi a paset ti panagsikogna, nagawiden ni Maria iti pagtaenganna idiay Nazaret. Nalabit nautob ni Maria nga iti kanito nga agpasngay ni Elisabet (ken ni Juan), amangan no adu ti sumarungkar, a dadduma kadakuada ti kakabagianda pay ketdi. Naalas wenno nakababain dayta para iti maysa a di naasawaan a balasang a masikog. Kasano kabayagen a masikog ni Maria idi agsubli idiay Nasaret? Tangay nakipagnaed ken ni Elisabet iti “agarup tallo a bulan,” nalabit nga addan ni Maria iti arinunos ti maikatlo a bulan wenno rugrugi iti maikapat a bulan ti panagsikogna idi nagsubli idiay Nasaret.